Read berom Yɛzɛkyɛl 6 Bible Online

Yɛzɛkyɛl 6 - berom bible

Yɛzɛkyɛl 6

¹Dagwi Darwey a ha na me, a ye,

²“À mwasi, sɛt bayis mo e ra beraku Israyɛl, na hwo zarap e ra vɛ,

³hwo ye, ‘A yin beraku Israyɛl, wok in hâ Darwey Dagwi Darwey! Darwey Dagwi Darwey a yang beraku, na berahwol, na bèvwɛngɛ, tanga benɛk ngan: Me pyɛ hom mê vey na wal como e ra yin, ko mê wey na berahwol sekwit min.

⁴Begagbang nɔrɔ yas min bê tɛ́ ɛn barin, ko bê gangas begagbang nɔrɔ pyɛ̂ nesang hyɔɔlɔl min, mê mɔbɔs mwa bemat de be sap cī e nuyêl yɛ.

⁵Mê bomos bavin BeIsrayɛl e nuyel cī mɛn, ko mê shara bekup min mwa, me gwɔrɔ mɛ begagbang nɔrɔ min o.

⁶E kahɛ kwɔn de yin a sangal ɛ, bê gangas bapomo min, ko be wey na berahwôl cī min, yi ano, begagbang nɔrɔ min bê tɛ́ ɛn barin, bê bunut cī min, na be wey na yɛ, bê waram begagbang nɔrɔ pyɛ̂ nesang hyɔɔlɔl min, ko bê wey na pyɛ̂ fwom min mwa vit.

⁷Bê mɔbɔs behak e ji min e kagwa, ano de yin ê tɔk ma sé Dagwi Darwey.

⁸“ ‘Mwa ano, mê tik behak e ji min be hywit ɛn wal como vɔk e yére bemat jey cak, ko be shara hɛn e bapomo mɛn.

⁹Yɛn de yɛn a hywit ɛn, bê bare na me e ji yére bemat jey de ya hashe hɛn e sesam, e gwong de yɛn a mǎ me yi na yey mɛn de ya doyo yi na me, ko bayis mɛn baves de ba raa cī mɛn. Yɛn pyɛ mɛn bê sè pyɛ byɛs yaga neves de yɛn a ragas, na mwa pyɛ̂ byɛm-byɛm mɛn arɔng.

¹⁰Yɛn ê tɔk ma sé Dagwi Darwey, ma shìra hɛn e nɔrɔ wɛt na me vey na rezot e ra yɛn.’ ”

¹¹Darwey Dagwi Darwey a ye, “Dak in vɔ sesin! Tó in bol! Ye in: Kɛ̀ɛ ɛ́, yaga pyɛ̂ byɛm-byɛm vyes de BeIsrayɛl ba ra! Yaga wal como wô wey na yɛn, mwa na vyong tanga tumbang.

¹²Vane de ba sé yikyik bê kushu na tumbang, vemo de ba sé bagat, bê mɔbɔs hɛn e como, ko bwang vemo de ba pɔl, ba nàra beken, bê kushu na vyong. Ano de yɛn ê wok nepep mwa shom hom e ra yɛn.

¹³Ko yin ê tɔk me wɛ à Dagwi Darwey, jeng de bavin vemo de ba ga mɔbɔs ba dyɛngɛs tɔ̌l e tê cī mɛn, na be rɔnɔ begagbang nɔrɔ yas mɛn, e ra kawɛ rahwol lwis, na mwa batɛt beraku, na e nɛn kayɛ cɔgɔ̂t berang gyisik, na e kayɛ cɔgɔ̂t ouk lɛ́ng ryat, tanga e kawɛ gàgbang nɔrɔ pyɛ̂ nesang hyɔɔlɔl vɔk na cī mɛn.

¹⁴Mê nára kwɛn vwɔ hom e ra yɛn, na me tɛ̀ vwel o he se hal, sana pyɛ́, yi e hey gbingiring e rwa batin vɔk e Ribla e rwa bato, na mwa kahɛ kwɔn de ba sangal ɛ, ko yɛn ê tɔk ma sé Dagwi Darwey.”