Read berom Yɛzɛkyɛl 7 Bible Online

Yɛzɛkyɛl 7 - berom bible

Yɛzɛkyɛl 7

¹Dagwi Darwey a ha na me, a ye,

²“Hwo mwasi, Darwey Dagwi Darwey a yang bemat vwel Israyɛl ngan: “Yɛnɛ mó! Yɛnɛ mó ha ga pom, e ra rwa gùl naas ve vwel o.

³A remo yɛnɛ mó ha ga hwo e ra yin, mê hala shom hom e ra yin. Mê ra a yin shɔt tyɛng na begwong min, mê tabak hin yaga pyɛ̂ byɛm-byɛm min.

⁴Yīs hom hê tik hwak wɛt, mê wok nemwishish wɛt. Mê tabak hin yaga begwong min, yaga pyɛ̂ byɛm-byɛm de ya sé e tē min. Ano yin ê tɔk e me wɛ à Dagwi Darwey.”

⁵Darwey Dagwi Darwey a ye: “Rezot e ra rezot! Di, ra ga pom.

⁶Yɛnɛ mó ha ga vey, yɛnɛ mó ha ga pom. Hā ga sene e ra yin, di, ha ga vey!

⁷Gawey min ha ga vey na yin, à yin bemat vwel o. Jeng o ya ga vey, tuk o ha vey bagat, hê reyɔm, ko hê nzem e beraku wɛt.

⁸Bwang o tyɔng a remo, mê shusha shom hom e ra yin, mê tala shom hom e ra yin. Mê yɛrɛ a yin shɔt tyɛng na begwong min, ko mê tabak hin yaga mwa nebyɛm-byɛm min.

⁹Yīs hom hê tik hwak wɛt, mê wok nemwishish wɛt. Mê tabak hin tyɛng na begwong min, yaga pyɛ̂ byɛm-byɛm de ya sé e tē min. Ano yin ê tɔk e me Dagwi Darwey de ma fala.

¹⁰Di, jeng o! Di, ye kyè vey! Gawey min ha ga nusu e jey. Gwelê yol min gwa ga túruk, râ kaa ha ga karak.

¹¹Yol ya ga ras, ya tɛ́ ɛ gwelê neves, vit à winde ê nàra. Vit à neshɛ̀rɛk mɛn, vit à yele mɛn, vit à pyɛ de ya dal na nerey e tē mɛn.

¹²Jeng o ya ga pom, tuk o ha vey bagat, tik na mwat sey o a shɛgɛsh wɛt, ko mwat row o a ra sesin wɛt, yaga shom ya sé e ra bagyɛng mɛn mwa.

¹³“Yaga bemat row o bê to toyo e ra pyɛ de ba ga sey wɛt, mwa jeng de yɛn a rɔngɔl beken. Yaga negwi-ywey o nà ra mwa regyɛng mɛn, bê tɔk to fugut wɛt. Yaga banɛn mɛn, yɛn ê tɔk gyeng neken mɛn wɛt.

¹⁴“Ba ga pɛl durum, be yong kayɛ pyɛ gyam, ko vit à mwat de a wɔ̂ como, yaga shom hom ya sé e ra mwa bagyɛng mɛn.

¹⁵Yaga wal como wa sé e jey, ko tumbang na vyong ba sé e lɔ, vemo de ba sé e tê-dyɛng bê kushu na wal como, vemo de ba sé e repomo — vyong na tumbang bê re ɛn.

¹⁶Ka sede vê dál behak ba hywit ɛn, bê sɛ̀ ɛn e beraku, sede bewǔtut benɛk, mwa vɛ be ra sesin e ra banɛn mɛn.

¹⁷Mwa vɔ bê vow, mwa bakwot bê tɛ́ ɛn gbɛrɛk.

¹⁸Bê tɛ̀ berugu sesin, neves nê kyiri hɛn. Rekyen rê se e ra mwa bayis, bato mɛn bê tɛ́ ɛn hulhul.

¹⁹Yɛn ê wesek dyam pyɛng mɛn e nehyok, bê teshe na dyam shinang mɛn sede pyɛ ligis. “Dyam pyɛng na dyam shinang mɛn yê tɔk sey ɛn e tuk shom Dagwi Darwey wɛt. Yɛn ê tɔk kwɔshɔ vyong mɛn, kɛ be sila jim mɛn na yɛ wɛt. Yaga yá sè pyɛ̂ bugurɛk yê neburu mɛn.

²⁰Yi na pyɛ̂ tɔrɔ mɛn ryat o, de yɛn á ra kaa na yɛ, yɛn á yong cī mɛn de ya sé byɛm-byɛm, pyɛ́ de ya sé kis. Yaga ano, mê tɛ̀ ye sè a yɛn pyɛ gbiridik.

²¹“Mê nára a bemat beduk pyɛ́ mɛn mwa, sede pyɛ́ de yɛn a sey ɛ̀, ko na bemat bevês jey sede pyɛ̂ jugu, yɛn ê tɛ̀ yɛ̄ ligis.

²²Mê doyo bayis hom yi na yɛn, yaga na yɛn a tɛ̀ Kwɔn Jɛrɛ hom ligis. Vê yol bê yel e hɛ, yɛn ê tɛ̀ hɛ ligis.

²³Yong in ngyang! Yaga vwel o ha sila na banɛ̂n lusha nemi, gbɔng pomo ha sila na yol.

²⁴Mê vey na yére bemat jey de ya dal na neves na ye sey ɛ nelɔ mɛn. Mê yɛnɛ râ kaà vê gap o, ko nekwɔn jɛrɛ mɛn nê tɛ́ ɛn ligis.

²⁵Jeng de rezot rê pom, yɛn ê jama sangal netyang, ko vit à hɛ.

²⁶Rezot rê raa rezot, neha nê raa neha, yɛn ê kyě jama negwi-ywey yi na zarap, basa hê se vit yi na piris na vô bya yi na bemakuk.

²⁷Gwɔ̀m ê ra sesin, hwey gwɔ̀m hê pat yey e negwɔm o, ko vɔ mwa bemat vwel o bê vow. Mê ra na yɛn tyɛng na gwong mɛn, tyɛng na shɔ̄t mɛn mê ra a yɛn shɔt. Ko yɛn ê tɔk e me wɛ à Dagwi Darwey.”