Read berom Yɛzɛkyɛl 8 Bible Online

Yɛzɛkyɛl 8 - berom bible

Yɛzɛkyɛl 8

¹E tuk he tungun, he pwɛl gwo tyiimin, gwo shey he tyiimin, má sè sangal e lɔ hom, ko bemakuk Yuda bá sè sangal na me. Ko gobok, retô Darwey Dagwi Darwey ra hwo e ra me.

²Ma bɛrɛng, ko ma di sede mwasi. Yi e wit mɛ wɔ̀ gyirik a sé sede kya, ko vɔk e rak o, a nɛp sede dyam pama de ba tugut.

³A nára pyɛ cak sede vwɔ, ko ya kaba redúk tot rato hom. Ko gabik o ha jut me e rak o, e tê lagwi na jey, ko ha kyè na me e ji negwi-ywêy Dagwi vɔk e Yɛrusalɛm, vɔk e rwi ruhup rwa bato. E hwomo, ma di ci cak e tumal de ye kas a Dagwi yey tyɔng wɛt.

⁴Ko ma di gbɔng nerat Dagwi Israyɛl e hwomo, sede negwi-ywey de ma kana di e nɛk Rɔt Kebar.

⁵Dagwi a yang me, “À mwasi, ye ganga a remo na hwo bɛrɛng bak rwa bato.” Ano, ma ye ganga vɔk e rwa bato e hwomo, e rwa batô ruhup gàgbang nɔrɔ yas, e rwi yel o, ma di ci de ye kas a Dagwi yey tyɔng wɛt.

⁶Dagwi a to yang me, “À mwasi, hwà di pyɛ́ de yɛn a sé ra, pyɛ̂ byɛm-byɛm vyes o de BeIsrayɛl ba sé ra e ngamo, na yɛn a gwɛ ro me yikyik yi e Kwɔn Jɛrɛ hom a? Mwa ano, hwô di pyɛ̂ byɛm-byɛm de ya dal yemo na neves.”

⁷A jut me vɔk e rwi ruhup lala majey. Ma bɛrɛng ko ma di revɔng e vwara duk.

⁸Ko a yang me, “À mwasi, kas vwara duk o.” Ma kas gwɛ ko ma wɔ kulu ɛ̀ kwɔ̂n yel.

⁹A ye, “Yel na hwo bɛrɛng pyɛ̂ byɛm-byɛm vyes de yɛn a sé ra e ji mo.”

¹⁰Ano, ma yel ko ma bɛrɛng. Vara duk o mwa ba sila na wɔrɔ̂ nezap pyɛ̂ gabaga, na ngyāma de ya sé ligis, tanga nezap cī de BeIsrayɛl be re a yɛ fongol.

¹¹Bemakuk BeIsrayɛl kuru bataama ba sé e hwomo, mwa na Yaazaniya Shafan e tumal e tē mɛn. Kawɛ e ji mɛn a vɔk keshǐ rangas pyɛ́ e vwɔ mɛ, ko kyeng ha sè tugus yi e pyɛ̂ nesang hyɔɔlɔl o, ha sila duk o.

¹²Ko Dagwi a rangal me, a ye, “À mwasi, hwà sé bɛrɛng pyɛ de bemakuk BeIsrayɛl ba sé ra e lɛrɛ, kawɛ e duk ci mɛ a? Yɛn e tē: ‘Dagwi Darwey e bɛrɛng hot wɛt, Dagwi Darwey a ga kyini vwel o.’ ”

¹³A to yang me, “Hwô di pyɛ̂ byɛm-byɛm de ya dal yemo de yɛn a sé ra na neves”.

¹⁴Ano, a vey na me e ruhup rwa bato gwo Gbɔng Duk Re Fongol, ko ma di beha e sangal e hwomo e de sesîn ci de ba tang yɛ à Tamus.

¹⁵Ko a yang me, “Hwà ga di yere pyɛ yemo à mwasi a? Hwô di pyɛ̂ byɛm-byɛm de ya dal yemo.”

¹⁶A vey na me e lalâ ji mo hê Gbɔng Duk Re Fongol Dagwi Darwey, ko e hwomo, e rwi Kwɔn Jɛrɛ Dagwi Darwey, e tê gàgbang nɔrɔ yas, bemat sede kuru baba na vɛ betungun (25) ba sé ɛ. Yɛn a doyo á Kwɔn Jɛrɛ bama, ko bayis mɛn ba doyo vɔk e rwa rak. Yɛn a sé tē ngyuk vɔk e rwa rak, e nuyel gwi de gwa sé nusu.

¹⁷Dagwi a yang me, “À mwasi, hwà ga di pyɛ yemo a? Neves o na ga vey a BeYuda e de râ pyɛ̂ byɛm-byɛm yemo e ngamo wɛt a? Yɛn a ga sila vwel o na yol na be gwɛ cɔgɔs mɛ̀ shom hom a? Di de yɛn a sé sap cī na be ra a me mɛ kaa!

¹⁸Yaga ano, mê ra a yɛn pyɛ́ na shom, mê wok nemwishish kɛ me tosho reyɔm mɛn wɛt. Ka yɛn a ka dak bèkun e betong hom, mê wet betong na yɛn wɛt.”