Read berom Yɛzɛkyɛl 9 Bible Online

Yɛzɛkyɛl 9 - berom bible

Yɛzɛkyɛl 9

¹E bama mo, a yila na gbɔng fwɔ na me bin wok, a ye, “Vey in bagat, yin de yin e kyè wɔ tabak gbɔng repomo Yɛrusalɛm, kawɛ e ji min na pyɛ como e vwɔ mɛ.”

²E ji jeng, bemat betyiimin ba nusu yi e bak ruhup rak o gwô rwa bato, kawɛ na pyɛ como e vwɔ mɛ. E ji mɛn, hwak á tɛ̀ rugu linen, ko á vɔk pyɛ jɛk e gwóng mɛ. Yɛn mwa ba kyè, ko ba wɔ tumal e hagat gàgbang nɔrɔ yas wo dyam pama.

³Ko gbɔng nerat Dagwi Israyɛl na sogo yi e ra kɛrup e kwɔn de na kana sé ɛ, vɔk e ruhup Gbɔng Duk Re Fongol. Dagwi Darwey a hwo yila mwat de a tɛ̀ rugu linen, de a vɔk pyɛ jɛk e gwóng mɛ,

⁴a yang ɛ, “Kwey e tê gbɔng repomo mo, e tê Yɛrusalɛm, na hwo tɛ̀ jɔt e ratili kawɛ mwat de a lashe yey, ko yey mɛ ya bɔrɔk hɛ na mwa pyɛ̂ byɛm-byɛm de be ra e ji hɛ.”

⁵Ma to wok a sè tang bwang bemat o, “Raa hin hɛ e gbɔng repomo, na yin a mɔbɔs bemat o. Yin tik hwak kwen wɛt, ko yin wok nemwishish hwak wɛt.

⁶Mɔbɔs hin bemakuk, na bewen, na behwong, na nèy nesɛl tanga beha. Ko yin tik nà ra kawɛ mwat de a vɔk jɔt e ratili mɛ. Pɛrɛ hin e ngamo e Kwɔn Jɛrɛ hom.” Ano, yɛn a pɛrɛ na bemakuk de ba sé e nuyel Gbɔng Duk o.

⁷Ko Dagwi a to yang ɛn, “Tɛ̀ in Gbɔng Duk o ligis, na yin sila nelala wɛ na bavin bemat o. Hwo in fwom o!” Ano yɛn a nusu, ba hwo mɔbɔs bemat gbɔng repomo mo.

⁸Jeng de yɛn á sè mɔbɔs bemat o, ko ba hala me gbɔ́rɛy, ma gaba gup, ko ma dak sekun ma ye, “Áaa, à Darwey Dagwi Darwey! Hwô wey na mwa bwang BeIsrayɛl de ba tɛt ɛ, a remo de hwà sé shusha shom mo e ra Yɛrusalɛm a?”

⁹Ko a yang me, “Banɛn BeIsrayɛl na BeYuda ba kat ding-ding. Vwel o ha ga sila na lusha nemi, ko gbɔng repomo mo ra ga sila na yol tanga negbarak neves. Yɛn e tē, ‘Dagwi Darwey a ga kyini vwel o, ko e to bɛrɛng hot wɛt.’

¹⁰Ko me kē, mê tik mwat hwak, kɛ me wok nemwishish mɛn wɛt. Mê tala hɛn pyɔ̌n neves de yɛn a ga ra.”

¹¹E bama jeng, mwat de a tɛ̀ rugu linen na pyɛ jɛk mɛ e gwóng, a vey na ha, a ye, “Ma ga ra pyɛ de hwà nɔng me nu.”