Read berom Danyɛl 1 Bible Online

Danyɛl 1 - berom bible

Danyɛl 1

¹E shey hê netat de Yɛhɔyakim á sè gbɔng gwɔ̀m Yuda, Da Vwel Nɛbukadnɛzar wo Babilɔn a hwo e ra Yɛrusalɛm, a gwɔrɔ mwa gbɔng repomo mo na como.

²Darwey a nɔng ɛ wɛng e ra Gbɔng Gwɔ̀m Yɛhɔyakim, a to nɔng ɛ gwong, na a sey ɛ pyɛ́ cak de ba ra mɛ fwom e ji Gbɔng Duk Re a Dagwi Fongol. Jeng de Nɛbukadnɛzar a toyo e Babilɔn, a tik pyɛ́ mo e gban duk de ba re a ci mɛ fongol.

³Tuhak, Da Vwel Nɛbukadnɛzar a nɔ̂ng Ashpenas, gbɔng o wo bemât fwom mɛ nu, na a kasa yi e ji BeYuda bewen vê lɔ gwɔ̀m tanga vê nelɔ bemât nuyel de ba hashe vɔk e sesam.

⁴A yang ɛ, “Jut bewen de ba sé bekasang o, de ba ga sɛ̀ basa yɔkyɔk, de ba vɔk tɔk yerê kahɛ mo de ba jam yaga fwôm lɔ hom. Basa a yɛn basa na jɛ̂k e lem mot.

⁵Nɔng ɛn pyɛ́ na nshî anap nining na nenang. Myák ɛn neshey netat, E bama mo, bê yel e fwôm lɔ hom.”

⁶E ji vemo de ba kasa mo ba sè Danyɛl, na Hananiya, na Mishayɛl tanga Azarya. Mwa hɛn benaas ba sé yi e ji yerê Yuda.

⁷Ko gbɔng o Ashpenas a vos a yɛn bazâ Babilɔn. Danyɛl a yila hɛ à Bɛltɛshazar, Hananiya à Shadrak, Mishayɛl à Meshak, ko Azarya à Abɛt-Nego.

⁸Danyɛl a tɛ̀ e yey mɛ, a rɔda tɛ̀ to mɛ ligis na rê pyɛ́ na sɔ̂ nshî anap ne lɔ gwɔ̀m wɛt. Yaga ano, a wɔ̀ ra won na gbɔng o, Ashpenas, na a simo a yɛ, a re pyɛ́ mo wɛt.

⁹Ko Dagwi a tɛ̀ Ashpenas a wok nemwishish Danyɛl.

¹⁰Mwa ano, a yang ɛ, “A sé e Da Vwel de a ga nɔng nû pyɛ́ de yin ê re na sɔ. Me tele me, ka yin a de nusu sede bwang bewen o wɛt, yin a gyɔt, ko bê mɔrɔ me.”

¹¹Ano kwong, Danyɛl a wɔ na mwat de Ashpenas a tɛ̀ ɛ a bɛrɛng hɛ tanga besa mɛ betat o.

¹²A yang ɛ, “Ka hwà simo, tɛ̀ be nɔngɔs hot hwonong na nshi nsit zɔng nepɔlɔ kuru.

¹³E bama mo, hwo tyɛngrɛ hot na bwang bewen de be re pyɛ̂ lɔ Da Vwel, ko hwo de yɛrɛ tyɛng pyɛ de bayis mō ba dura a hwo.”

¹⁴Mwât bɛrɛng mɛn o a simo, ko ba mara bewen o pɔlɔ kuru mo.

¹⁵Sede jeng o ya sila, ba di bayis mɛn vwɛs-vwɛs, ba mɔsɔ naka, ba dal vemo de ba re pyɛ́ na sɔ nshî anap yi e lɔ Da Vwel.

¹⁶Yi e jeng o vɔk e nuyel, mwât bɛrɛng o a tik ɛn, be re hwonong zɔng e tô pyɛ̂ re de Da Vwel a nɔngɔs.

¹⁷Dagwi a nɔ̂ng bewen benaas vemo mo tɔk tanga sekwɛl. Ba basa bebok-basa pyak, ko ba sɛ̀ kawɛ bak tɔk e ji vɛ. A to nɔ̂ng Danyɛl negwi-ywey na tɔ̂k misang negwi arɔng.

¹⁸E yɛnɛ̂ shey tat de Da Vwel Nɛbukadnɛzar a yɛrɛ, Ashpenas a wɔ́ na mwa bewen o na yɛ.

¹⁹Da Vwel o a ra berem na mwa hɛn e ra pyɛ́ de ba basa a yɛn, ko a di, vit a hwak de a wul Danyɛl, na Hananiya, na Mishayɛl tanga Azarya e ji mɛn. Ano kwong, ba tɛ̀ ɛn e fwôm lɔ Da Vwel.

²⁰Yi e jeng o, kayɛ jeng de Da Vwel a jama vô redu, a sɛ̀ yɛn benaas vemo ba dal na tɔ̂k vô redu zang kuru e ra bemât badu tanga bemât tô bes de ba sé e yɛnɛ̂ mwa bavwel segwɔm mɛ.

²¹Danyɛl a nàra e fwôm lɔ Da Vwel e shey hê mɛsɛng o hê Kɔrɛsh.