Read berom Danyɛl 10 Bible Online

Danyɛl 10 - berom bible

Danyɛl 10

¹E shey hê netat hê Kɔrɛsh, Da vwel Pɛrsya, Danyɛl, de ba vo a yɛ rezâ Bɛltɛshazar, a sey ha yi na Dagwi. Ha mo ha sé mwin, ko ha sé e ra gbɔng como. Danyɛl a ye ngyɛ́k na a tɔk cap-ha mo, ko ba dura a yɛ hɛ e negwi-ywey:

²E ji nepɔlɔ nane, me Danyɛl ma sè e ji sesin besati betat.

³Ma re pyɛ́ cak ryat o wɛt, nama na nshî anap na wɔ́ e nu hom wɛt, ko ma mɔmɔ me na něy wɛt.

⁴E pɔlɔ kuru baba na hɛ naas e pwɛl gwô susu mo, ma sè tumal e kwogôm Gwɔrɔt Tigris.

⁵Sede ma ye ganga, ko ma di mwat na berugû lilen, a rɔgɔs gyindi wo celes dyam shinang e rawit mɛ.

⁶Rebek mɛ ra sè sede yerê dyéngere ryat sizɔng, bwang bayis mɛ gwa nɛp sede nedɛbɛt gbara, bayis mɛ ba lolo sede balêm kya, vɔ mɛ na bol mɛ ba nɛp sede dyam pama de ba tugut yɛ, ko fwɔ mɛ gwa wus sede gwô regyɛng bemat.

⁷E me, Danyɛl nju hom de ma di mwat de a vey o. Bemat de bá sè tanga me ba di pyɛ cak wɛt, ko ba vo bengyip sizɔng, ba tele wɔ lɛrɛ bato mɛn.

⁸Ba tik me nju hom zɔng e de bɛrɛng gbɔng pyɛ yane. Bwang bayis hom gwa ga doyo hɛ, ko gap ha ga tala a me.

⁹Mwat o a hwo ha, ko ras de ma wok fwɔ mɛ, ma gaba gup e vwel, nehywɛ hom na ga vuru hɛ.

¹⁰Vwɔ gwa ra me, gwa sɛlɛ me, na me sogo e ra bakwot hom, na me ye yɛndɛng e ra vɔ hom.

¹¹Mwat o a yang me, “À Danyɛl, Dagwi a jut o na nerat sizɔng, ko e yɛ de a tomo me na hwo. Sogo, na hwo tɛ̀ nehywɛ mō e ra ha de me kyè wɔ ha.” Ma sogo e tumal, rebek hom re vow,

¹²ko a yang me, “À Danyɛl, hwo wok bengyip wɛt! Hwà dyɛng to mō e nuyêl Dagwi mō, yaga hwà tɛ̀ e yey mō, hwó simo tɔk pyɛ́ de ya té. Yi e tûk susu mo, a wok won mō, ko ma vey, na me toyo a hwo na hanat mɛ.

¹³Ko di, mwât nuyêl segwɔm Pɛrsya a dul me nepɔlɔ kuru baba na hɛ hining. Ko Mikayɛl, gwining e ji vê nuyêl betom-lagwi a vey sɛlɛ me, na me sɛ̀ gwông nusu yi e hwomo.

¹⁴Ano de ma vey wul na hwo, yaga na me misang a hwo pyɛ de ye kyè wɔ té na bemat mō e ngamo nuyel. Negwi-ywey nemo na sé e ra jeng de ye kyè vey.”

¹⁵Jeng de a ha a me pyɛ́ yemo, ma ye det à bayis hom, ma tɔk hanat wɛt.

¹⁶Ko womo de a sé sede mwasi a ra bwɛrɛk nu hom. Ano de ma tɔk to hwo ha, ma yang ɛ, “À darwey, yaga pyɛ́ de ma di e negwi-ywey o ma sé wok na rebek vɛ̌t, gap ha ga tala a me.

¹⁷E rɛ̌ de mwat de a sé pyɛ cak wɛt sede me, ê kyɛm a ha na hwo, à darwey ɛ? Gap hom ha ga tala hɛ, nesong na ga hwo radɛ a me.”

¹⁸Yɛ de a sé sede mwasi a to ra me, a nɔng me gap.

¹⁹A ye, “Hwo vɔk bengyip wɛt! Dagwi a jut o na nerat sizɔng. Kayɛ pyɛ yê se a hwo naka. Vɔk yey ting!” Jeng de a ha na me, ma sɛ̀ gap, ma ye, “À darwey, hwô tɔk ha na me, yaga hwà ga gwɛ̌ a me gap.”

²⁰Ano kwong, a ye, “Hwà tɔk retîn pyɛ de ya tɛ̀, ma vey na hwo arɛt? Ma vey na me há a hwo pyɛ́ de ba jɛk e Bwok-basa gwo Tsak-ha. Ko di, jeng de me kyè wɔ toyo, mê to tó como na mwât nuyêl segwɔm Pɛrsya. Ko jeng de ma ga di wɛng, mwât nuyêl segwɔm Giris ê vey. Ko vit a mwat de ê sɛlɛ me e ra yɛn sɛ̌ Mikayɛl, mwât nuyel de e dul bemat mō.”