Read berom Danyɛl 11 Bible Online

Danyɛl 11 - berom bible

Danyɛl 11

¹Me pyɛ hom ma ga sɛlɛ hɛ e shêy susu hê negwɔm Dariyus wo Medya.

²A remo, mê há a hwo tsak ô pyɛ́ de ye kyè wɔ té e nuyel. Bê to sɛ̀ begbɔng begwɔ̀m behak betat, hwak e ra hwak, de bê sogo e Pɛrsya. Wo nenaas o a rɔda dal ɛn na nedanerey vitvit, ko jeng de a ga tɛ̀ gap yi na nedanerey mɛ mo, ê tɔgɔs bemat mwa na be hwo e ra segwɔm Giris.

³E bama mo, gbɔng gwɔ̀m sugâ como hwak ê sogo, ê re negwɔm e ra gbɔng vwel yɔkyɔk, ko ê ra pyɛ de yey mɛ ya di zɔng.

⁴Ko jeng de segwɔm mɛ mo sa ga lɔk ɛ mwamwa, sê gaba, sê gas ɛ zang naas e ra naas, ko mwa nɛ nê sè e vwɔ̂ yére mɛ wɛt, ko nê vɔk retô yerê gbɔng gwɔ̀m sugâ como mo wɛt.

⁵Gbɔng gwɔ̀m rwa batin ê gwɛsɛ gap. Ko hwak e ji bemât nuyêl como mɛ ê sogo nehywɛ, ko ê sey ɛ bwarwêy segwɔm o.

⁶E bama neshey nehak gbɔng gwɔ̀m rwa batin na wo rwa bato bê wuna hɛn e nesa. Gbɔng gwɔ̀m rwa batin ê nɔng hwóng mɛ e weneng na gbɔng gwɔ̀m rwa bato, na be dura mɛ wunâ nesa mo. Ko retô hwong o rê ros wɛt. Yɛ na da mɛ, na rwas mɛ tanga bemât fwom de ba dop na yɛ ba rɔda wey na yɛn mwa.

⁷Hwak e ji yerê hwong o ê vey re negwɔm ne rwa batin. Ê hwo e ra bemât comô gbɔng gwɔ̀m rwa bato, ê yel e kwɔ̂n dal mɛ, ko a re ɛn na como.

⁸Ê hashe cī mɛn na pyɛ́ ryat ye dyam shinang na dyam pyɛng de ba ra mɛ fwom yaga cī mɛn wɔ e Misra. Ko ê ra a gbɔng gwɔ̀m rwa bato pyɛ cak wɛt. Ko bê jut neshey,

⁹ko gbɔng gwɔ̀m rwa bato ê wɔ hwo e vwêl gbɔng gwɔ̀m rwa batin, ko ê toyo wɔ e sevwel mɛ.

¹⁰Nèy bewen mɛ na rɔda yong ɛn yaga como, nê tula gwakû regyɛng bemât como. Bê vey sede tɛmɛ-nshi, bê hwo e ra bemât repugu mɛn sɛ̌ ba wɔ wul kwɔ̂n dâl gbɔng gwɔ̀m rwa batin.

¹¹Gbɔng gwɔ̀m o ê sogo na shom, na a wɔ tó como na gbɔng gwɔ̀m rwa bato, ko ê re como mo, mwa ano de a vɔk gwogyɛng bemât como.

¹²Gbɔng gwɔ̀m rwa batin ê dak kaa, yaga a ga wey na bemât como, gu e ra gu. Ko mwa ano, wɛng me hê nàra pyak wɛt.

¹³Gbɔng gwɔ̀m rwa bato ê to gwɛ̌ nepyak regyɛng bemât como de na dal ne mɛsɛng o, ko e bamâ neshey nehak ê to toyo na bemât como mo na pyɛ̂ como yɔkyɔk.

¹⁴E jeng yane, bemat pyak bê sogo e ra gbɔng gwɔ̀m rwa batin. Ko di, à Danyɛl, bemât paa neshágarak yi e bemat mō, bemat bê wuna bato mɛn na yɛn, na be bin tɛ̀, pyɛ̂ negwi-ywey o ye té. Ko bê di wɛng wɛt.

¹⁵Gbɔng gwɔ̀m rwa bato ê vey, ê hwo e ra gbɔng repomo de ba gwɔrɔ na jwâ-pomo, ko ê lɔk nekwɔn kweres wo tut e ra jwâ-pomo mo, na a tɔk re rɛ. Ê re rɛ. Bemât comô gbɔng gwɔ̀m rwa batin mwa na besuga mɛn bê tɔk tumal wɛt.

¹⁶Ko gbɔng gwɔ̀m rwa bato ê tɔk ra pyɛ de e simo, yaga vit a mwat de ê tumal a yɛ. Ê sey ɛ vwel de ha dal na nerat arɔng, ko ê wey na hɛ.

¹⁷Ê yong ɛ na a sey ɛ segwɔm sê rwa bato. Ê wuna nesa na gbɔng gwɔ̀m rwa batin, ê nɔng ɛ hwóng mɛ e weneng, yaga na a ra gwong yé gup a segwɔm sá mɛ mo. Ko netsitsɛng mɛ mo nê re wɛt.

¹⁸E bama mo, ê doyo, na a hwo e ra yére bemât jey de ya sé e rekwogom gworep, ê re pyak e ji mɛn na como. Ko gbɔng o wo bemât como hwak dūk o, ê di wɛng e ra yɛ, ko ê tɛ̀ yɛnɛ̂ paà kwas mɛ.

¹⁹Gbɔng gwɔ̀m rwa bato mo ê toyo e nekwɔn dal ne vwel mɛ, ko ê di gawey, hemo hê se yɛnɛ mɛ.

²⁰Gbɔng gwɔ̀m de ê tut e ra negwɔm o, ê tomo mwât seres dyâm vwel, na a gwɛ mɛ nepyak nedanerey e ji yɛnɛ̂ segwɔm mɛ. Ko e ji jeng tyɔng, ba rɔda mɔrɔ gbɔng gwɔ̀m wane mo yaang, ko ê sè na como wɛt.

²¹Hwak à gbɔng gwɔ̀m de a vey pyɛ cak wɛt, yɛ a ka sé wo lɔ gwɔ̀m wɛt, ê pere tulu, ê sey ɛ negwɔm o e gwông netsitsɛng.

²²Ê yishing bagyɛng bemât como vê gap, ko ê wey na mwat nuyel bemat Dagwi.

²³A rɔda kwɛlɛng yére bemât jey cak yi na wuna hɛ na sira tanga yɛ. Ê gwɛsɛ ɛ gap, mwa ano de bemat tyɔng zɔng bê raa bama mɛ.

²⁴A rɔda hwo e ra bak vwel de wa dal na nerey hák. E hwomo ê ra pyɛ de hwak e ji bedabeda mɛ ba ga sang ra wɛt, ê gas a bemat de ba raa hɛ pyɛ́ de ba hashe e de jugu mo. Ê to yong begwong de ê wɔ hwo e ra nekwɔn dal, ko ê ros e de ra mo wɛt.

²⁵Ê tula gbɔng regyɛng bemât como, ko na yey ting ê wɔ̀ hwo e ra gbɔng gwɔ̀m rwa batin. Gbɔng gwɔ̀m o ê yong ɛ arɔng, ê wuna gwogyɛ̀ng bemât como, ko ê kyɛm a tó como mo wɛt, yaga ba ga yong a yɛ begwong beves.

²⁶Mwin, e bemat de ba sé bagat na yɛ de bê tɛ̀ ɛ a gaba. Bê shara regyêng bemât como mɛ, ko bê mɔbɔs pyak e ji mɛn.

²⁷Begbɔng begwɔ̀m vemo beba bê sangal be re pyɛ́ e tebut gwining o, ko e ji neyey mɛn bê bare pyɛ́ vyes vɔk na bemɛn. Yɛn ê yɛt a bemɛn nebɔs, ko pyɛ́ de bê yong yê tɛ̀ to wɛt, yaga jeng de Dagwi a yɛrɛ ya ga vey e ngyen wɛt.

²⁸Gbɔng gwɔ̀m rwa bato a rɔda toyo wɔ e vwel mɛ na pyɛ́ pyak de a ga hashe yi e de como. Ko e gwong mɛ, ê ra pyɛ de a tɛ̀ e yey mɛ e ra bemât Dagwi na negwɔn raa mɛn.

²⁹E jeng de Dagwi a ga tik ɛ ê to wɔ̀ hwo e ra sevwêl rwa batin. Ko e jeng yemo, pyɛ mo yê tá a yɛ wɛt.

³⁰Bemât como ba rɔda vey e ji bedwa-nshi yi e rwa ta. Bê sogo e ra yɛ, bê dul ɛ. A rɔda toyo na shom, ê gang shom mɛ e ra bemât Dagwi na negwɔn raa mɛn, ko ê wuna to na vemo de ba ga hala negwɔn raà Dagwi o.

³¹Ê tomo na bemât como mɛ, na be yel, be tɛ̀ Gbɔng Duk Re Fongol de ba rɔnɔ na jwa-duk ligis. Ba rɔda ro mɛ na nása nenɔrɔ ne kahɛ tuk, ko bê tɛ̀ pyɛ sekwit yemo de yê tɛ̀ kwɔn o byɛm-byɛm!

³²Ko yi na mɛlɛm, gbɔng gwɔ̀m o ê tɛ̀ vemo de ba ga hala negwɔn raà Dagwi, be raa hɛ. Ko vemo de be raa Dagwi, bê tumal gak, bê gyeng badu mɛ.

³³Bemat vemo de ba vɔk tɔk bê misang a behak pyak pyɛ ra. Ko vɔk e jeng cak, bê wey na behak e ji mɛn na wal, ko behak bê rangas hɛn, ko behak bê sey ɛ pyɛ́ mɛn, bê tɛ̀ ɛn e ngyang.

³⁴E jeng tak a yɛn o, bê sɛ̀ sɛlɛ tyɔng zɔng. Ko pyak e ji bemat vemo de be raa hɛn be raa raà bayis zɔng.

³⁵E ji vemo de ba vɔk tɔk, bê mɔbɔs behak. Yi ano, Dagwi ê tɛ̀ bwang bemat be tɛ́ ɛn haalal, na be yong bato mɛn gyam jeng yɛnɛ mo de Dagwi a ga tik ɛ.

³⁶Gbɔng gwɔ̀m rwa bato mo ê ra pyɛ́ de yey mɛ ye simo. Ê dak kaa wɔgɔ, a dal cī mwa, ê ha neha neves e ra Dagwi De A Dal Na Reto Mwa. Ko ê di wɛng sɛ̌ jeng de Dagwi a to vɔk shom na bemat mɛ wɛt, yaga kayɛ pyɛ yê té tyɛng na pyɛ de Dagwi a ga yong ɛ.

³⁷Pyɛ mɛ cak ya sé na cī de bedabeda mɛ ba re a yɛ fongol tanga cī de beha be tɛ̀ yey na yɛ wɛt. Mwin, ê tɛ̀ to mɛ e ra cī mwa, bê ka nɔ̂ng cak nerey wɛt.

³⁸E tô cī mo, ê sap ci yemo de ye dulus nekwɔn dal, yemo de bedabeda mɛ ba ga sang tɔk wɛt. E nɔngɔ̂s yɛ nenɔrɔ̂ dyam shinang, na dyam pyɛng, na dyéngere ryat sizɔng tanga pyɛ́ de ya sé yê dyām pyak.

³⁹Na sɛlɛ̂ cī dyuk yemo, ê tɔk di wɛng e ra nekwɔn dal de na dal na gap. E nɔ̂ng bemat de be sap ci mɛ mo nerey, ê tɛ̀ ɛn bemat nuyêl bemat pyak, ê gas a yɛn bebak bavwel, be tɛ́ ɛn pyɔlɔ mɛn.

⁴⁰E jeng yɛnɛ mo, gbɔng gwɔ̀m rwa batin ê hwo e ra gbɔng gwɔ̀m rwa bato. Ko wo rwa bato mo ê hwo e ra yɛ na gap mɛ mwa, ê ra fwom na bekyɛkyɛ̂ bedwa, na bedwa tanga bedwa-nshi pyak, ko a rɔda yel e bavwel pyak sede tɛmɛ-nshi, ê re ɛn na como.

⁴¹A rɔda yel e ji vwel de ha dal na nerat, ko ê mɔbɔs bemat, gu e ra gu, ko BeƐdɔm na BeMowap tanga bemât nuyêl BeAmɔn bê hywit ɛn.

⁴²Gbɔng gwɔ̀m rwa bato ê re nuyel na sey ɛ bavwel pyak mwa na Misra.

⁴³A rɔda sey ɛ nedanerey hɛ ne dyam shinang na dyam pyɛng tanga bwang pyɛ́ cak de ya vɔk nerat sizɔng. A rɔda re bavwêl Libya tanga Kush na como.

⁴⁴Ko jeng de ê wok, bemât repugu yi e rwa rak na rwa bato ba yel e vwel mɛ, ê tɛ̀ shom sizɔng, ko ê toyo, na a mɔbɔs bemat pyak.

⁴⁵A rɔda tɛ̀ bǔk rat mɛ e tê Gworep Tē na Raku Siyɔn, ko ê ku, vit a mwat hwak de a rɔda sɛlɛ hɛ.