Read berom Danyɛl 2 Bible Online

Danyɛl 2 - berom bible

Danyɛl 2

¹E shey he neba hê negwɔm mɛ, Nɛbukadnɛzar a ranas negwi, Negwi o na bɔrɔk hɛ sizɔng ko a tɔk to wɔ nevwa wɛt.

²A tomo be vey a yɛ na bemât vô redu, vɛ à bemât tô bes, na vê vyoshon, na bemat de ba tɔk pyɛ́ de ya sé e lɛrɛ, na be misang a yɛ negwi o. Jeng de ba vey e nuyel mɛ,

³a yang ɛn, “Ma ranas negwi de na bɔrɔk me sizɔng. Me simo, me tɔk cap-hâ nɛ.”

⁴Yɛn a hanat a Da Vwel e lêm BeAram, ba ye, “Neken mō ne ros, à darwey! Há a wot negwi mō, ko wot a rɔda misang a hwo cap-hâ nɛ.”

⁵Da Vwel o a toyo a yɛn, a ye, “Ma ga tik ɛ, ka sede yin a ha a me negwi o, na yin to misang a me cap-hâ nɛ wɛt, ko mê tɛ̀ be kangat hin bagap o bagap o, na be tɛ̀ nelɔ min ne tɛ́ ɛn barin.

⁶Ko ka yin a tɔk ha a me negwi o na cap-hâ nɛ, mê tala hin gbɔng pyɔlɔ, mê gwɛ̌ a yin nerey. Remo, há in a me negwi o na cap-hâ nɛ.”

⁷Yɛn a to hanat a yɛ, ba ye, “À darwey, ka hwà tɔk ha a wot negwi o zɔng, wot a rɔda misang a hwo.”

⁸Da Vwel a toyo a yɛn, a ye, “Ma ga sè na ha a! Yin a sé simo, yin a re jeng, yaga yin a ga tɔk pyɛ de ma ga tumal ɛ.

⁹Ka sede yin a ha a me negwi o wɛt, mê tabak hin tyɛng na pyɛ de ma ga ha. Yin a ga wuna nu, na yin kwɛlɛng me na neha bɔs. Yin e gyeng kɛ pyɛ cak yê sege hɛ. A remo, há in a me negwi o. Ano ma rɔda tɔk, yin ê tɔk misang cap-hâ nɛ arɔng.”

¹⁰Bemât tɔk pyɛ́ de ya sé e lɛrɛ ba toyo a yɛ, ba ye, “À darwey, vit a mwat hwak e ji jey, de ê kyɛm a ha a hwo pyɛ de hwó simo hwo tɔk! Vit a Da Vwel hwak, ka a ka dal na nerey, a to vɔk reto de ra dal mwa, de a ga sang rangal rangal yerê hemo na bemât tô bes kɛ vê vyoshon, kɛ bemât tɔ́k pyɛ́ de ya sé e lɛrɛ.

¹¹À darwey, pyɛ de hwà sé rangal ya sé gbang sizɔng, ko vit a mwat hwak de ê kyɛm a ha a hwo yɛ sɛ̌ cī, ko ya sé sangal e tê bemasi wɛt.”

¹²Jeng de Da Vwel a wok ha mɛn, shom mɛ ya sogo, ko a nɔng nu, be mɔbɔs mwa bemât badu Da vwel Babilɔn.

¹³Ba jɛk, ba tomo na redu mo, ko ba jama Danyɛl tanga besa me arɔng, na be mɔbɔs hɛn.

¹⁴Ariyɔk á sè wo nuyel bemat gyêng Da Vwel, yɛ de ba ga nɔng ɛ nû mɔbɔs o. Danyɛl a wɔ na yɛ, a yong neha mɛ naka,

¹⁵a rangal hɛ tîn pyɛ de ya tɛ̀ Da Vwel o a nɔng redu pɛp ano. Ko Ariyɔk a ha a Danyɛl mwa pyɛ de ya té.

¹⁶Ko Danyɛl a pere kyè wɔ na Da Vwel o, a ra won na yɛ, a nɔng ɛ jeng, na a bin vey ha a yɛ cap-hâ negwi o.

¹⁷A toyo vɔk e lɔ, ko a ha a besa mɛ, Hananiya, na Mishayɛl tanga Azarya pyɛ de ya ga té.

¹⁸A yang ɛn, “Ra in won na Dagwi de a re negwɔm yi e lagwi, na a tosho reyɔm mot, na a bin misang pyɛ́ de ya sé e lɛrɛ na wot. Ano de bê mɔbɔs hot tanga bwang bemât badu mo e Babilɔn wɛt.”

¹⁹Ko e turuk hane mo, Dagwi a dura a Danyɛl e ji negwi-ywey pyɛ́ de ya sé e lɛrɛ e ji negwi o. Ko Danyɛl a nɔ̂ng Dagwi de e re negwɔm yi e lagwi nerey, a ye:

²⁰“Dagwi a vɔk tɔ́k na reto! Nɔng in hɛ nerey gbak-gbak.

²¹Yɛ wɛ a vɔk jeng e vwɔ mɛ, e tɛ̀sɛ a begbɔng begwɔ̀m negwɔm, e yɛ arɔng de e losol begbɔng begwɔ̀m. E yɛ de e nɔngɔs tɔk na bemat de ba tɔk pyɛ́, e nɔngɔ̂s vê netsitsɛng netsitsɛng.

²²E kulsa pyɛ̂ lɛrɛ de ya dal na negbang, a tɔk pyɛ́ de ya sé e lɛrɛ e ji lwil, ko negbey na rɔnɔ hɛ.

²³À Dagwi wo bedabeda hom, ma feng a hwo, me somo hwo, hwà ga nɔng me tɔk na gap, hwà ga dura a me pyɛ de wot a rangal hwo. Ey, hwà ga dura a wot pyɛ de ye bɔrɔk Da Vwel.”

²⁴Danyɛl a toyo vɔk na Ariyɔk de ba ga kana nɔng ɛ nû mɔbɔs bemât badu Da Vwel, a yang ɛ, “Hwo mɔbɔs bemat vane wɛt! Wɔ na me na Da Vwel, ko ma rɔda misang a yɛ cap-hâ negwi mɛ mo.”

²⁵Sana lashê jeng, Ariyɔk a wɔ́ na yɛ e nuyel Da Vwel o, ko a ha a yɛ, a ye, “À darwey, ma ga sɛ̀ gwining e ji BeYuda de ba sé e sesam de ê tɔk misang a hwo negwi mō.”

²⁶Da Vwel o a yâng Danyɛl de be to yila hɛ à Bɛltɛshazar, “Hwô kyɛm hwo ha a me negwi o na cap-hâ nɛ a?”

²⁷Danyɛl a toyo a yɛ, a ye, “À da, vit a mwât netsitsɛng, vit a mwat tô bes kɛ vwoshon hwak, vit a mwat de a tɔk pyɛ́ de ya sé e lɛrɛ de ê tɔk ha a hwo pyɛ de hwó simo.

²⁸Ko Dagwi de e re negwɔm yi e lagwi e tɔk kulsa pyɛ́ de ya sé e lɛrɛ. A ga dura a hwo, à da, pyɛ de ya sé kyè wɔ̀ tɛ́ e ngamo nuyel. A remo, ma rɔda misang a hwo pyɛ de hwà di jeng de hwà sè e ji nevwa:

²⁹À da, jeng de hwá sè e dyɛngɛ, hwá sè bare e ra pyɛ de ye kyè wɔ̀ té e ngamo nuyel. Ko Dagwi de e kulsa pyɛ́ de ya sé e lɛrɛ a ga dura a hwo pyɛ de ye kyè wɔ̀ té.

³⁰Ko di, ba ga kulu a me cap-hâ pyɛ́ mo, yaga ma dal mwat hwak na tɔk wɛt, ko yaga na be misang a hwo negwi o, na hwo bin tɔk pyɛ́ de ya bɔrɔk hwo.

³¹“À da, pyɛ de hwà di e nuyel mō e ji negwi o ya sè ngan: Hwà di pyɛ cak ryey o sedesi sede mwasi e tumal. Ya nɛp, ya tē dyɛ̌t, ko ya sé pyɛ bengyip sizɔng.

³²Ba yong tô yɛ na celes dyam shinang, ragey o na vɔ mo ba yong vɛ na dyam pyɛng, rawit tanga tà mo ba yong na dyam pama,

³³bekwɔrɔ mo na dyam ko bol o ba yong bak o hwak na dyam ko hwak na secwem de ba ga rang.

³⁴“Ko jeng de hwà sè bɛrɛng o, gbogolok, gwofwa gwa pere takla ngan zɔng yi e raku. Gwa hwo e ra bol o, ko gwa bunut dyam o tanga secwem o.

³⁵E bama mo, gwa bunut dyam, na secwem, na pama, tanga dyam pyɛng na dyam shinang puruk. Ya tɛ́ ɛ fongol, ko gul gwa pere rungta mwa hywiri sede byɛmɛ e gazu. Ko gwofwa de gwa takla mo gwa tɛ́ ɛ gbɔng raku de wa sila jey mwa.

³⁶“Negwi a nane, à darwey. A remo, mê ha a hwo cap-hâ nɛ:

³⁷Hwà sé Da Vwel de hwà dal mwa bedâ bavwel, ko Dagwi de e re negwɔm yi e lagwi a ga nɔng o segwɔm na reto, na gap tanga nerey.

³⁸A ga tɛ̀ o e ra mwa bemat, na ngyāma tanga benon. E hwo wɛ à tô dyam shinang pyɛ yane mo!

³⁹E bamâ segwɔm mō, bê to sɛ̀ hak de hê vey nerêy mó wɛt. E bama mo, bê to ra segwɔm o sê netat, sɛ à sê dyam pama, sê ye màk a jey mwa.

⁴⁰E bama mo, bê sɛ̀ segwɔm sê nenaas de sa sé gbarak sede dyam. Sê bunut mwa segwɔm de sa kana se.

⁴¹Hwà di bol o tanga beken bol o de ba yong bak o hwak na dyam ko hwak na secwêm rang. Hemo he dura, segwɔm o sê gas ɛ. Mwa ano, sê vɔk gâp dyam, yaga ba wuna dyam tanga secwem.

⁴²Ko beken bol o de ba yong bak dyam tanga secwêm rang — hemo he dura, bak o hwak wô vɔk gap, ko hwak wô sè gbɛrɛk.

⁴³Wunâ dyam tanga secwem ha vɔk gap wɛt. A sé ano na segwɔm de sa gas ɛ, begbɔng begwɔ̀m o bê wuna bato mɛn e râ neweneng. Ko wuna hemo mo hê vɔk gap wɛt.

⁴⁴“E jeng begbɔng begwɔ̀m vane mo, Dagwi de e re negwɔm yi e lagwi ê tɛ̀ segwɔm de bê tɔk gang sɛ wɛt. Vit a mwat de ê re sɛ na como, sê wey na bwang begwɔ̀m o. Ko sɛ, sê nàra gbak-gbak.

⁴⁵Hwà di gwofwa de gwa pere takla ngan zɔng yi e raku, gwa pe bunut pyɛ de ya sé sede mwasi de ba yong na dyam, na dyam pama, na secwêm rang, na dyam pyɛng tanga dyam shinang. E gwɛ de gwa sé e tô segwɔm de be gang sɛ wɛt. À da, Dagwi wo nerey a ha a hwo e ji negwi mō pyɛ de ye kyè wɔ té e nuyel, ko hwô tɔk sey cap-ha mo, ha sé tsak o.”

⁴⁶Da Vwel Nɛbukadnɛzar a gaba e cât bol Danyɛl. E bama mo, a nɔng nu, be rangas pyɛ̂ nesang hyɔɔlɔl, be nára nɔrɔ̂ nemuk, na be nɔng mɛ Danyɛl nerey.

⁴⁷A yang ɛ, “A remo ma tɔk, Dagwi min yɛ wɛ a dal cī tanga begbɔng begwɔ̀m mwa na nerey, yaga a nɔng o reto, na hwo misang a me pyɛ́ de ya sé e lɛrɛ.”

⁴⁸A nɔ̂ng Danyɛl nenɔrɔ nerat, ko a tɛ̀ ɛ gwɔmna bak vwêl Babilɔn, na mwât nuyêl bemât badu lɔ mɛ.

⁴⁹Danyɛl kwong a ra won na yɛ, na a tɛ̀ Shadrak, na Meshak tanga Abɛt-Nego be tɛ́ ɛn bemât kyé na tom bak vwêl Babilɔn, ko yɛ Danyɛl ê re nuyel e fwôm lɔ Da Vwel o.