Read berom Danyɛl 3 Bible Online

Danyɛl 3 - berom bible

Danyɛl 3

¹Da Vwel Nɛbukadnɛzar a tɛ̀, be yong pyɛ cak sede mwasi na dyam shinang, nelis yɛ sede mita kuru batat, netes o sede mita betat. A tɛ̀ yɛ e Tyɛl Dura e bak vwêl Babilɔn.

²Ko a tomo be yila a yɛ mwa begwɔmna, na begbɔng begwɔ̀m, na bedagwɔm, na bemât vo redu, na bemât gban dyām, na bemât shɔt tanga mwa bwang bemât nuyêl fwom bebak bavwel o, be vey, yaga nzem tik pyɛ mo de a ga tɛ̀.

³Yɛn a vey mwa, ko ba tumal e nuyel yɛ.

⁴Mwât mok a mokla na gbɔng fwɔ, a ye, “À yin bemat yi e kayɛ yerê bemât jey na yére bemasi yi e karɛ relem, wok in redu remo:

⁵Yin a rɔda wok bedurum, na jū, na yōm na kayɛ yére pyɛ̂ lwɛlɛ. Ras de yin a wok, yin gaba e cat bol pyɛ mo de Da Vwel Nɛbukadnɛzar a tɛ̀, na yin re a yɛ fongol.

⁶Mwa mwat de ê kyɛ́ ɛ nà gaba e cat bol yɛ, na a re a yɛ fongol, bê pere barak hɛ e ji kyâ gwogbɔng gwofwam-ju.”

⁷Ano kwong, ras de bemat o ba wok bedurum, na jū, na yōm na kayɛ yére pyɛ̂ lwɛlɛ, ba gaba e cât bol pyɛ mo, ba re a yɛ fongol.

⁸E jeng o, BeBabilɔn behak ba sɛ̀ gwong de bê tɛ̀ kûn BeYuda.

⁹Ba yâng Da Vwel Nɛbukadnɛzar, “À darwey, neken mō ne ros!

¹⁰E hwo wɛ, à darwey, de hwà nɔng redu wɔgɔ, ras de ba wok pyɛ̂ lwɛlɛ, kawɛ mwat ê gaba e cât bol pyɛ de ba yong na dyam shinang, na be re a yɛ fongol.

¹¹Hwà to ye, kawɛ de ê kyɛ́ ɛ nà gaba e cât bol yɛ, na a re a yɛ fongol, bê barak hɛ e ji kyâ gwogbɔng gwofwam-ju.

¹²À darwey, hwà tɛ̀ BeYuda behak be kyè na tom e bak vwêl Babilɔn, yɛn à Shadrak, na Meshak tanga Abɛt-Nego. Ko di ba kyɛ́ ɛn nà wet betong na redu mō. Yɛn a re a cī mō fongol, ko ba kyɛ́ ɛn nà gaba e cât bol pyɛ de hwà tɛ̀ mo.”

¹³Jeng de Da Vwel o a wok ano, shom mɛ ya ye puu, ko a nɔng nu, be vey na bemat betat o e nuyel mɛ. Ba vey na yɛn,

¹⁴ko a yang ɛn, “Hwò Shadrak, na Meshak tanga Abɛt-Nego, a sé mwin de yin a kyɛ́ in nà re a cī hom fongol, na yin gaba e cât bol pyɛ de ma tɛ̀ a?

¹⁵A remo, mê tik in e hemo, ka sede yin a wok bedurum, na jū, na yōm na kayɛ yére pyɛ̂ lwɛlɛ, gaba hin e cât bol pyɛ de ma tɛ̀, na yin re a yɛ fongol, ko yin ê pɔl tyang. Ko ka yin a ra ano wɛt, bê barak hin e ji kyâ gwogbɔng gwofwam-ju, vit a lashê jeng. Vit à dagwi hwak de ê sey in yi e vwɔ hom!”

¹⁶Ko Shadrak, na Meshak tanga Abɛt-Nego ba hanat, ba ye, “À darwey, wot ê ka ha há hak, na wot a dul mɛ bato mot wɛt.

¹⁷Dagwi de wot e raa ê tɔk sey ot yi e ji kyâ gwogbɔng gwofwam-ju mo, mwa yi e reto de hwà vɔk.

¹⁸Ka ê ka sey ot wɛt, à darwey, tik na hwo tɔk, wot a rɔda re a cī mō fongol kɛ wot ê gaba e cât bol pyɛ de ba yong na dyam shinang de hwà tɛ̀ wɛt.”

¹⁹Nɛbukadnɛzar a wok shom sizɔng na Shadrak, na Meshak tanga Abɛt-Nego. A nɔ̂ng bemat mɛ nu, be rugut kya mo na nerakrak o ne gwɛ̌ hɛn zang taama, ne dal pyɛ de ba kana tɔ́k ɛn mɛ.

²⁰A to nɔ̂ng bemat de ba dal na gap e ji bemât como mɛ nu, be rɔgɔs bemat betat vemo mo, na be barak hɛn e ji kya mo.

²¹Ano de yɛn a rɔgɔs hɛn, ba barak hɛn e ji kya mo de he lolo belem-belem, mwa na yɔ̀m de yɛn a kana tɔrɔ hɛn mɛ.

²²Sede remo de Da Vwel a ga kana nɔng nu na gap, be gwɛ̌ nerakrâk kya mo, balem kya mo ba wey na bemat de ba wɔ̀ barak hɛn e ji mo.

²³Shadrak, na Meshak tanga Abɛt-Nego ba gaba e tê kya mo e rɔgɔs.

²⁴Gbogolok, Da Vwel o a sogo hyǒt, a tumal zii, a langat hɛ. A rangâl bemât vô redu mɛ, a ye, “Me tē, e bemat betat zɔng de wot a barak e ji kya mo wɛt arɛt?” Bemat o ba hanat, ba ye, “Ey ano, à darwey.”

²⁵Da Vwel o a toyo na ha, a ye, “Ko e rɛ̌ de me bɛrɛng bemat benaas be kyè e ji kya mo ɛ? Ba sé e rɔgɔs wɛt, kya ha ka re ɛn wɛt, ko wo nenaas o a sé sede hwêy lagwi.”

²⁶Da Vwel a gwɛ̌ sek bagat wɔ̀ sɛ̀ gwogbɔng gwofwam-ju mo, a ye ngyat, a yila, “À Shadrak! À Meshak! À Abɛt-Nego! À yin besam Dagwi De A Dal Na Reto Mwa, nusu hin!” Ba nusu,

²⁷ko begwɔmna, na begbɔng begwɔ̀m, na bedagwɔm tanga bwâng bemât nuyêl fwôm Da Vwel o ba gushung hɛn, na be di, de kya ha ka mǎ hɛn wɛt. Setot rato mɛn, vit a gabîk kya, berugu mɛn, kya ha re vɛ wɛt, ko vit a nesang kyeng e ra yɛn!

²⁸E bama mo, Da Vwel Nɛbukadnɛzar a ye, “Somo hin Dagwi wo Shadrak, na Meshak tanga Abɛt-Nego de a tomo tom-lagwi mɛ, a vey sey bemat mɛ! Ba tɛ̀ gap e ra yɛ, ko ba kyɛ́ ɛn nà raa redu hom, ba ye waa a neken mɛn, a dal a yɛn, de bê re a ci cak fongol sɛ̌ Dagwi mɛn zɔng.

²⁹Yaga ano, ma sé tɛ̀ redu de ra sé yaga bemat yi e kayɛ yerê bemât jey na yére bemasi na yi e karɛ relem. Ka sede mwat hwak e ha há ves e ra Dagwi wo Shadrak, na Meshak tanga Abɛt-Nego, bê kangat hɛ bagap o bagap o, na be tɛ̀ lɔ mɛ he tɛ́ ɛ barin, yaga vit a cī de ye tɔk sey mwat e gwong gwomo.”

³⁰Ano kwong, Da Vwel a gwɛ̌ a Shadrak, na Meshak tanga Abɛt-Nego nerey e bak vwêl Babilɔn.