Read berom Danyɛl 5 Bible Online

Danyɛl 5 - berom bible

Danyɛl 5

¹Tuhak, Da Vwel Bɛlshazar, hwêy Nɛbukadnɛzar,[1] a rini gu e ji begbɔng o vê nuyel mɛ nzem, ko a sɔ nshî anap tanga yɛn. Jeng de a ga wɔt, a nɔng nu, be vey na neshǐ sɔ de ba yong na dyam shinang na dyam pyɛng de da mɛ Nɛbukadnɛzar á kana hashe yi e Gbɔng Duk Re Fongol e Yɛrusalɛm. A simo, yɛ tanga bemat mɛ, na beha mɛ tanga bejɛn beha mɛ, be sɔ nshî anap na nɛ.

³Jeng de ba vey na neshǐ dyam shinang o mwa hɛn ba sɔ nshî anap e ji nɛ.

⁴Ba sɔ ko ba somo cī de ba yong na dyam shinang, na dyam pyɛng, na dyam pama, na dyam, na cɔgɔt tanga gwofwa.

⁵Gbogolok, ba pere di vwɔ̂ mwasi gwo jɛk e ra vwarâ duk lɔ gwɔ̀m bagat na pyɛ tikîs kywa-kya. Ko Da Vwel o a di vwɔ de gwa sé jɛk.

⁶A tɛ̀ bengyip, bwang bayis mɛ gwa doyo hɛ, bol mɛ ba rɛ̌, ko bakwot mɛ ba tɛs bemɛn.

⁷A yila na gbɔng fwɔ, be vey a yɛ na bemât tô bes na vê vyoshon tanga bemat de ba tɔk pyɛ́ de ya sé e lɛrɛ. Jeng de ba vey, a yang ɛn, “Mwa mwat de a basa a me basa hemo, na a ha a me cap-hâ hɛ, ê tɛ́ ɛ́ wo netat e ji negwɔm bavwel o. Ba rɔda tɔrɔ hɛ na gworugû negwɔm gworwat, ko bê tɛ̀ a yɛ lwɛlɛ̂ fwɔ gwô dyam shinang.”

⁸Bemât vo a Da Vwel o redu ba vey, ko vit a hwak de a tɔk basa jɛk o, kɛ a misang a yɛ cap-ha mo.

⁹Da Vwel o a gwɛ̌ tɛ̀ bengyip ding-ding, ko bwang bayis mɛ ba gwɛ̌ doyo hɛ. Bemât nuyel mɛ arɔng, a sé a yɛn kpɔrɔk.

¹⁰Neng-gwɔ̂ Da Vwel o a wok neha hwey mɛ na bemât nuyel mɛ, ko a yel e lɔ̂ nzem o, a ye, “Neken mo ne ros, à darwey! Hwo kwon tik na pyɛ yemo ye bɔrɔk hwo, na bwang bayis mo gwo doyo hɛ wɛt.

¹¹Mwat hwak a sé e ji sevwel mō de a vɔk gabîk cī e ji mɛ. Jeng de da mō Nɛbukadnɛzar á sè re negwɔm, mwat wane a vɔk tɔ́k na netsitsɛng de na sé sede ne cī. Da mō a tɛ̀ ɛ gwɔ̀m mwa bemât vyoshon na vê tô bes, na bemat de ba tɔk pyɛ́ de ya sé e lɛrɛ.

¹²Be tang mwat o à Danyɛl, ko da mō a vo a yɛ rezâ Bɛltɛshazar. A vɔk tɔk na netsitsɛng zɔng wɛt, ko a tɔk misâng negwi, e misang neha de na kwey cik wɛt, ko e misang pyɛ́ de ya sé e lɛrɛ. Tomo, be yila hɛ. A rɔda misang a hwo pyɛ́ de ya sé e jɛk o.”

¹³Ba pere vey na Danyɛl e nuyel Da Vwel, ko Da Vwel o a yang ɛ, “Ko sɛ̌ hwo wɛ à Danyɛl WoYuda de da hom a vey mɛ yi e sevwêl Yuda!

¹⁴Ma ga wok, gabîk cī ha sé e ji mō, ko hwà sila na tɔk na netsitsɛng.

¹⁵Ba ga vey na bemât vo redu na bemât tô bes, na be basa jɛk hemo, be ha a me cap-hâ hɛ, ko ba tɔk wɛt.

¹⁶Ko ma wok, hwó tɔk ra hwâl pyɛ́ de ya sé gbang, hwó tɔk misang pyɛ́ de ya sɛ́ e lɛrɛ arɔng. Ka sede hwà tɔk basa a me jɛk hemo, na hwo ha a me cap-hâ hɛ, hwô tɛ́ o wo netat e ji segwɔm bavwel o. Ba rɔda tɔrɔ hwo na gworugû negwɔm gworwat, ko bê tɛ̀ a hwo lwɛlɛ̂ fwɔ gwô dyam shinang.”

¹⁷Danyɛl a toyo a yɛ, a ye, “À darwey, vɔk nenɔrɔ mō kɛ hwo nɔng rɔ̀n ow. Ko ma rɔda basa a hwo pyɛ de ba jɛk, na me ha a hwo cap-hâ yɛ.

¹⁸Dagwi De A Dal Na Reto Mwa a tɛ̀ da mō Nɛbukadnɛzar gbɔng Da Vwel de a vɔk nerey na gbɔng nerat.

¹⁹Yi ano, bemat e mwa yére bemât jey na yére bemasi de be ha balem detidetu ba vow e nuyel mɛ. Sede a simo ê wey na mwat, ê wey mɛ zɔng, ko mwat de e simo tik ɛ kwen ê tik ɛ kwen. Sede a simo, ê tɔk nɔ̂ng mwat nerey kɛ ê lol a mwat nerey ow.

²⁰Ko jeng de a hwo tos to mɛ, a tɛ̀ yey mɛ gbarak, ba pat ɛ yi e negwɔm o, ba gas ɛ na nerey mɛ.

²¹Báre mɛ ha tɛ́ ɛ sede hê ngyama, ko ba ró ɛ yi e ji bemasi, a sangal na bemadung hey, a re sɔng sede rɔndɔng, a pɔlɔs e tê-dyɛng, kwɔn de mwɛngɛ gwa gabsa e ra yɛ. A re nuyel e ji negwɔn nemo mo sɛ̌ jeng de a tɔk, Dagwi De A Dal Na Reto Mwa, yɛ wɛ a vɔk mwa segwɔm jey e vwɔ mɛ, ko e kasa bemat de bê re negwɔm o.

²²“Ko hwo sɔ mɛ, à Da Vwel Bɛlshazar, hwà tɔk pyɛ́ yemo mwa, ko hwà dyɛng to mō wɛt.

²³Hwà ga ra a Darwey de e re negwɔm yi e lagwi, hwà jut neshǐ sɔ yi e Gbɔng Duk Re a yɛ Fongol. Hwo na bemât nuyel mō, na beha mō tanga bejɛn beha mō, yin a sɔ ɛ nshî anap, ko yin a somo cī de ba yong na dyam shinang, na dyam pyɛng, na dyam pama, na dyam, na cɔgɔt tanga gwofwa. Yɛ a pyɛ́ de ye tɔk bɛrɛng kɛ wok wɛt, ya tɔk pyɛ cak wɛt. Ko hwà nɔ̂ng Dagwi de a vɔk neken mō e vwɔ mɛ nerey wɛt, yɛ de e kyè na hwo.

²⁴Yaga ano de a tomo vwɔ gwomo gwo jɛk e ra vwarâ duk.

²⁵“Batîn ha de gwa jɛk vɛ à: MENE MENE TEKEL U-FARSIN.

²⁶Cap-hâ batîn ha ma vemo ngan: “MENE wɔgɔ, Dagwi a ga bara nepɔlɔ̂ segwɔm mō, na ga tala hɛn.

²⁷TEKEL wɔgɔ, a ga mara hwo e ra pyɛ mara, ko hwà ga radɛ hwo.

²⁸U-FARSIN wɔgɔ, a ga gas segwɔm mō, ko a ga nɔng sɛ na BeMedya tanga BePɛrsya.”

²⁹Bɛlshazar, a pere nɔ̂ng bemât fwom mɛ nu, be tɔrɔ Danyɛl na gworugû negwɔm gworwat, na be tɛ̀ a yɛ lwɛlɛ̂ fwɔ gwô dyam shinang, ko a tɛ̀ ɛ wo netat e ji segwɔm bavwel o.

³⁰Naturuk nane mo, ba mɔrɔ Bɛlshazar, Da vwel Babilɔn,

³¹ko Dariyus WoMedya a sey ɛ segwɔm o. E jeng o, a vɔk neshey kuru batyiimin na nɛ neba (62).