Read berom Danyɛl 6 Bible Online

Danyɛl 6 - berom bible

Danyɛl 6

¹Dariyus a di a jam a yɛ, na a gas sevwel mɛ e bebak vwel naga na kuru baba (120), ko a tɛ̀ begwɔmna e kawɛ bak vwel o.

²A to tɛ̀ bemat betat de bê vɔk reto e ra begwɔmna mo, yaga na be dul pyɛ vyes cak de yê lashe Da Vwel o. Danyɛl á sè hwak e ji betat o.

³Danyɛl a dura tɔ̂k râ fwom de ha dal hê bwang beba mo tanga begwɔmna. Yaga ano, Da Vwel a yong ɛ, na a tɛ̀ ɛ a sè wo bɛrɛng mwa neyɛnɛ segwɔm mɛ.

⁴Yi ano, bwang beba vane mo tanga begwɔmna ba ye ngyɛ́k, na be sɛ̀ buru na Danyɛl e ji fwom mɛ. Ko ba sɛ̀ pyɛ cak wɛt, yaga a ra fwom mɛ na tsak o, vit a hɛ na buru kɛ nemùt.

⁵E yɛnɛ mo, yɛn a yâng bemɛn, “Wot ê sɛ̀ pyɛ cak de wot ê tɛ̀ mɛ sekûn Danyɛl wɛt, sɛ̌ wot a jama hɛ na nɛn e raà negwɔn Dagwi mɛ.”

⁶Ano kwong, ba wuna to mɛn, ba wɔ́ e nuyel Da Vwel, ba yang ɛ, “Neken mō ne ros, à Da Vwel Dariyus!

⁷Mwa wot bemat de ba vɔk reto e ra begwɔmna, na begwɔmna, na begbɔng begwɔ̀m, na bedagwɔm tanga bwang bemât nuyêl fwom mō wot a ga simo, a jam na hwo tɛ̀ redu de bê tɛ̀ rɛ re se gbing-gbing. À darwey, tik hwo nɔng redu wɔgɔ, a sé kyiri na mwat a ra won na cī kɛ mwat ayi sɛ̌ na hwo zɔng nepɔlɔ kuru batat. Kawɛ mwat de a gyili redu remo, tik be barak hɛ e ji revɔng begukum.

⁸Tɛ̀ be jɛk redu mo, na hwo tɛ̀ vwɔ. Ano be tɔk sege rɛ wɛt, sede remo de be tɔk sege redu BeMedya na BePɛrsya wɛt.”

⁹Da Vwel Dariyus a tɛ̀ be ra ano, ko a tɛ̀ vwɔ mɛ e ra redu mo.

¹⁰Sede Danyɛl a wok, Da Vwel a ga tɛ̀ vwɔ e ra redu mo, a kyè vɔk e lɔ. E duk rak o wo lɔ mɛ, bapɔk ba sɛ́ de be bɛrɛng wɔ sɛ̀ Yɛrusalɛm. A ye guduruk e vwel, bapɔk e wunta, ko a ra won, a somo Dagwi, sede remo de a ga kana tɔ́k ɛ mɛ zang tat e tuk hining.

¹¹Bemât repugu mɛ ba vey, ba sɛ̀ ɛ a sé ra won, a jama sɛlɛ na Dagwi mɛ.

¹²Mwa hɛn ba toyo wɔ na Da Vwel, ba yang ɛ, “Neken mō ne ros! À Da Vwel, hwà ga tɛ̀ vwɔ e ra redu wɔgɔ, a sé kyiri na mwat a ra won na ci kɛ na mwat ayi sɛ̌ na hwo zɔng nepɔlɔ kuru batat wɛt arɛt? Ko ka ano wɛt, bê barak hɛ e ji vɔng begukum wɛt arɛt?” Da Vwel a hanat, a ye, “Ey, redu mo ra sé ano, tyɛng na badu BeMedya na BePɛrsya, vit à sege.”

¹³Ano kwong, yɛn a yâng Da Vwel, “À darwey, mwat womo, Danyɛl, gwining e ji besam de ba hashe yi e Yuda, e kyɛ́ ɛ nà nɔng o nerey, ko e gyeng redu de hwà tɛ̀ vwɔ mō wɛt. E ra a ci mɛ won kayɛ jeng zang tat tuk hining.”

¹⁴Jeng de Da Vwel a wok ano, yey mɛ ya beseng hɛ. A simo a sey Danyɛl, ko a wosho e de jamâ begwong o vɔk e gabâ gwi.

¹⁵Jeng de gwi gwa gaba, bemat vane mo ba toyo na Da Vwel, ba yang ɛ, “Neken mō ne ros, à darwey. Hwà tɔk, e ra badu vê BeMedya na vê BePɛrsya be tɔk sege redu kɛ kyìri de Da Vwel a tɛ̀ vwɔ mɛ wɛt.”

¹⁶Ano kwong, Da Vwel a nɔng nu, be vey na Danyɛl, na be wɔ̀ barak hɛ e ji revɔng begukum! Ko a yâng Danyɛl, “Tik na Dagwi de hwo re a yɛ fongol na tsak o, a sey o.”

¹⁷Ko ba vey na gwofwa, ba bang mɛ nû revɔng o. Da Vwel kwong a rusu ɛ tô-gwɔ̀m mɛ na hê bemât vô redu mɛ. Yi ano, vit a mwat de ê tɔk sey Danyɛl.

¹⁸E bama mo, Da Vwel a toyo wɔ e lɔ mɛ, ko a re pyɛ́ wɛt, a simo mwat hwak a yel na yɛ wɛt, a pɔl bɛɛ̀ jey.

¹⁹Ras de gasi ha ye gbey, a sogo, a kyè dey-dey vɔk e revɔng begukum o.

²⁰Sede a vey bagat, a yila na yêy lashe, a ye, “À Danyɛl, sam Dagwi wo neken! Dagwi de hwó re a yɛ fongol na tsak o a ga kyɛm a sey o yi e begukum o bɛ?”

²¹Ko Danyɛl a hanat, a ye, “Neken mō ne ros, à darwey!

²²Dagwi a tɔk, vit a me na renɛn, ko a tomo tom-lagwi mɛ, na a bang nenu begukum o, ko ba tɔk mǎ mɛ wɛt. Ma ga sang buru a hwo na pyɛ cak arɔng wɛt, à darwey.”

²³Da Vwel o a sila na yey pyɛng sizɔng, a nɔng nu be pat Danyɛl yi e ji revɔng o. Ba pat ɛ, ko ba di vit a ram e rebek mɛ ko tyɔng, yaga a tɛ̀ gap mɛ e ra Dagwi mɛ.

²⁴Ano kwong, Da Vwel a nɔng nu, be vos mwa bemat de ba tɛ̀ kûn Danyɛl o, ko ba barak hɛn, yɛn na beha mɛn na nèy mɛn e ji revɔng o. Gyam be wul tîn revɔng o, begukum ba hwo e ra yɛn, ba kwɔrɔs bekup mɛn cɛk o cɛk o.

²⁵Da Vwel Dariyus a jɛk bwok-rwang vɔk na bemat e mwa yére bemât jey na yére bemasi de ba sé sangal e ji jey mwa. Ba jɛk gwɛ e balem detidetu ngan: “Ma mok a yin netyang na rê nuyel!

²⁶“Ma sé nɔng nu wɔgɔ, mwa e neyɛnɛ̂ bavwel segwɔm hom, gbing-gbing kawɛ mwat a tele hɛ Dagwi wo Danyɛl, ko a nɔng ɛ nerey arɔng. “Yɛ a sé Dagwi wo neken, ê nàra nesheneshey. Bê sang wey na segwɔm mɛ wɛt, ko reto mɛ rê nàra gbak-gbak.

²⁷E seres bemat, e tɛsɛ hɛn washak, e ragas pyɛ̂ langat na yê bes e lagwi na e jey arɔng. E yɛ de a sey Danyɛl yi e nû begukum.”

²⁸Mwa pyɛ́ ya kyè a Danyɛl tyang e jeng de Dariyus á sè Da Vwel, na e jeng Kɔrɛsh WoPɛrsya arɔng.