Read berom Danyɛl 7 Bible Online

Danyɛl 7 - berom bible

Danyɛl 7

¹E shey hê susu de Bɛlshazar á sè Da vwel Babilɔn, Danyɛl a ranas negwi, ko a di pyɛ cak e negwi-ywey, jeng de á sè e dyɛngɛ naturuk. A jɛk negwi o, ko pyɛ ma yemo:

²E ji turuk hane mo, ma di gul gwo pɛsɛl yi e mwa rǎ gùl naas, nshî gwogbɔng gworep na tē gundus.

³Bèngyama benaas ba nusu yi e ji nshi mo. Kagwɛ mo gwa sè detu.

⁴Gwo mɛsɛng gwa sé sede gukum, ko gwa vɔk bafabâk kim. Jeng de má sè bɛrɛng, ba pere lut vɛ. Ba tɛ̀ gwongyama mo gwo tumal e ra bol ba sede mwasi, ba nɔng gwɛ bare yerê hê mwasi.

⁵Gwongyama mo gwo neba gwa sé sede beyar e tumal e ra bol bamâ gwɛ. Gwa vɔk bekuhagat betat e tê yìn gwɛ, ko ba yang gwɛ, “Ci mɛ! Rē mwa banama de hwô sɛ̀!”

⁶E bama mo, ma di gwongyama mo gwo netat de gwa sé sede cwey. Gwa vɔk bafabak banaas e ra mâ gwɛ sede vê benon, ko gwa vɔk bato banaas. Ba nɔ̂ng gwɛ gbɔng reto.

⁷E tala mo, ma di gwongyama gwo nenaas de gwa nusu. Gwa sé pyɛ bengyip na pyɛ té lot, ko gwa vɔk gap hyiw. Yìn gwɛ ba sé rey o ve dyam, gwa tangal mɛ kayɛ pyɛ de gwa sɛ̀. Pyɛ́ de gwa re wɛt, gwa bɔrɔs yɛ. Gwa sé detu na bwang betat o, ko gwa vɔk ngɛngɛ kuru.

⁸Jeng de má sè bɛrɛng ngɛngɛ mo, ma vɛ̌ di kengɛngɛ ka sé ta e tê vɛ̀. Ko ba lut ngɛngɛ mo tat e ji kuru de ba kana sɛ gyam. Kengɛngɛ kemo mo ka vɔk bayis sede mwasi na nu de ka dak mɛ kaa.

⁹Sede má sè bɛrɛng, ma di ba tɛ̀ beta negwɔm e kwɔn vɛ. Mwakûk bemakuk a sangal e ra gwining e ji mo, berugu mɛ ba pɛngɛ sede nemuk-fwala, tôt rato mɛ ha pɛngɛ sede kugul, gwofwa negwɔm mɛ gwa tɛ̀ balêm kya, ko bol gwofwa mo de gwa sé sede bol kyɛkyɛ, ba tē bwerep.

¹⁰Balem kya ba tele sede rɔt yi e nuyel mɛ. Regyɛng bemat de ha tɔk basa vɛ wɛt, ba sé e tumal e nuyel mɛ, na be ra a yɛ fwom. Ko bemât shɔt ba sangal, ba wunta bebok-basa.

¹¹Ma re nuyel na bɛrɛng o, na me di pyɛ de yê sɛ̀ kengɛngɛ de ke ha ke dak kaa. E ji bɛrɛng o, ma di, ba mɔrɔ gwongyama gwo nenaas o, ba barak e ji kya, ba wey na gwɛ.

¹²Ko bwang bèngyama mo, ba sey ɛ retô vɛ, ko ba simo a vɛ, be re nuyel na sangal vɔk e jeng de bê yɛrɛ a vɛ.

¹³E bama mo, ma di e negwi-ywey naturuk hane mo, pyɛ cen cak sede mwasi. A sé kyè vey, bale ba gwɔrɔ hɛ, ko ba wɔ́ na yɛ na Mwakûk bemakuk o.

¹⁴Mwakûk bemakuk o a tɛ̀ ɛ a sè gbɔng gwɔ̀m, ko a nɔng ɛ reto na gbɔng nerey, yaga na mwa bemât yére bemât jey na yére bemasi de be ha balem detidetu be ra a yɛ fwom. Reto mɛ rê nàra gbak-gbak, bê sang wey na negwɔm mɛ wɛt.

¹⁵Me, Danyɛl, ma tɛ̀ bengyip sizɔng, yey hom ya bɔrɔk hɛ, yaga pyɛ́ de ma di e negwi-ywey.

¹⁶Ma wɔ na gwining e ji vemo de ba sé e tumal e hwomo, ma ra won na yɛ, na a misang a me pyɛ́ mo mwa.

¹⁷“Bèngyama benaas de hwà di ba sé e tô negwɔm nenaas de na rɔda nusu e jey, hak e bamâ hak.

¹⁸Ko e yɛnɛ mo, Dagwi De A Dal Na Reto Mwa ê nɔng bemat de ba sé bemɛ segwɔm, ko bê vɔk sɛ neshey gbak-gbak.”

¹⁹Ko ma simo me gwɛ tɔk e ra gwongyama gwo naas o, de gwa sé detu na bwang betat o. Gwa sé pyɛ bengyip sizɔng na yìn dyam tanga bekwǒk bol ve dyam pama. Gwa tangal kayɛ pyɛ de gwa sɛ̀. Pyɛ́ de gwa re wɛt, gwa bɔrɔs yɛ.

²⁰Ko ma to simo na me tɔk e ra ngɛngɛ kuru e ratô gwɛ, a kat mɛ ngwɛngɛ gwining de gwa nusu e bama, ko gwa sey ɛ kwɔ̂n ngɛngɛ tat vane mo. Gwɛ a gwomo de gwa vɔk bayis na nu de ha dak kaa. E bɛrɛng hom, gwa sé sede gwa dal bwang o na nerey.

²¹Ma kana bɛrɛng ngwɛngɛ mo de gwa tó como na bemât Dagwi, gwa sè di wɛng e ra yɛn.

²²Ko Mwakûk bemakuk a vey, a yɛrɛ shɔt, ko a gang a bemât Dagwi De A Dal Na Reto Mwa segwɔm, yaga jeng ya ga vey.

²³Yɛ womo de ma rangal hɛ, a misang a me, a ye, “Gwongyama gwo nenaas o gwa sé e tô segwɔm sê nenaas de sê nusu e jey, ko sê sè detu na bwang segwɔm mwa. Sê wey na mwa yére bemât jey, sê hama yɛ ko sê bɔrɔs yɛ e vwel.

²⁴Ngɛngɛ kuru ba sé e tô begbɔng begwɔ̀m kuru de bê re negwɔm nane mo, hwak e bamâ hwak. E bama mo, hwak à gbɔng gwɔ̀m ê nusu, ê se detu na bwang vê susu mo. “A rɔda gang begbɔng begwɔ̀m betat o.

²⁵Ê ha neha repugu e ra Dagwi De A Dal Na Reto Mwa, ko ê tak a bemat mɛ. Ê ye ngyɛ́k na a wey na badu Dagwi mwa na nzem de be ra a yɛ detidetu. Bemât Dagwi bê se e nɛn mɛ neshey netat na rebit o.

²⁶E bama mo, bê ra a yɛ shɔt e hwomo e lagwi. Bê sey ɛ segwɔm mɛ, ko bê wey na yɛ hywiri.

²⁷“Dagwi De A Dal Na Reto Mwa ê de nɔ̂ng bemat mɛ segwɔm mwa yére bemât jey. Segwɔm o sê dal mwa na reto na nerey, sê nàra gbak-gbak. Bemât mwa segwɔm o bê gyeng hâ bemat mɛ mo, ko bê ra a yɛn fwom.”

²⁸Yɛnɛ̂ pyɛ́ de ma di e negwi-ywey a yemo. Me, Danyɛl, ma ye lot sizɔng, bwang bayis hom gwa pere sege hɛ, ko ma tik pyɛ́ yemo mo mwa e yey hom.