Read berom Danyɛl 8 Bible Online

Danyɛl 8 - berom bible

Danyɛl 8

¹E shey hê netat de Bɛlshazar á sè Da vwel Babilɔn, me, Danyɛl, ma di pyɛ cak e negwi-ywey.

²Pyɛ de ma di a yemo: Má sè e ji gbɔng repomô Susa e bak vwêl Ɛlam. Ma sé e tumal e hagât Rɔt Ulai.

³Ko ma hwo bɛrɛng, ma di tùruk de wa vɔk ngɛngɛ lis o ba. Gwomo de gwa dal na nelis e gwɛ de gwa tulu e bama mo.

⁴Ma bɛrɛng tùruk o wó tē doolol vɔk e rwa ta na rwa bato tanga rwa batin. Vit a ngyama cak de ya kyɛm ya tumal a wɛ, vit a pyɛ cak de yê sey yɛ yi na gap wɛ. Wa ra pyɛ de ya ta a wɛ zɔng, ko wa gwɛsɛ gap.

⁵Jeng de ma sé bɛrɛng pyɛ de ya sé té, ko gam wa pere nusu yi e rwa ta, wa tele ziri, bol wɛ ba ka ragas vwel wɛt. Wa vɔk ngwɛngɛ gwining gwô gap e tili.

⁶Wa wɔ́ bagat na tùruk de ma ga kana di e hagât rɔt, ko wa pere ye doolol na gâp wɛ mwa e ra tùruk o.

⁷Wa hwo e ra wɛ na shom de ya ga kana ye puu, wa tɛsɛ wɛ gyɛ̀k, ko wa kwɔrɔ ngɛngɛ̂ wɛ ba mo. Tùruk o vit a gap de wô ye ngyàp-ngyap. Gam o wa bomo wɛ e vwel, wa bɔrɔs wɛ, ko vit a mwat de a tɔk sey wɛ.

⁸Gam o wa gwɛ̌ gwɛsɛ gap, ko jeng de gap wɛ mo ha ga dal gap, gbɔng ngwɛngɛ mɛ gwane gwa kwɔrɔ hɛ. E tô gwɛ̀ ngɛngɛ naas ve gap arɔng ba tulu, ko ba bɛrɛng rǎ naas.

⁹Kengɛngɛ kesɛl o ka tulu yi e ji gwining, ka ras, ka tɛ́ ɛ gworwey o sizɔng. Reto wɛ wa wul rwa batin na rwa rak na wɔ sɛ̀ vwel de ha dal na nerat.

¹⁰Ngwɛngɛ mo gwa ras, gwa tɛ̀ gap, ko gwa hwo e ra bemât comô lagwi, vɛ à netangacɛn. Gwa barak netangacɛn o nehak e vwel, ko wa bɔrɔs nɛ.

¹¹Wa simo sey ɛ retô mwat nuyel bemat como lagwi o, wa toyo na nenɔrɔ̂ rangas ne kahɛ tuk de be nása a yɛ, nagasi na nahywegelek, ko wa tɛ̀ gbɔng duk re a yɛ fongol ligis. E gwông sogô nehywɛ, wa sege nenɔrɔ̂ rangas ne kahɛ tuk. Yi ano, wa wey na rê fongôl tsak o. Ngwɛngɛ mo gwa di wɛng e mwa pyɛ́ de gwa ra.

¹³Ko ma wok tom-lagwi hwak a rangal mumwɛ, a ye, “Vɔk e yɛ̌ jeng de bê ba sila pyɛ́ de ba di e negwi-ywey o ɛ? Vɔk e yɛ jeng de bê ro na nása nenɔrɔ ne kahɛ tuk ɛ? Vɔk e yɛ jeng de sogô nehywɛ hemo hê nàra arɛt? Vɔk e yɛ jeng de bê bɔrɔs bemât comô lagwi tanga Gbɔng Duk Re Fongol ɛ?”

¹⁴Ko ma wok hwak à tom-lagwi o a ye, “Gbing-gbing, nahywegelek gu rining na naga na kuru batungun (1,150) tanga negasi gu rining na naga na kuru batungun be kwey e ngyen. E bama mo, bê to be tik kwɔ̂n rê fongol o haalal.”

¹⁵Ma sé kuu me, me tɔk cap-hâ pyɛ́ de ma di e negwi-ywey o, ko gbogolok, ma di sede mwat e tumal.

¹⁶Ma wok fwɔ sede gwô mwasi yi e gurâ Rɔt Ulai, gwa ye, “À Gabriyɛl, misang a yɛ pyɛ́ de a di.”

¹⁷Gabriyɛl a hwo vey, ko ma tɛ̀ bengyip, ma vɛ̌ gaba gup. A yang me, “Hwà sé mwasi zɔng. Mwa ano, a sé naka na hwo tɔk wɔgɔ, pyɛ́ de hwà di e negwi-ywey o ya sé e ra jeng talâ jey.”

¹⁸Jeng de a sé rɔɔ ha, nehywɛ hom na ga vuru hɛ e dyɛngɛ gup e vwel. Ko a kaba me, a sogo me cik.

¹⁹A ye, “Wet betong! Ma sé ha a hwo pyɛ de ye kyè wɔ té jeng de Dagwi ê ra shôm yɛnɛ mo.

²⁰“Ngɛngɛ bà ve tùruk ba sé e tô segwɔm Medya na Pɛrsya.

²¹Gam wa sé e tô segwɔm BeGirik, ko ngwɛngɛ gap de gwa sé e tilî wɛ gwa sé e tô gbɔng gwɔ̀m wo mɛsɛng o.

²²E bamâ kwɔrɔ̂ ngwɛngɛ mo, ngɛngɛ naas ba tulu e tô gwɛ. Ba sé dura segwɔm naas, ko bê vɔk gap sede wo mɛsɛng o wɛt.

²³“Jeng de jeng negwɔm he naas o yê yɛnɛ hɛ, na jeng de neves mɛn na ga kat, hwak à gbɔng gwɔ̀m de ê paa kwas, gwɔ̀m kwɛlɛng ê nusu.

²⁴Ê vɔk reto, ko hê sè yi na gap mɛ wɛt. Ê wey na kayɛ pyɛ e gwong de ba ga sang di wɛt, ê di wɛng e kayɛ pyɛ de e ra. Ko ê wey na vemo de ba vɔk reto, mwa na bemat de ba sé vê Dagwi arɔng.

²⁵Yaga netsitsɛng neves mɛ, a rɔda di wɛng e kwɛlsɛ̂ng bwang o, ê paa kwas, ê wey na bemat pyak hák. Ê hwo e ra Gbɔng Gwɔ̀m begbɔng begwɔ̀m mwa. Jeng a yane de bê wey na yɛ, ko ê se yi na gâp mwasi wɛt.

²⁶“Pyɛ de hwà di e negwi-ywey e ra nenɔrɔ̂ rangas ne nagasi na nahywegelek ya sé tsak o. A remo, vɔk yɛ yaang e ji yey mō, yaga jeng ya rɔngɔl yikyik e ngyen de pyɛ́ yemo yê té.”

²⁷Me, Danyɛl, ma tɛ́ me gbɛrɛk, ma dyɛng na serɔ nepɔlɔ pwoy. Jeng de a yang me lɔ̀ɔ, ma sogo, ma toyo wɔ̂ fwom de Da Vwel a nɔng me, ko ma sǎ e ji bɔrɔk e ra pyɛ́ de ma di e negwi-ywey o, yaga ma tɔk cap-hâ yɛ wɛt.