Read berom Hosheya 1 Bible Online

Hosheya 1 - berom bible

Hosheya 1

¹Ha de Dagwi Darwey a ha a Hosheya Beeri jeng de Uziya, na Yɔtam, na Ahas tanga Hɛzɛkiya bá sè begbɔng begwɔ̀m Yuda, ko Yɛrɔbɔwam Yɛhɔwash á sè gbɔng gwɔ̀m Israyɛl.

²Jeng de Dagwi Darwey a hwo ha na BeIsrayɛl yi na Hosheya, a yang ɛ, “Ci wɔ̀ ra weneng devwes, na hwo tɔs nèy na yɛ, yaga bemât vwel o mwa ba sé ra nejwang, ba ga hala raà Dagwi Darwey.”

³Ano, Hosheya a ra weneng hwā de ba tang ɛ à Gɔmɛr, hwông Diblayim. Gɔmɛr o a hwo sey jim, ko a tɔ a yɛ hwey wen.

⁴Dagwi Darwey a yang Hosheya mo, “Vo a yɛ rezâ Yɛzrɛɛl, yaga ê ros wɛt na me wɔ̀ tabak lɔ Yehu, gbɔng gwɔ̀m Israyɛl yaga bemat de a mɔbɔs e Nɛk Yɛzrɛɛl. Ma sé kyè wɔ̀ wey na lɔ̂ negwɔm Israyɛl.

⁵Ko e jeng o mê wey na gâp bemât comô Israyɛl e Nɛk Yɛzrɛɛl o.”

⁶Gɔmɛr a to sey jim, a tɔ hwey hwong, ko Dagwi Darwey a yang Hosheya, “Vo a yɛ rezâ, Nevit Tɛ̂-Yey yaga mê to tɛ̀ yey na BeIsrayɛl kɛ me hala a yɛn neves mɛn wɛt.

⁷Ko mê dura a BeYuda tɛ̂ yey hom. Me, Dagwi Darwey, Dagwi mɛn mê sey ɛn, sana como, kɛ gbang, kɛ wal, kɛ bedwa na bemat como bedwa.”

⁸Bama de Gɔmɛr a ga kang hwóng mɛ Nevit-Tɛ̂-Yey ko a to sey jim, a tɔ hwey wen.

⁹Dagwi Darwey a yâng Hosheya, “Vo a yɛ reza, Bemat-Hom-Wɛt, yaga BeIsrayɛl ba sé bemat hom wɛt, ko ma sé Dagwi mɛn wɛt arɔng.”

¹⁰Jeng ye kyè vey de BeIsrayɛl bê gwɛ hɛn, be sè pyak sede bazɛ̂k gworep, vemo de be tɔk bara kɛ be masa vɛ wɛt. Mwa ano de be tang ɛn à Bemat-Hom-Wɛt, ko e jeng o bê tang ɛn, à Ney-Dagwi-Wo-Neken!

¹¹BeYuda na BeIsrayɛl bê to ba wuna hɛn. Yɛn ê kasa a bato mɛn mwât nuyel gwining. Yɛn ê to gwɛ̌ hɛn pyak. Ey, jeng Yɛzrɛɛl yê ba sè gbɔng jeng!