Read berom Hosheya 10 Bible Online

Hosheya 10 - berom bible

Hosheya 10

¹BeIsrayɛl bá kana sè sede retîn anap de ra mara nèy pyak. Sede yɛn á gwɛ̌ tɔs nèy ko yɛn á gwɛ̌ lɔkɔs nekwɔn nása nenɔrɔ. Sede vwel mɛn ha gwɛ̌ pyɛ́, ko yɛn a gwɛ̌ yông beta gacik.

²Neyey mɛn na gas ɛn ko e yɛn ê sɔ tabak o. Dagwi pyɛ mɛ ê gangas nekwɔn nása nenɔrɔ̂ mɛn, ko ê wey na beta gacik mɛn o arɔng.

³Bemat o bê ye: Wot a to vɔk gbɔng gwɔ̀m wɛt. Wot e sap Dagwi Darwey wɛt, ko e sɛ́ de gbɔng gwɔ̀m o ê kyɛm a ra a wot ɛ?

⁴Yɛn e ha neha zɔng-reng, ko be sisa hɛn na bɔs. Râ shɔt vyes yê gwɛ̌ sede sɔ̂ng nedɔm e hwiri de ba ga kana how.

⁵Bemât Samariya bê vow na bengyip, ko bê tosho mus dyam shinang Bet-Avɛn,[4] de ba ga wey na wɛ. Yɛn na bepiris mus o bê dak sekun, jeng de ba ga paa gbɔng nerât wɛ.

⁶Bê kyè na pyɛ mo vɔk e Asirya na be wɔ̀ nɔ̂ng Da Vwel o. BeIsrayɛl bê wok rekyên pyɛ de ba yong.

⁷Gbɔng gwɔ̀m Samariya ê tɛ́ ɛ sede bak cɔgɔt de wo tele tǎlu e ra nshi.

⁸Bê wey na nekwɔn rê fongol berahwol Avɛn de BeIsrayɛl be ragas ɛ banɛn. Batîn rɔgɔ na shik bê bang nekwɔn nása nenɔrɔ mɛn o. E jeng o, bê dɛrɛ beraku, na be bang ɛn, ko bê tâng berahwol be lɛrɛ hɛn.

⁹À yin BeIsrayɛl, yin a ga tik ra a me banɛn wɛt, yimo jeng de yin á hwo ragas vɛ e Gibeya. E hwomo yin á kana yong in yaga como, ko sɛ̌ como yê hwo e ra yin e hwomo wɛt a?

¹⁰Mê hwo bemât banɛn vemo na como na me tabak hɛn. Yére bemat jey yê wuna hɛn e ra yɛn, ko yɛn ê sey pyɔlɔ̂ nepyak banɛn mɛn.

¹¹Ɛfrayim á sè sede shep ngyi de ba ga gbat yɛ, ya sé e yong ɛ na ye bɔrɔs pyɛ̂ yeneng e gazu. Ko ma di rafwɔ yɛ wa sé rwat, ko ma tɛ̀ a yɛ swesêk vɔk berɔndɔng. Mê tɛ̀ Ɛfrayim a ra fwom negbang, mê tɛ̀ Yuda a hwɔlɔ rôn tôw bwi, ko Yakɔp a dak balê bwi mo.

¹²Ma ye: “Hów in cap pyas pyɛ min, tus in necik, na yin ba yɛt bwâl tsak tɛ̂ yey. Jeng ya ga vey na yin a jama Dagwi Darwey, ko yɛ ê vey, na a shusha gâs badu e tē e ra yin.

¹³Yin a tus neves ko yin a yɛt bwâl banɛn. Yin a ga re nèy bɔs min. Yin a tɛ̀ gap min e ra bekyɛkyɛ bedwa, na e ra nepyak bemât como min.

¹⁴Yaga ano nekpɛɛ como nê hwo e ra bemat min, ko bê wey na mwa nekwɔn dál min. Ê sè sede tuk de Gbɔng Gwɔ̀m Shalman a wey na repomo Bet-Arbɛl na como, ko ba mɔbɔs beneng na mwa nèy mɛn.

¹⁵Pyɛ de yê té na yin à yane, à yin bemat Bet-Ɛl, yaga gbɔng neves de yin a ga ra. Ras de bê hwo como mo e rwa hwol gasi, bê wey na gbɔng gwɔ̀m Israyɛl vit.”