Read berom Hosheya 11 Bible Online

Hosheya 11 - berom bible

Hosheya 11

¹Jeng de Israyɛl á sè hwey, ma tɛ̀ yey na yɛ, ko ma yila yɛ hwey hom o yi e vwêl Misra.

²Sede ma gwɛ̌ yila hɛ́, ko a gwɛ̌ kyè yikyik yi na me. Ba nása a Baal nenɔrɔ̂ yas, ko ba rangas a cī pyɛ̂ nesang hyɔɔlɔl.

³Mwa ano de e me de ma masa a Ɛfrayim kwɛngɛl, ma kaba vɔ mɛ, ma tɛ̀ ɛ tyang ko a tɔk wɛt.

⁴Ma kyè na yɛ na nerat tanga tɛ̂ yey, ma ra na yɛ sede mwat de a man rwanang na hwey sɛl, ko ma ye ngyuk na me tɛ̀ a yɛ pyɛ̂ re.

⁵Yɛn ê to ɛn vɔk e vwêl Misra, ko vwêl Asirya hê re negwɔm e ra yɛn, yaga yɛn a kyɛ́ ɛn nà doyo vey na me.

⁶Bê rùnus bapomo mɛn, ko bê kwɔrɔs ri ruhup mɛn. Bê re bemat hom e como mo yaga báre ves mɛn.

⁷Yɛn a sé re nuyel na doyo a me ma. Ko ma tɛ̀ a yɛn swesêk vɔk berɔndɔng. Ko be yila yaga sɛlɛ, ko vit a hwak de ê pat gwɛ.

⁸À Ɛfrayim, yi e rɛ̌ de mê ye waa a hwo ɛ? Yi e rɛ̌ de mê kyini hwo à Israyɛl ɛ? Yi e rɛ̌ de mê ye waa a hwo sede Adma ɛ? E rɛ̌ de mê teshe na yin sede Zɛbɔyim ɛ? Yey hom yê tik me na me ra ano wɛt! Nemwishish hom vey na yin na sé pyak sizɔng!

⁹Mê teshe na yin e ji nepyak shom hom wɛt, mê to me wey na Ɛfrayim wɛt. Yaga ma sé Dagwi, ko mwasi wɛt. Me wɛ ma sé Wo Jɛrɛ, e ji min. Mê vey na yin na shom wɛt.

¹⁰Mê lumla sede gukum e ra bemât repugu min, ko bemat hom bê vey na be raa me. Yɛn nèy hom nê tele vey na me yi e rwa ta.

¹¹Yɛn ê tele dey-dey yi e vwêl Misra sede benon, tanga yi e vwêl Asirya sede bebɔp. Mê toyo na yɛn na yɛn a ba sangal e ji nelɔ mɛn. Me Dagwi Darwey ma ha ano.

¹²BeƐfrayim ba ga gwɔrɔ me na hâ bɔs, BeIsrayɛl ba ga gwɔrɔ me na kwɛlɛng. BeYuda ba sé rɔɔ ra sekyisa na Dagwi, Me de ma sé Dagwi wo tsak o, wo jɛrɛ arɔng.