Read berom Hosheya 12 Bible Online

Hosheya 12 - berom bible

Hosheya 12

¹Ɛfrayim e gyeng gul sede mwat e gyeng yas, e kyě gwɔrɔ gûl rak mwa wosho. Yɛn e gwɛ̌ ha neha bɔs na ragas yol. Yɛn a wuna hɛn na Asirya, ko yɛn e nɔngɔ̂s gbɔng gwɔ̀m Misra něy vwel mɛn.

²Dagwi Darwey a vɔk shɔt na Yuda, Ê tabak Yakɔp tyɛng na begwong beves mɛ, ko ê tala hɛ tyɛng na tomong ves mɛ arɔng.

³Yimo e jîm neng mɛn a kaba tô bwôl gwa mɛ. Jeng de a vey mwat ko a ra sekyisa na Dagwi.

⁴A ra sekyisa na tom-lagwi ko a di wɛng, a tosho ko a ra won na a sɛ̀ nerat mɛ. A man na Dagwi e Bet-Ɛl ko Dagwi a ha na yɛ e hwomo.

⁵Dagwi Darwey Dâ Jey Mwa, reza mɛ à Dagwi Darwey!

⁶Toyo hin vey na Dagwi min. Gyeng in tsak tɛ̂ yey, na gâs badu e tē, na yin niri e gyêng Dagwi min.

⁷Sede jik de a vɔk pyɛ masâ pyɛ́ ye bɔs e vwɔ mɛ, e simo na a mɔt mɛ bemat.

⁸Ɛfrayim a ye, “Ey yàa, ma ga tɛ́ me darwey, ma ga sɛ̀ á to hom nedanerey. E ji pyɛ̂ nedanerey de ma sɛ̀, be tɔk sɛ̀ pyɛ cak vyes e ra me de ya sé renɛn wɛt.”

⁹Ma sé Dagwi Darwey, Dagwi mo, de a pat o yi e vwêl Misra, mê tɛ̀ yin a to sangal e bǔk sede remo de yin e ragas e negasî nzem o.

¹⁰Ma ha na bezarap hom na be tusa hin. Ma dura a yɛn pyɛ́ pyak e ji negwi-ywey, ko ma ha na gwɔrɔ-há pyak yi na yɛn.

¹¹Ba sé ra banɛn e Gileyat, ko yɛn ê wey. Be nása nenɔrɔ̂ bemus e Gilgal, ko begagbang nása nenɔrɔ̂ yas mɛn o bê tɛ́ ɛn sede bagwɔt beta e bepǒl cap de ba ga how.

¹²Yakɔp à kana tele vɔk e vwêl Aram, ko à ra fwom e hwomo na a sɛ̀ mɛ hwā, à gyeng tyīmit na a tala mɛ hwā mo.

¹³Dagwi Darwey à yila zarap mɛ na a pat BeIsrayɛl yi e vwêl Misra, ko zarap o à gyeng ɛn.

¹⁴BeIsrayɛl ba ga tɛ̀ shôm Dagwi Darwey ye tē puu. Yaga ano, ê hala banɛ̂n mɔbɔs bemat o wɛt, ko ê tɛ̀ hâ bɔs mɛn he toyo e ra yɛn.