Read berom Hosheya 13 Bible Online

Hosheya 13 - berom bible

Hosheya 13

¹Raane e jeng de yerê Ɛfrayim yá hanat ko bwang BeIsrayɛl bá tɛ̀ bengyip. Yɛn á nɔ̂ng Ɛfrayim nerey. Ko mwa ano bá gang ɛ na shɔt yi na sâp ci Baal, ko a ku.

²A remo yɛn a sé re nuyel na ragas banɛn. Yɛn e yongos cī na dyam shinang, yɛn e yong yɛ̄ na sekwɛl sizɔng, pyɛ́ de bemât fwôm vwɔ ba yong. Yɛn e yâng bemat o, “Nára hin a yɛ nɔrɔ̂ mwat!” Yɛn e manas ranang na cī mus.

³Yaga ano, bemat o bê kwey sede wut wo bop nagasi, kɛ sede mwɛngɛ de gwo tanga sogo dey. Yɛn e kwey sede byɛmɛ de gul gwo pɛsɛl yɛ e gazu, kɛ sede sekyeng yi e vu-kya.

⁴Ma sé Dagwi Darwey, Dagwi min, ma pat in yi e vwêl Misra. Yin a vɔk Dagwi hwak wɛt, sɛ̌ me. Vit à mwât sey hwak sɛ̌ me.

⁵Ma bɛrɛng hin naka e hey, e vwel de ha hworok na nevît rwak.

⁶Ko e jeng de yin a yel e vwel rat o, yin a sirik na pyɛ́, yin a hwo dak kaa, ko yin a ye bam à me.

⁷Yaga ano, mê sè a yin sede gukum, mê waba me e gwong min sede cwey na me gyeng in.

⁸Mê hwo e ra yin sede beyar de ba ga hashe nèy wɛ, ko mê hama rebek min, mê re in sede gukum. Mê cɛgɛt hin sede ngyāma vyes.

⁹Mê wey na yin, à yin BeIsrayɛl! E wa de ê sɛlɛ hin bet ɛ?

¹⁰Yin vemo de yin á ra won, yin á ye, “Nɔng ot gbɔng gwɔ̀m na bemât nuyel.” A remo gbɔng gwɔ̀m min á wɛ de ê sey in ɛ? Bemât nuyêl mwa bapomo min a vɛ de bê gyep in ɛ?

¹¹E ji shom, ma nɔng in gbɔng gwɔ̀m, ko e ji shom ma to pat ɛ arɔng.

¹²Ba ga jɛk banɛ̂n Ɛfrayim, ko ba ga wɔ̀ tik vɛ naka.

¹³E jeng nepêp tɔ, a sé hwey sana netsitsɛng — a kyɛ́ ɛ nà nusu yi e jim o.

¹⁴Mê viri hɛn yi e retô kwɔ̂n bevuvwel. Mê viri hɛn yi e retô reku. À reku tumbang mo à wɛ arɛt? À sak, kwɔ̂n wey mo à hɛ ɛ? Mê wok nemwishish mo wɛt.

¹⁵Mwa ano de Israyɛl a sé karak sede sere, me, Dagwi Darwey mê tomo na gûl rak pwep yi e hêy gbingiring. Ko gwo tɛ̀ lel nshi na hes mɛn be ye jɔng, bê hashe mwa pyɛ́ ryat yi e begban mɛn.

¹⁶Bemât Samariya bê jut pyɔlɔ̂ banɛn mɛn, yaga yɛn a ga sogo a Dagwi mɛn na nehywɛ. Bê wey na bemat mɛ na wal, bê lagam nèy mɛn e vwel, ko be vugus beha mɛn de ba vɔk nejim.