Read berom Hosheya 14 Bible Online

Hosheya 14 - berom bible

Hosheya 14

¹À yin BeIsrayɛl, Toyo hin na Dagwi Darwey, Dagwi min, banɛn min ba ga tɛ̀ yin tiris bol, yin gabsa.

²Jut in hâ won na he sè nɔrɔ min, yin ye, “Hala a wot mwa banɛn mot, na hwo sey pyɛ́ ryat de wot a sé nɔng, jut ha mot sede nɔrɔ̂ mus.

³Asirya ê kyɛm a sey ot wɛt, ko bedwâ como bê tɔk gyep ot wɛt. Wot ê to yang cī de wot a yong na vɔ mot ya sé dagwi mot wɛt. À Dagwi Darwey a sé e hwo zɔng de hwó tosho reyɔ̂m nehyɛn.”

⁴Dagwi Darwey a ye, Yɛn á kana toyo na bama, ko mê tɛ̀ ɛn tyang. Mê tɛ̀ yey na yɛn na yey hom mwa, mê to wok shom na yɛn wɛt.

⁵Mê gaba e ra BeIsrayɛl sede mwɛngɛ, ko yɛn ê tɛ̀ bejamuk sizɔng sede batîn berang líli, ko berinis mɛn bê vɔk gap sede ve cɔ́gɔt sida Lɛbanɔn.

⁶Yɛn ê túruk na nelang nepas ko nerat mɛn nê sè sede ne tin pwat. Ko nesang nerat mɛn nê sè sede ne cɔ́gɔt sida Lɛbanɔn.

⁷Bê toyo be sangal e nɛ̂n necam hom. Bê ras sede pyɛ̂ yeneng. Bê vo cúyu sizɔng sede tin anap. Bê vɔk nesang nerat sede nshî anap ne Lɛbanɔn.

⁸À yin BeƐfrayim, Sɛ́ ya wuna me na cī ɛ? E me wɛ de mê toyo a yin na newon min, na me bɛrɛng hin naka. Mê tɛ̀ necam e ra yin sede retîn cɔgɔ̂t fir de ré sè gwim-gwim kayɛ jeng, ko a sé yi na me de yin ê sɛ̀ nèy nerat.

⁹Kawɛ mwat de a vɔk netsitsɛng, tik na a tɔk pyɛ́ yemo. Ko kawɛ mwat de a vɔk tɔk, tik na a vɔk pyɛ́ yemo e yey. Begwông Dagwi ba sé tas, bemât cik bê kyè e ra vɛ, ko bemât banɛn bê tiris bol e vɛ.