Read berom Hosheya 2 Bible Online

Hosheya 2 - berom bible

Hosheya 2

¹Yaga ano, tang in begwa min BeIsrayɛl à, Bemat-Hom tanga Tɛ̂-Yey!

²À nèy hom, gyong in neng-gwɔ min, mwa ano de a to sé hwā hom wɛt, ko ma to sé rwas mɛ wɛt arɔng. Gyong in hɛ na a tik tɔrɔ hɛ hê ragas nejwang tanga nedeneves.

³Ka a kyɛ́ ɛ gbir, mê hywɛrɛm hɛ me tik ɛ kpimit sede tuk de bá tɔ̀ ɛ. Mê tɛ̀ ɛ́ a sè sede vwêl gbingiring vit à nshi, ko ê ku na yêy hwɔshɔ.

⁴Mê tosho reyɔ̂m nèy mɛ wɛt, yaga ba tɔs ɛn e nejwang,

⁵neng mɛn a sé devwes, yɛ de a tɔ ɛn a ga ra pyɛ̂ rekyen. A ye, “Mê raa berâs yey hom, de be nɔngɔs me re na sɔ, na wuulu, na linen tanga něy na nshî anap.”

⁶Yaga ano mê gwɔrɔ hɛ na yép, ko mê lɔk jwa na me bang mɛ gwong de ê kwey ɛ.

⁷Ê kyě tele e raa berâs yey mɛ mo, ko ê wul na yɛn wɛt. Ê kyě jama hɛn, ko ê sɛ̀ ɛn wɛt. E yɛnɛ mo, ê ye, “Mê to me vɔk na rwas hom, sangal hom hê raane ha dal hê remo”.

⁸E me de ma kana nɔng ɛ pyɛ̂ yeneng, na nshî anap, na něy pwat, na dyam pyɛng tanga dyam shinang shɛrɛk de á ra mɛ fwôm re a Baal fongol, ko a tɔk ya yi na me wɛt.

⁹Yaga ano, ma sé kyè wɔ sey ɛ pyɛ̂ yeneng nahywɛp, na nshî anap e jeng nɛ, ko mê tik nà nɔng ɛ wuulu na linen de ma kana nɔngɔs hɛ yaga lɔ̂k berugû bangas hɛ.

¹⁰Mê hywɛrɛm hɛ kpimit e nuyêl berâs yey mɛ mo, ko vit à mwat de ê kyɛm a sey ɛ́ yi e vwɔ hom.

¹¹Mê tɛ̀ ɛ a tik mwa nzem — nzem kahɛ shey, na ne pwɛl pwas, ne Tuk Shábat — na mwa netula.

¹²Mê wey na batîn cɔ́gɔt anap mɛ, mwa na vê regwi de a ye, “Berâs yey hom ba nɔng me.” Mê tɛ̀ bě batin cɔ́gɔt mɛ be tɛ́ ɛn rehwot, ko ngyāma ye re vɛ.

¹³Mê tabak hɛ yaga mwa negasi de á ragas nzem ci Baal, de á nása a yɛ nɔrɔ̂ pyɛ̂ nesang hyɔɔlɔl, jeng de á tɔrɔ hɛ na yɔbɔ tanga pyɛ̂ dyéngere ryat, na a wɔ̀ kyě raa mɛ berâs yey mɛ na a ye bam à me. Me Dagwi Darwey ma ha ano.

¹⁴Yaga ano, mê kyè na yɛ vɔk e hey, mê mɛlɛm hɛ na neha ne dyɛng yey.

¹⁵Mê nɔng ɛ bě anap, ko mê doyo Nɛk Reyɔm wo tɛ́ ɛ gwông sɛ̂t yey. E hwomo ê to toyo a me na ha rat sede e jeng nehwong mɛ, sede e jeng de á nusu yi e Misra.

¹⁶Me Dagwi Darwey ma ye, “E jeng o, hwô yila me à rwas mo, ko hwô to yila me à Baal mo wɛt.

¹⁷Yaga mê pat bazâ Baal yi e nu mɛ, ko bê to ba yila baza mɛn wɛt.

¹⁸E jeng o, mê wuna hin na sira na mwa ngyāma na benon, tanga pyɛ̂ gabaga. Mê pat gbang, na wal, na como yi e vwel o, na yin a sangal tyang.

¹⁹“Mê hwono hwo neshey gbak-gbak. Mê hwono hwo na necik tanga gâs badu e tē. Mê hwono hwo na tsak tɛ̂ yey tanga nemwishish.

²⁰Mê hwono hwo na tsak o mwin, ko hwô tɔk me Dagwi Darwey.”

²¹Dagwi Darwey a ye, “E jeng o mê toyo a lagwi na wôn wɛ, ko wô toyo a jey na wôn yɛ,

²²ko yê toyo a pyɛ̂ yeneng, na nshî anap tanga něy na won mɛn, ko pyɛ́ mo yê toyo a bemat hom[1] na won mɛn arɔng.

²³E jeng o mê tus BeIsrayɛl sede yére. Mê tɛ̀ yey e ra Nevît-Tɛ̂-Yey. Mê yâng Bemat-Hom-Wɛt, à Bemat-Hom. Ko yɛn arɔng bê yang me à Dagwi Mot.”