Read berom Hosheya 3 Bible Online

Hosheya 3 - berom bible

Hosheya 3

¹Dagwi Darwey a to yang me, “To ci na hwo wɔ̀ dura a hwā mo tɛ̂ yey mo, mwa ano de a sé ra nejwang na rwâs yey mɛ. Tik na hwo tɛ̀ yey na yɛ sede remo de me rɔɔ tɛ̀ yey na BeIsrayɛl, mwa ano de yɛn a ga doyo be raa cī, yemo de yɛn e kyese nɔngɔ̂s yɛ̄ nɔrɔ̂ nèy anap de ba shumung.”

²Ano kwong, ma wɔ̀ tala cɛ̂k dyam pyɛng kuru na yɛ tyungun, na bedap beba vê baale na me to tala hɛ mɛ.

³Ma ha a yɛ, ma ye, “Gyep tó mo nepɔlɔ pyak yaga me, hwo to ra nedeneves wɛt, hwo man na mwat hwak arɔng wɛt, me arɔng mê man na hwā hwak wɛt.”

⁴Yaga BeIsrayɛl ba rɔda sangal ano nepɔlɔ pyak sana gwɔ̀m kɛ bemât nuyel, sana nása nɔrɔ̂ yas kɛ swesek ci, sana pyɛ râ vyoshon kɛ pyɛ̂ sekwit.

⁵E bama mo, BeIsrayɛl bê toyo ko be jama Dagwi Darwey, Dagwi mɛn tanga yerê Davit gbɔng gwɔ̀m mɛn. Yɛn ê vey na Dagwi Darwey na bengyip na vôw rebek, yaga na yɛn a sɛ nerat mɛ e jeng ye yɛnɛ mo.