Read berom Hosheya 4 Bible Online

Hosheya 4 - berom bible

Hosheya 4

¹À yin BeIsrayɛl, wok in hâ Dagwi Darwey, yaga yɛ a vɔk shɔt na yin de yin a sé na sangal e vwel o. Yaga vit a tsak o, kɛ dyɛ̂ng to, kɛ tɔ̂k Dagwi e vwel o.

²Bemat o be sisa hɛn, be vɛ́sɛ bɔs, be mɔbɔs bemat, be shigshi, ko be ragas nejwang, be ragas yol e kagwa, ko be lusha nemi sana yɛnɛ.

³Pyɛ ma yane de ya tɛ̀ vwel min he nɔngɔs pyɛ́ wɛt, sede mwât sesin. Ha sila na lashê yey, ko mwa pyɛ́ cen ye rō yɛ̄. Ngyāma na benon lagwi tanga betɔk ji nshi arɔng ba sé kushu.

⁴Dagwi Darwey a ye, “Yin tɛ̀ kûn bemin wɛt, yin dura banɛ̂n bemin wɛt. Yaga ha hom ha sé e ra yin pyɛ min, yin bepiris hom.

⁵Yin e tiris bol nagwi yaga banɛn min, ko bepiris hom be tiris bol naturuk arɔng, ko mê wey na neng min, Israyɛl.

⁶Bemat hom ba sé wey yaga nevît tɔk. Ba sé wey yaga nevît tɔk min pyɛ min! Ko me ma tɔk in sede bepiris hom wɛt. Yaga yin a ye bam à Badu Dagwi min. Me arɔng mê ye bam nà tɛ̀ nerat e ra nèy min.

⁷Bepiris hom ba gwɛ̌ hɛn pyak, ko yɛn a gwɛ̌ ra a me banɛn. Ko me mê sege gbɔng nerat min na ne sè pyɛ rekyen.

⁸Yin e sɛsɛm nenɔrɔ̂ bemat hom, de be vɛ̀sɛ mɛ yaga banɛn mɛn, yin e vɔk yey pyɛng de bemat o be re nuyel na ragas banɛn.

⁹Bepiris na bemat o mwa hɛn be ragas neves. Ano, mê tabak hɛn tyɛng mwa hɛn.

¹⁰Yɛn ê re pyɛ́, ko yê vey a yɛn wɛt, Yɛn ê manas na bemɛn ko yɛn ê sɛ̀ nèy wɛt, yaga yɛn a lashe weneng na me Dagwi Darwey, na yɛn a re a cī fongol.”

¹¹Dagwi Darwey a ye, “Nshî anap tanga siring na sé ro bemat hom nà vɔk netsitsɛng!

¹²Yɛn e rangâl kpɔk cɔgɔt pyɛ de yɛn ê ra! Ko yɛn e raa pyɛ de ya ha a yɛn. Yɛn a ga ye rɛng sede jwâng hwā. Yɛn a ga lashe weneng na Dagwi mɛn.

¹³Yɛn e nása a cī nɔrɔ̂ yas e nekwɔn re fongol mɛn e ra beraku, ko yɛn e nása nɔrɔ̂ pyɛ̂ nesang hyɔɔlɔl e ra berahwol, e nɛ̂n batin cɔ́gɔt mwa de ya vɔk necam nerat! Behwóng min ba ga tɛ́ ɛn bedebeves, ko behâ nèy min be ragas nejwang.

¹⁴Mê tabak behwóng min yaga yɛn a ga tɛ́ ɛn bedebeves, kɛ behâ nèy min yaga yɛn e ragas nejwang wɛt. Yaga beras o pyɛ mɛn be kyese na bedebeves, ko yɛn e kyese nása nɔrɔ̂ nejwang e nekwɔn re fongol mɛn. Yɛn a sé wey yaga nevît netsitsɛng!

¹⁵À yin BeIsrayɛl, mwa ano de yin a ga lashe weneng na me, ko BeYuda be kwon dopɛ wɛt! Yin wɔ̀ re fongol e Gilgal, kɛ yin kyè vɔk e Bet-Avɛn wɛt.[2] Yin kwon sisa yin tē, ‘Ma sira na Dagwi Darwey de a sé wo neken.’

¹⁶BeIsrayɛl ba vɔk bato gbarak sede shêp rɔndɔng. Yi e rɛ̌ de Dagwi ê gyeng ɛn sede tyīmit e dem hwéy rat ɛ!

¹⁷BeƐfrayim ba ga wuna bato mɛn na cī. Tík in hɛn zɔng!

¹⁸E bama de yɛn a ga sɔ nshî anap pyak, yɛn e tē jik e de ragas nejwang, yɛn e dal na simô pyɛ rekyen e ra ye nerey,

¹⁹Wúla wô hashe hɛn, ko yɛn ê vo rekyên nása a cī nenɔrɔ̂ yas.