Read berom Hosheya 5 Bible Online

Hosheya 5 - berom bible

Hosheya 5

¹“Wok in pyɛ́ yemo, à yin bepiris! Wet in betong, à yin bemat nuyêl Israyɛl! Wok in, a yin bemat lɔ gwɔ̀m! Mê ra a yin pyɛ min shɔt! Yin a ga tɛ̀ bemat be gabsa e sòrô cī e Mizpa, na segun cī e Raku Tabɔr,

²na vɔng ciwîl cī e Shitim, ko mê tabak hin mwa.

³Ma tɔk kayɛ pyɛ e ra Ɛfrayim, ko Israyɛl a tɔk lɛrɛ hɛ yi na me wɛt. Mwa ano Ɛfrayim a sé ra fwôm nedeneves, ko Israyɛl a ga tɛ́ ɛ ligis.”

⁴Neves de bemat o ba ga ra ne dul ɛn sana toyo vey na Dagwi. Negwɔn nedeneves nà ga kaba hɛn gak tyɔng wɛt, yaga ano, yɛn ê to tɔk Dagwi Darwey wɛt.

⁵Tôs tô BeIsrayɛl he nɔng nuha e ra negwɔn mɛn. BeƐfrayim bê tiris bol e de ragas banɛn. BeYuda bê dopɛ e tirîs bol mɛn o arɔng.

⁶Yɛn ê wɔ̀ jama Dagwi Darwey, na kara nenɔrɔ̂ vyēl na ne berɔndɔng mɛn, ko yɛn ê sɛ̀ ɛ́ wɛt, yaga yɛ a ga gas ɛ na yɛn.

⁷Yɛn a ga kyɛ́ ɛn nà sey tsak o na Dagwi Darwey, yaga yɛn a tɔs nèy na beda beduk. Ko a remo, râ nzem pwɛl pwas nê sè pyɛ wey na yɛn, yɛn mwa na cāp mɛn.

⁸Pɛl in bedurum e Gibeya! Mok in como e Rama! Dak in sekun e Bet-Avɛn! À yin BeBɛnyamin, sey in yel!

⁹Vwêl BeƐfrayim hê tɛ́ ɛ barin, e tuk de be ba tabak hɛn. Ma sé ha pyɛ́ de yê ba té mwin na yére Israyɛl.

¹⁰Bemât nuyel Yuda ba ga sey ɛ vwêl BeIsrayɛl sede vemo de be sek beta yɛnɛ̂ vwel. Yaga ano, mê shusha shom hom e ra yɛn sede tɛmɛ-nshi.

¹¹Ba ga mɔt Israyɛl, ba ga bugut hɛ na shɔt yaga a tɛ̀ yey mɛ e ra yapyi.

¹²Mê wey na Israyɛl sede bekǔt ba re rugu, ko mê wey na gâp Yuda sede shɔ̄t ya re cɔgɔt.

¹³Jeng de Israyɛl a di serɔ de sé royo hɛ, ko Yuda a di baram de a vɔk, ko Israyɛl a doyo vɔk e Asirya, na a wɔ jama sɛlɛ̂ Da Vwel mɛn, ko yɛ mo a tɔk tɛ̀ ɛ tyang, kɛ a tɛ̀ baram mɛ be vel wɛt.

¹⁴Mê hwo e ra BeIsrayɛl sede gukum, ko mê sè sede hwêy gukum de ha hwo BeYuda arɔng. Mê hama hɛn cɛk o cɛk o, ko me kyè. Mê hashe hɛn me kyè mɛ, ko vit a mwat de ê tɔk sey ɛ hɛn.

¹⁵Mê doyo yi na yɛn vɔk e dem sangal hom, sɛ̌ yɛn a di buru mɛn, sɛ̌ yɛn a jama me e reyɔm mɛn.