Read berom Hosheya 6 Bible Online

Hosheya 6 - berom bible

Hosheya 6

¹“À bemat hom: Tik na wot a toyo vey na Dagwi Darwey! Yɛ a ga hama hot ko ê to tɛ̀ ot tyang. A ga tɛ̀ a wot baram, ko ê to rɔgɔs a wot vɛ na be vel.

²E bamâ pɔlɔ ba Dagwi Darwey ê to tɛ̀ ot wɛng-wɛng, e pɔlɔ hê tat ê to yang ot cik, yaga na wot a bin to sangal na yɛ.

³Tik na wot a tɔk Dagwi Darwey, tik na wot a ye ngyɛ́k na wot a tɔk ɛ tsɛng-tsɛng. Ê vey na wot mwin, sede gasi he ye gbey. Ê to vey na wot sede rwâk nabolos, na wo naswigi de wo yel e vwel naka.”

⁴Mê ra sɛ́ na hwo à Israyɛl ɛ? Mê ra sɛ́ na hwo, à Yuda ɛ? Tɛ̂ yey min ha sé sede wut nagasi, sede mwɛngɛ de gwó tanga sogo.

⁵Yaga ano, ma yɛt ɛn na bezarap hom, ma mɔbɔs hɛn na neha nu hom, ma yɛt a yɛn shɔt wɛshɛrɛk sede gbara.

⁶Me simo tɛ̂ yey hê mwin, ko nɔrɔ̂ yas wɛt. Me simo tɔ̂k Dagwi ko nɔrɔ̂ pyɛ̂ rangas wɛt.

⁷Jeng de ba sey vwel o e Adam ko ba hala wuna-na-sira hom. Yɛn a sey tsak o na me wɛt.

⁸Repomô Gileyat ra sila na bemat beves, ra sila na nemi de be lusha.

⁹Sede remo de begbik be gyeng mwat de ê kwey, a sé ano de bagyɛng bepiris be ragas. Yɛn e mɔbɔs bemat e gwông Shɛkɛm, yɛn e ra neves zá wɛt.

¹⁰Ma ga di gbɔng pyɛ̂ byɛm-byɛm e lɔ Israyɛl — nejwâng BeƐfrayim na neligîs BeIsrayɛl.

¹¹À yin BeYuda arɔng, ma ga tɛ̀ jeng de mê tabak hin sede jeng bwal. Kayɛ jeng de mê simo toyo a bemat hom na nerat mɛn.