Read berom Hosheya 7 Bible Online

Hosheya 7 - berom bible

Hosheya 7

¹Kayɛ jeng de me simo tɛ̀ ɛn tyang, ko me bɛrɛng banɛ̂n BeƐfrayim, tanga nevês bemât Samariya zɔng. Yɛn e vɛ́sɛ a me bɔs, begbik e ji nelɔ bemât shigi e jey.

²Ko yɛn e tɔk wɛt wɔgɔ, me bare na mwa tomong ves mɛn. Banɛn mɛn ba ga gwɔrɔ hɛn, ko me bɛrɛng hɛn mwa kyɛrɛng.

³Yɛn e pɛngɛ a gbɔng gwɔ̀m yey na neves, yɛn e pɛngɛ a bemât nuyel yey na bɔs arɔng.

⁴Mwa hɛn ba sé bemât nejwang, yɛn a sé sede kya pep hê mwât halâng kpam-tuk. E to ka jama na a rùga hɛ wɛt, yi e jeng tugut o vɔk e jeng sogo fugum.

⁵E tûk nzem gbɔng gwɔ̀m mot, gwɔ̀m o na bemât nuyel mɛ mwa ba feng nshî anap ko ba tɛ́ ɛn shagarak.

⁶Neyey mɛn na fus sede kya pep hê mwât halang, e de yông pyɛ́ vyes. Yɛn e pɔl e de té puu na shom, ko nagasi, shom o ye takla sede balêm kya.

⁷Mwa hɛn ba sé pep sede kyâ mwât halang, yɛn e re bemât nuyel mɛn. Mwa begbɔng begwɔ̀m mɛn ba ga gabsa ko vit a hwak de ê ra wôn sɛlɛ.

⁸BeƐfrayim ba ga súk ɛn na yére dyuk, ba ga tɛ́ ɛn sede pyɛ̂ halang de ba ga doyo yɛ wɛt.

⁹Yére dyuk ya ga re gap mɛn, ko yɛn a tɔk ano wɛt. Shɔlɔ ya ga hwo e bato mɛn, ko yɛn a tɔk ano wɛt.

¹⁰Tos tô BeIsrayɛl he nɔng nuha e ra yɛn. Mwa ano vit a hwak de a ga toyo vey na Dagwi Darwey, Dagwi mɛn, kɛ a jama hɛ e ji reyɔm remo mwa.

¹¹Ɛfrayim a sé sede gwobɔp gwotɔn o, sana netsitsɛng. Yɛn e yila sɛlɛ̂ Misra, ko be de kyè vɔk e Asirya.

¹²Kahɛ kwɔn de yɛn a wɔ́, mê bomo segun hom e ra yɛn. Mê gyirik hɛn vey e vwel sede benon lagwi. Mê vos ɛn jeng de ma wok yɛn a tula hɛn.

¹³Gawey e ra yɛn, yaga yɛn a ga ye rɛng, Bê wey na yɛn yaga yɛn a sogo nehywɛ e ra me! E me de ma viri hɛn, ko yɛn e vɛ́sɛ bɔs e ra me.

¹⁴Yɛn e tosho a me na yey mɛn wɛt. Jeng de yɛn e dak bèkun e ra gàt mɛn, Ko yɛn e yɛt babek mɛn yaga pyɛ̂ yeneng, na nshî anap de na sé vit, yɛn a sé sogo nehywɛ e ra me.

¹⁵Me de ma masa a bemât como mɛn ko ma gwɛ̌ a yɛn gap, ko mwa ano yɛn e yong neves e ra me.

¹⁶Yɛn a doyo vɔk na yapyi. Yɛn a tɛ́ ɛn vit à nerat sede gbàng de wa ye net. Bemât nuyel mɛn be sǎ e de dâk kaa, ko bê wey na yɛn na wal, ko BeMisra bê shɛgɛsh hɛn.