Read berom Hosheya 8 Bible Online

Hosheya 8 - berom bible

Hosheya 8

¹Pɛl in durum! Ba sé vey na jugu sede kim, e ra Gbɔng Duk Re Fongol Dagwi Darwey Yaga bemat hom ba ga kwɔrɔ wuna-na-sira hom, ko yɛn a ga kyɛ́ ɛn nà gyeng Badu hom.

²Yɛn a sé tosho a me, be tē: À Dagwi mot, wot a sé bemat mo, wot BeIsrayɛl!

³BeIsrayɛl ba ga kyɛ́ ɛn pyɛ́ ryat. Yaga ano, vê repugu mɛn bê ro ɛn.

⁴Yɛn a ga kasa a tó mɛn begwɔ̀m sana rangal me, yɛn a tɛ̀ bemât nuyel mɛn sana tɔ́k hom. Yɛn a jut dyam pyɛng na dyam shinang mɛn be yong mɛ cī — yemo de bê ba wey na yɛ.

⁵À bemât Samariya, ma kyɛ́ me mus dyam shinang min. Yey hom ye beseng na yin. E yɛ̌ jeng de yin ê tɛ́ in haalal ɛ?

⁶E mwât fwôm vwɔ wo BeIsrayɛl de a yong pyɛ cī mo. A sé e Dagwi wɛt! Bê mɔbɔs mus dyam shinang wo Samariya mo cɛk o cɛk o.

⁷Ka sede yin a tus gul e tô alkama, ko yin ê yɛt bwâl wúla! Mapâk yara de wa tɛ̀ to wɛt, wô tɛ̀ yéneng wɛt. Ka wa ka tɛ̀ yéneng, ko bemât yere dyuk bê re yɛ.

⁸Bwang yére bemat jey ya ga wɔlɔk BeIsrayɛl. Yɛn a sé e ji mɛn sede gwokywa de be tɔk ra fwom na gwɛ wɛt.

⁹Yɛn a ga gǎ vɔk e Asirya, sede madung de wo kyè nju wɛ. BeƐfrayim ba ga nɔng dyām na be sey mɛ nesa.

¹⁰Mwa ano de yɛn e ra ano, mê tula hɛn yi e yére bemat jey. Ko yɛn ê hwo ririm, yi na negbang de Da vwel Asirya ê tak a yɛn.

¹¹BeƐfrayim ba ga gwɛ̌ lɔk begagbang rangâs yas na ne sè nedem talâ-nɛn, ko na ga tɛ́ ɛn nedem ragas banɛn e negya!

¹²Mwa ano de ma jɛk a yɛn Badu pyak, ko yɛn a kyɛ́ ɛn vɛ sede ba sé pyɛ dyuk.

¹³Yɛn e nása nenɔrɔ̂ yas de ya dal na nerat, na be re banama mo, ko me, Dagwi Darwey, me kyɛ́ mɛ nenɔrɔ mo. Mê bare na banɛn mɛn, mê tabak hɛn, ko mê to toyo na yɛn vɔk e Misra!

¹⁴BeIsrayɛl ba ga ye bam a womo de a yong ɛn. Ba ga lɔk nelɔ begwɔ̀m nerey o. BeYuda ba ga lɔk nekwɔn dál e bapomo detidetu. Ko mê tomo kya he hwo e ra bapomo mɛn o, he re nelɔ nerey mɛn o arɔng.