Read berom Hosheya 9 Bible Online

Hosheya 9 - berom bible

Hosheya 9

¹À yin BeIsrayɛl, yin kwon vɔk yey pyɛng wɛt! Yin ra nzem sede bwang yére bemat jey wɛt. Yin a ga lashe weneng na Dagwi min, yin a ga ra nedeneves. Yin a rɛsɛl bato min na cī sede bedebeves, yin a sap yɛ e kawɛ gazu.

²Pyɛ̂ yeneng e gazu na nshî anap e kwɔ̂n piri mo yê vey a yin wɛt, ko nshî anap nepas nê tala hɛn.

³BeIsrayɛl bê nàra e vwêl Dagwi Darwey wɛt. BeƐfrayim behak bê to ɛn vɔk e Misra, behak arɔng vɔk e Asirya, ko yɛn ê re pyɛ̂ kyìri e hwomo.

⁴E hwomo yɛn ê tɔk nára a Dagwi Darwey nɔrɔ̂ nshî anap wɛt, ko yɛn ê tɔk nára nenɔrɔ̂ yas de nê pɛngɛ a yɛ yey wɛt arɔng. Pyɛ̂ re mɛn yê tɛ̀ kawɛ mwat de a re yɛ ligis, sede jàne. Yɛn ê re yɛ na be kwɔshɔ mɛ vyong zɔng, bê tɔk wɔ na cak e Gbɔng Duk Re Fongôl Dagwi Darwey wɛt.

⁵Ko yɛn ê ra sɛ́ tuk wusal, tûk nzem Dagwi Darwey ɛ?

⁶Yaga ka yɛn a ka hywit ɛn yi e gawey, ko BeMisra bê tula hɛn, BeMɛmfis bê lɛsɛ hɛn. Mwa pyɛ̂ nedanerey mɛn yê dyam pyɛng e nelɔ mɛn, gwòsɔng na batîn rɔgɔ bê bang yɛ.

⁷Jeng tabak hɛn ya ga vey, na jeng tala hɛn arɔng, ko BeIsrayɛl bê tɔk yɛ! Zarap Dagwi a ga tɛ́ ɛ tɔn, ko mwat de a vɔk Gabik Dagwi a ga tɛ́ ɛ mwât lolong, gbɔng banɛn min na gbɔng repugu min ba tɛ̀ a ra ano.

⁸Zarap Dagwi a sé mwât bɛrɛng BeƐfrayim, bemât Dagwi hom. Ko kahɛ kwɔn de a wɔ́ ɛ, yɛn e rene hɛ sede gwonon. E ji Gbɔng Duk Re Fongôl Dagwi mwa, bê jut ɛ sede mwât repugu mɛn.

⁹Yɛn a dura neves sizɔng sede ba ra e Gibeya.[3] Dagwi ê bare na banɛn mɛn na a tabak hɛn.

¹⁰Dagwi Darwey a ye: “Jeng de ma tanga sɛ̀ BeIsrayɛl, a sé sede mwat a sɛ̀ batîn anap e hey. Jeng de ma di bedabeda min, a sè sede dî nèy regwi ne mɛsɛng de na tanga vel nahywɛp. Ko jeng de yɛn á wul Raku Peyor, yɛn á hwo re a Baal fongol. Yɛn a tɛ́ ɛn ligis sede cī de yɛn a tɛ̀ yey na yɛ.

¹¹Nerêy Ɛfrayim nê sogo yi na yɛn sede gwonon, vit a tɔ̂s nèy, vit a vɔ̂k jim, vit a sêy yɛ arɔng.

¹²Ka yɛn a ka ras nèy o, ko mê wey na nɛ gyam ne tɛ́ ɛn bewen. Gawey e ra yɛn jeng de mê ye waa à hɛn!

¹³Ma di de nèy BeƐfrayim na ga tɛ́ ɛn pyɛ̂ jugu, ko yɛn a ras ne na ne ba kushu zɔng.

¹⁴À Dagwi Darwey, nɔ́ng ɛn pyɛ de hwà yong a yɛn. Tɛ̀ beha mɛn be paa nejim, ko nevasal mɛn ne sè pákpak.

¹⁵Yɛn a hwo ra neves mɛn mwa e Gilgal. A sé e hwomo de ma hwo kyɛ́ mɛ hɛn. Ko yaga neves de yɛn a ra, mê ro ɛn yi e lɔ hom. Mê to tɛ̀ yey na yɛn wɛt, yaga mwa bemat nuyel mɛn ba sé vê sógo nehywɛ.

¹⁶BeƐfrayim ba sé sede cɔgɔt de berinis o ba ga hworok, ko ye to tɔs nèy wɛt. Yɛn ê vɔk nèy wɛt, ko ka yɛn a ka tɔs nèy, mê mɔbɔs nèy yey mɛn o.”

¹⁷Dagwi hom ê kyɛ́ ɛ bemat mɛ, yaga yɛn a kyɛ́ ɛn nà gyeng ha mɛ. Yɛn ê tɛ́ ɛn bemat de be kyě gǎ e ji yére bemat jey.