Read berom Yɔwɛl 2 Bible Online

Yɔwɛl 2 - berom bible

Yɔwɛl 2

¹Pɛsɛl hin bedurum e Siyɔn! Dak in sekun e ra raku Dagwi wo jɛrɛ! À yin bemât vwel o mwa: Vów in na bengyip! Yaga jeng Dagwi Darwey ye kyè vey, ya ga vey lɛs.

²Jeng o yê sè mwangalang, ko yê sè dìlim, Jeng o yê vɔk bale pyak, ko yê siri tyɔng wɛt, Gbɔng regyɛng bemât como rê gap ra sé kyè vey pom, sede lwil de gwa bang beraku kyibit yerê remo de ba ga kana di pyɛ cak ano wɛt, ko bê sang di yerê yɛ e ngamo nuyel wɛt.

³Bê re pyɛ̂ mwa e nuyel sede kya. Ko e bamâ vɛ, balêm kya bê lolo. E nuyêl vɛ, vwel o hê sè gyat sede Bwi Ɛdɛn, ko e bamâ vɛ, mwa vwel o hê sè gbingiring. Pyɛ cak yê hywit a vɛ wɛt.

⁴Ba sé sede bedwa e bɛ́rɛng, be tele sede bedwâ como.

⁵Jeng de be kyě gyilsit e ra rak beraku, na rewɔng sede bekyɛkyɛ̂ bedwa, sede rewɔ̂ng kya de ha sé re sɔng hwogot. Be ngyɛrɛ hɛn sede gbɔng regyɛng bemat de re yong ɛ́ yaga tô como.

⁶Kawɛ mwat e tɛ̀ bengyip ras de ba vey bagat, bayîs kawɛ mwat bê bɛɛ lùu.

⁷Bé hwo e ra pyɛ sede bemât como; be turus e vara duk sede bemât jugu. Be kyè cik vɔk e nuyel, sana sege bak de bê kwey ɛ.

⁸Kawɛ e ye lap e bak o wo mumwɛ wɛt, kawɛ e kyè cik vɔk e kwɔn de a tá ɛ nu. Be tɛ̀ tô vɛ e ji bemât repugu mɛn, ko pyɛ cak ye tɔk dul vɛ wɛt.

⁹Be gyilsit tsów wɔ̀ yel e ji repomo, be tele e ra jwa-pomo mo, be turus na be yel e nelɔ, ko be yeles e bapɔk nelɔ mo sede begbik.

¹⁰Jey ye digis jeng de be yi vey pom, lagwi wo vow arɔng. Gwi na pwɛl be tɛ́ ɛn mwangalang ko netangacɛn ne to lolo wɛt.

¹¹Dagwi Darwey e nɔ̂ng bemât como mɛ nu na gap, ko bemât como mɛ mo ba sé pyak, vemo de be gyeng nu mɛ ba vɔk gap. Jeng Dagwi Darwey ya sé gbɔng jeng, ya sé pyɛ bengyip sizɔng! E wa de ê tɔk nàra kwen ɛ?

¹²Dagwi Darwey a ye, “Ka a remo mwa, doyo hin yi e banɛn min, Toyo hin vey na me na neyey min mwa! Tik in rê pyɛ́, tosho hin, ra in sesin.

¹³Tik na yin a dura, yin e lashe yey mwin. Hàma hin neyey min, ko berugu min wɛt!” To in vey na Dagwi Darwey, Dagwi min! A sé wo nerat, wo toshô reyɔm. E ra shom ziri wɛt, e dura a bemat nerat mɛ ding-ding, E simo na a ra a yin pyɛ vyes wɛt.

¹⁴Gyeng rɔ̌ Dagwi Darwey, Dagwi min ê sege barê yey mɛ, na a tɛ̀ a yin nerat. Yi ano, yin ê tɔk nára a yɛ nɔrɔ̂ pyɛ̂ yeneng na nshî anap.

¹⁵Pɛsɛl hin bedurum e ra Raku Siyɔn! Nɔng in nu na bemat be tik rê pyɛ́! Yila hin bemat e tulâ jɛrɛ!

¹⁶Tula hin bemat mwa e dem hining, tɛ̀ in hɛn haalal yaga gbɔng tulâ Dagwi! Tula hin bemakuk. Vey in na nèy, tanga nèy nesɛl de ne rɔɔ ngas. Tik na rwâs-gwel a vey yi e duk mɛ, ko gwel o a vey yi e jɔ̀rɔm mɛ arɔng.

¹⁷Tik na bepiris de be ra a Dagwi Darwey fwom be tula hɛn e tê gàgbang nása nenɔrɔ̂ yas na rwi Gbɔng Duk Re Fongol, be tosho na be ra won arɔng. Tik na yɛn a ye, “À Dagwi Darwey, tik nà tabak bemat mo. Tik nà tɛ̀ bemât nedanelɔ mo be sè pyɛ byɛs. Hwo kwon tik yére bemat jey be tabas a wot nengyas, be tē, ‘Dagwi min a wɛ?’ arɛt?”

¹⁸E bama mo, Dagwi Darwey a rɔda pugu vwel mɛ, na a tosho reyɔ̂m bemat mɛ.

¹⁹Dagwi Darwey ê toyo a yɛn, a ye, “Di, a remo ma sé kyè wɔ̀ nɔng in pyɛ̂ yeneng, na nshî anap tanga něy pwat de yê vey a yin. Yére bemat jey behak yê to tɔk byɛs in wɛt.

²⁰Mê ro rawâl como wo rwa bato yikyik, ko mê ro ɛn vɔk e hêy gbingiring. Vemo de ba vey e yel, mê ro ɛn vɔk e Gworep Nevwashe, ko vê bama, vɔk e Gworep Tē. Nesang neves nê tugus yi e bavin mɛn. Ey mwin, Dagwi Darwey a ga ra tomông bes.

²¹À vwel, hwo kwon wok bengyip wɛt, vɔk yey pyɛng na hwo shɛgɛsh. Ey mwin, Dagwi Darwey a ga ra tomông bes.

²²À ngyāma yin vɔk bengyip wɛt, nekwɔn gyengês yas na ga to man sɔng rwat naka. Batîn cɔ́gɔt ba ga to hwo tɔs nèy, ko ba vɔk nèy regwi na ne anap pyak arɔng.

²³À bemât Siyɔn, vɔk in yey pyɛng. Tik na yey min ye pɛngɛ e ra pyɛ de Dagwi Darwey, Dagwi min a ga ra a yin. A ga nɔng in rwak pyak naswigi, wa rop a yin naka nabolos, ko wa jam a yin nahywɛp, tyɛng sede raane.

²⁴Begàzu min bê sila na pyɛ̂ yeneng, ko bavɔng de be piri ɛ nshî anap na něy pwat, bê sila ko nê kyě tele e jey.

²⁵Mê toyo a yin na pyɛ́ de yin a bidɛ e ji neshey de bètàrmaje, na rawal, na yɔ́rɔ begwòng tanga yɔ́rɔ wey na pyɛ́ bá re a yin pyɛ̂ hiri min. E me de ma kana tomo a yin rawâl como mo.

²⁶Ko di, a remo, yin ê vɔk pyɛ́ shɛrɛk na yin re, yin siris. Yin ê somo Dagwi Darwey, Dagwi min, de a ga ra a yin pyɛ̂ langat yemo. Bê sang to tɛ̀ bemat hom be vo rekyen wɛt.

²⁷Ano kwong, à BeIsrayɛl, yin ê tɔk ma sé e tē min. E me, Dagwi Darwey, de ma sé Dagwi min, ko vit a dagwi hwak sede me. Bê sang to tɛ̀ bemat hom be vo rekyen wɛt.”

²⁸“E bama mo, mê shushu Gabik hom e ra bemat mwa. Nèy min bewen na behwong bê zarap yi na me. Bemakuk min arɔng bê ranas negwi. Bewen min bê di negwi-ywey arɔng.

²⁹E jeng o, mê shushu Gabik hom, e ra besam arɔng, beras na beha.

³⁰Mê dura pyɛ̂ bes e lagwi na jey. Yin ê di nemi na kya, tanga sekyeng de sé mugus.

³¹Gwi gwô tɛ́ ɛ mwangalang, ko pwɛl gwô senge sede nemi, gyam na jeng Dagwi Darwey ye vey, gbɔng jeng, pyɛ bengyip sizɔng.

³²Ko kawɛ mwat de ê yila Dagwi Darwey na a sɛlɛ hɛ, Dagwi Darwey o ê sey neken mɛ, sede remo de Dagwi Darwey a ye, ‘Behak e ra Raku Siyɔn na e Yɛrusalɛm bê dal, ko mwa vemo de ma kasa bê nàra beken.’ ”