Read berom Yɔwɛl 3 Bible Online

Yɔwɛl 3 - berom bible

Yɔwɛl 3

¹Dagwi Darwey a ye, “E jeng o mê to toyo a Yuda na Yɛrusalɛm na nerey mɛn.

²Mê tula mwa yére bemat jey na me vey na yɛn e Nɛk Shɔt.[1] Mê ra a yɛn shɔt e hwomo, yaga pyɛ̂ mwa de yɛn a ga ra a bemat hom de ma kasa. Yɛn a ga shara BeIsrayɛl e ji yére bemat jey, ko yɛn a ga gas vwel hom.

³Yɛn a masa na sesek na be gas mɛ bemat hom. Yɛn a rɛsɛl nèy bewen e sesam na be tala mɛ bedebeves, ko nèy behwong e sesam na be tala mɛ siring.

⁴“À Tur, na Sidɔn tanga mwa vwêl BeFilisti, e sɛ́ de yin e simo yin a ra a me arɛt? Yin e simo yin tala me yaga pyɛ cak a? E me de mê tala hin dey-dey!

⁵Yin a ga hashe dyam pyɛng na dyam shinang hom na mwa pyɛ́ ryat hom yin wɔ̀ tikis e beduk rê fongol min.

⁶Yin a ga hashe BeYuda na bemât Yɛrusalɛm yin a kyè mɛ yikyik yi e vwel mɛn ko yin a wɔ̀ rɛsɛl a BeGirik.

⁷A remo, ma sé kyè wɔ̀ toyo na yɛn yi e nekwɔn de yin a kana rɛsɛl hɛn ɛ. Mê ra a yin pyɛ de yin a ga ra a yɛn arɔng.

⁸Mê nɔ̂ng BeYuda nèy min bewen na behwong, ko yɛn ê rɛsɛl hɛn vɔk na BeSeba de ba sé yikyik. Me Dagwi Darwey ma ha ano.”

⁹“Ha in a yére bemat jey reha remo: Yong in yaga tô comô Dagwi, Yila hin besuga min. Tula hin bemat mwa yaga como!

¹⁰Turu hin bewal na ron min! Turu hin bebara na bebǎ bwal min! Tik na vê mɛrɛk min be tɛ̀ gap wɔ̂ como!

¹¹Ra in dey-dey, na yin a vey! À yin yére bemat jey mwa tula hin e Nɛk o. À Dagwi Darwey, tomo na besuga mō!

¹²Tik na yére bemat jey be yong ɛn, na yɛn a vey e Nɛk Shɔt. E hwomo, me Dagwi Darwey mê sangal na me ra a mwa yére bemat jey shɔt.

¹³À besugâ Dagwi yɛ́t in hɛn sede be yɛt bwal nahywɛp, Bɔrɔs hin hɛn sede be farang nèy anap. Bètus o bê sila na nshi mo. Yaga neves mɛn na kat.

¹⁴Bemat gu mo, gu mo ba sé e Nɛk Shɔt. Yaga jeng Dagwi Darwey ya ga vey bagat e Nɛk Shɔt o.

¹⁵Gwi na pwɛl bê tɛ́ ɛn mwangalang, ko netangacɛn nê to nɔng negbey wɛt.”

¹⁶Dagwi Darwey e lulum sede gukum yi e Raku Siyɔn, fwɔ mɛ gwô takla yi e Yɛrusalɛm. Jey na lagwi bê vow, ko Dagwi Darwey ê sè kwɔ̂n lɛrɛ̂ bemat mɛ, kwɔ̂n dâl BeIsrayɛl.

¹⁷“À yin BeIsrayɛl a sé ano de yin ê tɔk, me wɛ à Dagwi Darwey, Dagwi min, ko ma sé sangal e Siyɔn, raku hom wo jɛrɛ. Yɛrusalɛm wô to sè jɛrɛ, vit à bemât como beduk e ji mó.

¹⁸E jeng o, batin anap bê nɔngɔs nshi e beraku mwa, ko berɔndɔng bê nɔngɔs nevasal e kawɛ rahwol, mwa nerɔt Yuda nê vɔk nshi. Jɔt nshi yê tele yi e Gbɔng Duk Re Fongol wo Dagwi Darwey, ko yê wɔ̀ tɛ̀ nshi e Nɛk Batin-á-rɔ́gɔ.

¹⁹Vwêl Misra hê tɛ́ ɛ gbingiring, ko hê Ɛdɔm hê tɛ́ ɛ barin, yaga bemat mɛn bá kana tak a BeYuda e como, ko ba mɔbɔs bemat de ba ra a yɛn pyɛ wɛt.

²⁰Ko Yuda wô sila na vê sangal ɛ neshey gbak-gbak, ko Yɛrusalɛm wô vɔk bezamang sana yɛnɛ.

²¹Mê tala pyɔ̌n vemo de ba ga mɔbɔs, mê hala a vemo de ba gang ɛn na shɔt wɛt. Yaga me Dagwi Darwey ma sé sangal e Raku Siyɔn!”