Read berom Amɔs 1 Bible Online

Amɔs 1 - berom bible

Amɔs 1

¹Neha Amɔs, hwak e ji belêk tyīmit kerepomô Tekowa à nemo. Dagwi á dura a yɛ pyɛ́ yemo mwa e ra BeIsrayɛl e jeng de Uziya a sè gbɔng gwɔ̀m Yuda ko Yɛrɔbɔwam hwêy Yɛhɔwash á sè gbɔng gwɔ̀m Israyɛl neshey neba gyam digîs jey de há té.

²Amɔs a ye, “Dagwi Darwey ê lumla yi e Siyɔn. Fwɔ mɛ gwô takla yi e Yɛrusalɛm. Nekwɔn gyengês yas na sé hworok, kɔ sɔng de gwa sé liplip e ra Raku Karmɛl gwa sé ye nɔɔshɔsh.”

³Dagwi Darwey a ye, “Bemât Damaskus ba re nuyel na ragas banɛn, e ra banɛn, ko mê tik nà tabak hɛn wɛt. Yɛn a dak bemat hom vê Gileyat Sede be dak pyɛ́ e gazu na gwocwang bāpyông dyam.

⁴Yaga ano mê tɛ̀ kya e ra lɔ̂ negwɔm Hazayɛl, ko hê re nekwɔn dâl Gbɔng Gwɔ̀m Bɛn-Hadat.

⁵Mê kwɔrɔs ri Damaskus ko mê ro bemat de ba sangal e Nɛk Avɛn mwa, Ko mê kwɔrɔs gwelê gwɔ̀m Bet-Ɛdɛn arɔng. Ko mê hashe bemât Sirya vɔk e de sesam e vwêl Kir.” Dagwi Darwey a ye ano.

⁶Dagwi Darwey a ye, “Bemât Gaza ba re nuyel na ragas banɛn e ra banɛn, ko mê tik nà tabak hɛn wɛt. Yɛn a hashe mwa bemât yere jining ko ba wɔ rów a BeƐdɔm sede besam.

⁷Yaga ano, mê tɛ̀ kya e ra bejwâ-pomô Gaza, na he re nekwɔn dal mɛn.

⁸Mê ro bemat tanga bapomô Ashdot na Ashkɛlɔn. Mê tabak bemât Ɛkrɔn, ko mwa bwang BeFilisti bê kushu arɔng.” Darwey Dagwi Darwey a ye ano.

⁹Dagwi Darwey a ye, “Bemât Tur ba re nuyel na ragas banɛn e ra banɛn, ko mê tik nà tabak hɛn wɛt. Yɛn a hashe mwa bemât yere jining vɔk e de sesam e vwêl Ɛdɔm, ko yɛn a kyɛ́ ɛn nà gyeng redu sangâl netyâng begwa.

¹⁰Yaga ano, mê tɛ̀ kya e ra bejwâ-pomô Tur na he re nekwɔn dal mɛn.”

¹¹Dagwi Darwey a ye, “Bemât Ɛdɔm ba re nuyel na ragas banɛn e ra banɛn, ko mê tik nà tabak hɛn wɛt. Yɛn a ra jamâ begwa mɛn BeIsrayɛl na wal ko ba wok nemwishish mɛn wɛt. Yɛn a ra shom na yɛn vit a yere mo, ko yɛn a tik, repugu mo re ye rɔ̀s wɛt.

¹²Yaga ano, mê tɛ̀ kya e ra repomô Teman, na he re nekwɔn dal ne Bɔsra.”

¹³Dagwi Darwey a ye, “Bemât Amɔn ba re nuyel na ragas banɛn e ra banɛn, ko mê tik nà tabak hɛn wɛt. E como de ba ragas na be gwɛ̌ yɛnɛ̂ vwel mɛn, yɛn a vugus behâ Gileyat de ba vɔk nejim.

¹⁴Yaga ano, mê tɛ̀ kya e ra jwâ-pomô Raba, na he re nekwɔn dal mɛn. Como mo yê vey na dâk sekun, ko wula wô vey na rwâk gwogul.

¹⁵Bê kyè na gbɔng gwɔ̀m mɛn na bemât fwom mɛ vɔk e de sesam e vwel hak.” Dagwi Darwey a ye ano.