Read berom Amɔs 2 Bible Online

Amɔs 2 - berom bible

Amɔs 2

¹Dagwi Darwey a ye, “BeMowap ba re nuyel na ragas banɛn e ra banɛn, ko mê tik nà tabak hɛn wɛt. Yɛn a nɔ̂ng bekup gbɔng gwɔ̀m Ɛdɔm nerey wɛt, ko yɛn a rangas vɛ̀ be tɛ́ ɛn fongol.

²Mê tɛ̀ kya e BeMowap na he re nekwɔn dâl Kɛriyɔt. BeMowap bê weres na môk como, na dâk sekun, tanga pɛsɛl bedurum arɔng.

³Mê mɔrɔ mwat de a sé re negwɔm e ra Mowap tanga mwa bemât nuyêl vwel o.” Dagwi Darwey a ye ano.

⁴Dagwi Darwey a ye, “BeYuda ba re nuyel na ragas banɛn e ra banɛn, ko mê tik nà tabak hɛn wɛt. Yɛn a byɛs basa hom, ko yɛn a kyɛ́ ɛn nà gyeng Badu hom arɔng. Yɛn a ga ye rɛng e de raà bedagwî bɔs, vemo de bedabeda mɛn bá kana raa vɛ.

⁵Yaga ano, mê tɛ̀ kya e ra Yuda, na he re nekwɔn dâl Yɛrusalɛm.”

⁶Dagwi Darwey a ye, “BeIsrayɛl ba re nuyel na ragas banɛn e ra banɛn, ko mê tik nà tabak hɛn wɛt. Yɛn a rɛsɛl bemat berat e sesam e nû dyam pyɛng de be rangal hɛn, ko bepɛng e nû kedyam sêy bekpatak zɔng.

⁷Yɛn e bɔrɔs batô bepɛng sede fongôl vwel, ko be tɛ̀ vê mɛrɛk be ye rɛng. Mwat na da mɛ be dyɛngɛs na hwong gwining, na be tɛ̀ reza hom rê jɛrɛ ligis.

⁸E kahɛ kwɔ̂n rê fongol, bemat be dyɛngɛs e ra pyɛ̂ banga de ba nɔng e selek. E beduk rê fongôl bedagwi mɛn, yɛn e sɔrɔs nshî anap de yɛn a seres ɛ̀ sede pyɛ tala.

⁹Ko di in, à bemat hom, a sé yaga yin de ma wey na BeAmɔr vit. Yɛn á sè belis sede batîn cɔ́gɔt sida, ko yɛn á vɔk gap sede batîn cɔ́gɔt ouk. Ma ga wey na nèy o e rak o, na berinis o e nɛn o.

¹⁰Ma nusu na yin e sevwêl Misra ma kyè e nuyel min e hey neshey kuru banaas, ko ma nɔng in vwêl BeAmɔr na he tɛ́ ɛ min.

¹¹Ma kasa nehak e ji nèy min sede bezarap hom, ko ma kasa bewen min behak sede vê jaram yaga me arɔng. À yin BeIsrayɛl, a sé mwin wɛt a?” Dagwi Darwey, a ha ano.

¹²“Ko di, yin a tɛ̀ vê jaram o be sɔ nshî anap, ko yin a nɔ̂ng vê zarap hom nu, yɛn a kwon ha ha hom wɛt.

¹³A remo mê yɛklɛ hin vit à shòmta, sede gwopyɛ gangâs pyɛ́, sede pyɛ́ dirik e ra gwopyɛ mo.

¹⁴Vê tele hyiw bê hywit ɛn wɛt, vê gap bê tɛ́ ɛn mɛrɛk. Vê tó como bê tɔk sey neken mɛn wɛt.

¹⁵Vê tabâs ket bê tɔk tumal e como wɛt, ko vê tele tyɔng wɛt bê tɔk sey neken mɛn wɛt. Vê bedwa bê tɔk ra sesuga na be wɔ dal wɛt.

¹⁶E jeng o, besuga bê bomos pyɛ̂ como mɛn be tele hal.” Dagwi Darwey a ye ano.