Read berom Amɔs 3 Bible Online

Amɔs 3 - berom bible

Amɔs 3

¹À yin BeIsrayɛl, wet in betong na hâ Dagwi Darwey e ra yin, yin mwa hin bemât yere jining de ma vey na yin yi e sevwêl Misra.

²E ji bemât yére jey mwa, a sé e yin zɔng de ma wuna me na yin. Yaga ano arɔng, mê tabak hin pyɛ min yaga banɛn min.

³Bemat beba bê hwo kyè vɔk e kwɔn hak sana yong ɛ̀ a?

⁴Gukum wó hwo lulum e rehwot sana vo ngyama a? Bwôt gukum wô kwonot e kwɔ̂n dyɛngɛ wɛ sana vo pyɛ de wô re a?

⁵Kenon kê gaba e segun sana rene kɛ a? Segun sê sogo e gwi sana pyɛ cak ya gaba e sɛ a?

⁶Durûm como wô tosho e repomo sana tɛ̀ a bemat o bengyip a? Reyɔm reves rê hwo e ra repomo sana yi na Dagwi Darwey a?

⁷Mwin, Darwey Dagwi Darwey, ê sang ra pyɛ cak sana dura a bemɛ pyɛ de ya tɛ̀ ano a? E dura a vê zarap mɛ retin pyɛ mo.

⁸Gukum wa ga lulum, e wa de ê sangal tiing sana wok bengyip ɛ? Darwey Dagwi Darwey a ga hanat, e wa de e kyɛ́ ɛ nà zarap ɛ?

⁹Ha a bemat de ba sé sangal e nelɔ begwɔ̀m Ashdot na Misra ngan: “Tula hin mwa e berahwôl Samariya, na yin a di yerê cɛ́k de ba sé ra e hwomo, tanga yerê mɔ̂t bemat de be ra ɛ̀ arɔng.”

¹⁰Dagwi Darwey a ye, “Bemat vemo be tɔk ra pyɛ de ya sé ryat wɛt. Yɛn a bang pyɛ́ de ba seres na yol tanga shigi e nekwɔn dal mɛn.”

¹¹Yaga ano, Darwey Dagwi Darwey a ye: “Bemât repugu bê gwɔrɔ sevwel min, bê wey na nelɔ gap min, bê hashe pyɛ̂ jugu e nekwɔn dal min.”

¹²Dagwi Darwey a ye, “Sede remo de lwêk tyīmit e tɔk wɔ sɛ̀ bwang bol ba, kɛ cɛ̌k fwông tyimit zɔng e nû gukum, ano arɔng, bemat tyɔng zɔng bê dal e ji BeIsrayɛl de ba sangal e Samariya, na hagât kwɔ̂n sangal tanga bak gwat mɛn.”

¹³Yaga ano, Darwey Dagwi Darwey, Dagwi Dâ Jey Mwa a ye, “Wet in betong na yin tusa yerê Yakɔp.

¹⁴E jeng o mê ba tabak BeIsrayɛl yaga banɛn mɛn, mê gangas nekwɔn nása nenɔrɔ̂ yas ne Bet-Ɛl. Mê kwɔrɔs ngɛngɛ̂ kahɛ kwɔ̂n narâ nɔrɔ̂ yas o, ko bê gabsa mwa e vwel.

¹⁵Mê gangas nelɔ mɛn ne nabolos tanga ne naswigi, na nemo de ba tɔrɔ na yìn gbin de ba tsep. Ano arɔng, bê gangas kahɛ gbɔng lɔ.” Dagwi Darwey a ye ano.