Read berom Amɔs 4 Bible Online

Amɔs 4 - berom bible

Amɔs 4

¹Wet in betong na yin a wok, à yin behâ Samariya, de yin a mɔsɔ sede berɔndɔ̂ng Bashan e Raku Samariya. Yin e mɔt bepɛng, ko yin e tak a vemo de ba vɔk vwɔ wɛt. Yin e nɔngɔ̂s beras min nu, yin e tang ɛn, “Nɔng ot nshî sɔ.”

²Remo de Darwey Dagwi Darwey a sé wo jɛrɛ, a ga kana sira, a ye, “Jeng ya sé kyè vey mwin, de bê hwɔlɔ hin na begúk, bê hwɔlɔ bwang o mwa na guk sede tɔk.

³Bê hashe hin, be pat kawɛ e jey, e kahɛ kwɔn de jwâ-pomo wa takla. Ko be bomos hin e jey vɔk e bak Harmɔn.” Dagwi Darwey a ye ano.

⁴“À yin BeIsrayɛl ka sede pyɛ ma yane de yin e simo, Vey in e kwɔ̂n rê fongol e Bet-Ɛl! Ci in na râ banɛn! Vey in e Gilgal! Gwɛ̌ ragas hin banɛn! Vey in na yas nɔrɔ̂ kanɛ nagasi! Vey in na pyɔlɔ̂ kahɛ tûk tat!

⁵Vey in na nɔrɔ̂ kpam-tuk wo géy-sing feng a Dagwi! Dak in kaa na yerê nenɔrɔ̂ yey pyɛng de yin e gwɛ̌ nɔngɔs!” Darwey Dagwi Darwey a ye ano.

⁶E me wɛ de me tik nɛ́n min hal e karɛ repomo min, ko vit a hin na kpam-tuk e kahɛ kwɔn arɔng. Mwa ano, yin a toyo vey na me wɛt. Dagwi Darwey a ye ano.

⁷Me shim in rwak jeng de pyɛ̂ hiri min ye dal na simô wɛ, me tomo a repomo remo rwak ko me shim rere. Hwiri gwomo gwó sɛ̀ rwak, ko gworo gwó bidɛ, gwo ye nɔɔshɔsh.

⁸Bemat be kyě gǎ yi e repomo remo vɔk e rere e de jamâ nshi, ko yɛn a sè pyɛ de ya vey a yɛn sɔ wɛt. Mwa ano, yin a toyo vey na me wɛt. Dagwi Darwey a ye ano.

⁹Zang pyak me tɛ̀ rɔ hɛ kaba hirî pyɛ́ min, batô pyɛ̂ bě be siri, ko nèy anap ne bɔsɔ arɔng. Rawal wa re batîn cɔgɔ̂t regwi na vê pat min. Ko mwa ano, yin a toyo vey na me wɛt. Dagwi Darwey a ye ano.

¹⁰Ma tomo tumbang e ra yin, yerê womo de ma kana tomo e ra Misra. Ma mɔbɔs bewen min e de como ko ma hashe bedwa mɛn. Ma sila bawol min na nesang bavîn bemât como min. Dagwi Darwey a ye ano. Ko mwa ano, yin a toyo vey na me wɛt.

¹¹Ma wey na yin sede ma kana wey na Sɔdɔm tanga Gɔmɔra. Vemo de ba dal e ji min ba sè sede cɔgɔt de ba pat yi e kya. Mwa ano, yin a toyo vey na me wɛt. Dagwi Darwey a ye ano.

¹²“Yaga ano, à yin BeIsrayɛl, di in pyɛ de ma sé kyè wɔ̀ ra a yin. Ko yaga ma sé kyè wɔ ra ano, yong in — mê vey na shɔt!

¹³A sé e Dagwi de a yong beraku tanga gùl. A tɛ̀ bemat be tɔk barê yey mɛ. E sege nagwi vɔk e naturuk. E re negwɔm e ra rak jey. Reza mɛ à remo ngan: Dagwi Darwey, Dagwi Dâ Jey Mwa!”