Read berom Amɔs 5 Bible Online

Amɔs 5 - berom bible

Amɔs 5

¹Wet in betong à yin BeIsrayɛl na lwɛlɛ̂ sin de mê ra e ra yin,

²“Zîng hwông Israyɛl a ga gaba, ê sang to sogo wɛt! Ba ga kyini hɛ e dyɛngɛ e vwel, ko vit à mwat de ê sɛlɛ na a sogo hɛ cik.”

³Darwey Dagwi Darwey a ye, “Gbɔng repomô Israyɛl de bemât como gu rining ba nusu, ko bemat naga zɔng de ba toyo. Gbɔng repomo mo rehak de bemât como naga ba nusu, ko kuru zɔng de ba toyo.”

⁴Dagwi Darwey a yâng BeIsrayɛl, “Vey in na me, na yin a vɔk neken.

⁵Yin kwon jama Bet-Ɛl, kɛ yin wɔ yel e Gilgal, kɛ yin ye dɔ vɔk e Bɛɛr-Sheba wɛt. Yaga mwin, bê hashe bemât Gilgal vɔk e de sesam, ko Bet-Ɛl arɔng wô tɛ́ ɛ yapyi.”

⁶Vey in na Dagwi Darwey, na yin a vɔk neken. Ka ano wɛt, yɛ̀ ê takla sede kya e lɔ̂ Yɔsɛf, ko hê re lɔ̂ Bet-Ɛl, vit a mwât rimî hɛ.

⁷Gawey e ra yin, yin de yin e tsip shɔt sana gas badu e tē, yin e mɔt bemat sana ra necik.

⁸A sé e Dagwi de a yong netangacɛ̂n lɔ-gyɛng, nɛ̀ a gwocongot na nèy o tanga mwât jàma na vu mɛ. E sege jêy lwil mwangalang vɔk e yê negbey, ano arɔng e sege nagwi vɔk e naturuk. E yɛ de e yila nshî gworep, ko e to shushu nɛ e ra jey. Reza mɛ à rēmo ngan: Dagwi Darwey!

⁹E tɛ̀ vemo de ba vɔk gap be wey, ko e wey na nekwɔn dal.

¹⁰Yin e kyɛ́ in mwakuk de e gyong in e ruhûp repomo, ko yin e bɛɛ wo hâ tsak o sede pyɛ byɛm-byɛm.

¹¹Yin e tak a bepɛng, ko yin e sey ɛ pyɛ̂ yeneng mɛn na gap, yaga ano, yin ê tik nà sangal e beduk beta berat de yin a lɔk, yin ê tik nà sɔ nshî anap nerat yi e bě rat de yin a tus.

¹²Ma tɔk yerê nevês banɛn min, tanga ne pyɛ́ vyes de yin a ga ragas. Yin e tak a vê cik, yin e seres dyâm bâng nu, na yin a dulus bepɛng e beduk shɔt.

¹³Yaga ano, bare hin, a dal naka yin a bang nenu min yuu, yaga jeng o ya sé vyes!

¹⁴Jama hin nerat, ko neves wɛt, na yin a vɔk neken. Yi ano, Dagwi Darwey, Dagwi Dâ Jey Mwa, ê sè na yin mwin, sede remo de yin e tē a sé na yin.

¹⁵Kyɛ́ in neves, tɛ̀ in yey na nerat, dopse gas in badu e tē e beduk shɔt. Gyeng Dagwi Darwey, Dagwi Dâ Jey Mwa, ê wok nemwishish bwang yerê Yɔsɛf.

¹⁶Yaga ano, Darwey Dagwi Darwey, Dagwi Dâ Jey Mwa a ye, “Bê dak sekun e nehyok bapomo mwa. Bê tē: Yaa kukuuk! Bê rini bemât cap na be wɔ̂ sesîn mwa na yɛn vemo de ba tɔk râ lwɛlɛ̂ sesin yɔkyɔk.

¹⁷Bê dak sekun e bě anap mwa, yaga ma sé kyè wɔ kwey e tē min.” Dagwi Darwey a ha ano.

¹⁸Gawey e ra yin, yin de yin á kana tɛ̀ yey e ra tuk de Dagwi Darwey ê ba vey! Yaga sɛ de yin e simo yin di tuk Dagwi ɛ? Hê sè a yin mwangalang — hê sè gbey wɛt.

¹⁹Sede jeng de mwat a sè tele yi na gukum, ko a de wɔ̀ man gbǎm na beyar! Sede mwat de a vɛ hɛ e lɔ, a ye yìk à vwarâ duk, ko gwɔ̄m wo vɔk wo rot ɛ!

²⁰Jeng Dagwi Darwey yê sè mwangalang ko gbey wɛt, yê vɔk lwil ko negbey wɛt.

²¹“Me kyɛ́ me nzem de yin e ragas a me, na sé pyɛ byɛm-byɛm na me! Ko me vɔk yey pyɛng na netula min wɛt.

²²Mwa ano de yin e vɛ̀sɛ a me na nɔrɔ̂ yas de be rangas na hê pyɛ̂ yeneng, ko me sey yɛ wɛt. Mwa ano de yin e bang yas naka na ye mɔsɔ, na yin a vey nɔng me nɔrɔ̂ yɛ yaga sangâl netyang, ko me sey yɛ wɛt.

²³Kyè in e jey na râ lɛlɛ de yin e dɛrɛ a me betong na vɛ. Me simo me wok râ yōm min wɛt.

²⁴Tik na yin a sǎ e de gâs badu e tē, sede nshi de ne tele e rɔt, Ragas hin necik, sede rɔt de he sang hworok wɛt.”

²⁵“À yin BeIsrayɛl! Yin á nɔng me nɔrɔ̂ yas kɛ hê bwang pyɛ́ detidetu e neshey kuru banaas de ma kyè na yin e hey a?

²⁶Yin ê jut Sakut, gwɔ̀m min, na Kaiwan, dagwî netangacɛn, pyɛ sekwit de yin a yong a bato min, yin a re reyɔ̂m kyé na yɛ.

²⁷Yaga ano, mê kyè na yin vɔk e de sesam e vwel de ha sé e nuyêl Damaskus.” Dagwi Darwey, de reza mɛ à Dagwi Dâ Jey Mwa a ye ano.