Read berom Amɔs 6 Bible Online

Amɔs 6 - berom bible

Amɔs 6

¹Gawey e ra yin, yin de yin a sé sangal bɛs e Siyɔn. Na yin de yin a sé sangal tyang e Raku Samariya. Yin de yin a sé begbɔng o vê yére bemât jey, de ya dal na nerey. Yin de BeIsrayɛl be vɛ̀sɛ jama sɛlɛ na yin!

²Ci wɔ̀ di in repomô Kalne. E bama mo yin kwey vɔk e gbɔng repomô Hamat. Pere hin vɔk e repomô Gat wo BeFilisti. Yɛn a dal bapomô segwɔm Yuda na Israyɛl arɛt? Yɛnɛ̂ vwel mɛn ha dal min na nerey a?

³Yin e tusa jeng de gbɔng rezot rê vey. Ko mwa pyɛ́ de yin e ra yê gwɛ̌ tɛ̀ jeng o ye vey bagat.

⁴Gawey e ra yin, yin de yin e dyɛngɛs e ra gat de ba tɔrɔ na yìn gbin de ba tsep. Yin e wok netâ dyɛngɛs yɛndɛng e ra nekwɔn sangal nerat. Yin e reres banamâ tyīmit ryat o na vê berɔndɔng bebot o.

⁵Yin e simo yong lɛlɛ sede Davit á kana ragas, na yin a ragas vɛ na yōm.

⁶Yin e sɔrɔs nshî anap na bèkɛt, na yin a mɔmsɔl babek min na něy nerat sizɔng. Ko yin e lashe yey yaga barîn lɔ Yɔsɛf wɛt.

⁷Yaga ano, yin ê sè vê mɛsɛng de bê tanga hashe vɔk e de sesam. Nzem min tanga netâ dyɛngɛs yɛndɛng min nê yɛnɛ hɛn.

⁸Darwey Dagwi Darwey a sira na reza mɛ — me Dagwi Darwey, Dagwi Dâ Jey Mwa “Ma kyé mɛ dâk kaà Yakɔp. Ma byɛs nekwɔn dal mɛ, mê nɔng gbɔng repomo mɛ na kayɛ pyɛ de ya sé e ji hɛ.” Dagwi Darwey, Dagwi Dâ Jey Mwa a ye ano.

⁹Ka bemat kuru ba tɛt ɛ e lɔ hak, yɛn ê kushu mwa. Jeng de cang mwat de a ku mó ê yel e lɔ mo na a wɔ̀ pat revîn mwat o na a wɔ̀ lɛrɛ rɛ, ko a rɔda yila mwat de a sé e lɛrɛ e ji lɔ mo, a ye, “Mwat hwak a to sé e lɔ mo bɛ?” Ko mwat o a rɔda toyo a yɛ, a ye, “Wey!” Ano, cang o a rɔda ye, “Tsút! Wot tɛ̀ rezâ Dagwi Darwey wɛt.”

¹¹Yaga Dagwi Darwey a ga nɔng nu, bê gangas nelɔ nerey o cɛk o cɛk o, ko nesɛl o bê gangas nɛ arɔng.

¹²Bedwa be ra sesuga e ra beraku a? Bemat be how gworep na berɔndɔ̂ng cap a? Mwa ano, yin a tɛ̀ hâ gâs badu e tē he sè sede nedɔm, ko yin a tɛ̀ pyɔlɔ̂ necik ye tɛ́ ɛ neves.

¹³Yin e dak kaà rê repomô Lodebar na como. Yin e tē, “Gâp como mot ha vey na wot a re Karnayim!”

¹⁴Dagwi Darwey, Dagwi Dâ Jey Mwa pyɛ mɛ a ye, “À BeIsrayɛl, ma sé kyè wɔ̀ tomo na bemât yerê vwel hak na be tak a yin, yi e pyôl yél e Hamat e bato vɔk e Nɛk Araba e batin.”