Read berom Amɔs 7 Bible Online

Amɔs 7 - berom bible

Amɔs 7

¹Darwey Dagwi Darwey a dura a me pyɛ́ e negwi-ywey, Ma di de a sé yong rawal de wa ye ship, mwas de ba sé yɛnɛ yɛ̂t sehwêy gbɔng gwɔ̀m ko hwey pas o ha ga to hwo ras.

²Rawal o wa hwo re kagwɛ sɔng, Ko ma hwo ye, “À Darwey Dagwi Darwey, me ra won na hwo, hala a bemat mo banɛn mɛn! Yɛn ê dal e rɛ? Yɛn a sé tyɔng zɔng.”

³Dagwi Darwey a sege yey mɛ, ko a ye, “Pyɛ de hwà ga kana di mo yê té wɛt.”

⁴Darwey Dagwi Darwey a to dura a me pyɛ cak. Ma di de a sé yóng ɛ na a tabak bemat mɛ na kya. Kya mo ha hwo re nshî nɛ̂n vwel, ko ha hwo re vwel o mwa arɔng.

⁵Ma yang ɛ, “Óoo à Darwey Dagwi Darwey, me ra won na hwo, tik ano! Bemat mo bê dal e rɛ? Yɛn a sé tyɔng zɔng.”

⁶Dagwi Darwey a to sege yey mɛ, ko a ye, “Pyɛ yemo yê to té wɛt arɔng.”

⁷Dagwi Darwey a to dura a me pyɛ cak gbak, Ma di ɛ a tumal e hagât vwarâ duk, ko a vɔk rwîk masâ duk e vwɔ.

⁸A rangal me, a ye, “À Amɔs, hwà di sé ɛ?” Ma toyo a yɛ, ma ye, “E rwîk masâ duk.” ko a yang me, “Ma sé ra fwom na gwɛ na me dura wɔgɔ, bemat hom ba sé sede vwarâ duk de ba lɔk gwɛ cik wɛt. Mê sege yey hom e ra tabak hɛn e remo wɛt.

⁹Mê wey na nekwɔn rê fongôl Yishak. Mê tik nekwɔn jɛrɛ nɛ Israyɛl e barin. Mê hwo e ra lɔ Gbɔng Gwɔ̀m Yɛrɔbɔwam na como.”

¹⁰Amaziya, piris e Bet-Ɛl a hwo tomo a Gbɔng Gwɔ̀m Yɛrɔbɔwam wo Israyɛl rehâ pyɛ de ya ga té, a ye, “Amɔs a sé yóng a hwo neves e ji BeIsrayɛl. Neha mɛ na sé ne wôk mwat wɛt.

¹¹E tē, ‘Yɛrɔbɔwam ê wey e de como, ko ê hashe BeIsrayɛl yi e vwel mɛn vɔk e de sesam!’ ”

¹²Amaziya a hwo yâng Amɔs, “À zarap Dagwi, To o vɔk e vwêl mo e Yuda. Tik na hwo sɛ̀ pyɔlɔ̂ fwom mo e hwomo.

¹³Hwo to zarap yi na Dagwi e ngamo e Bet-Ɛl wɛt. Kwɔ̂n rê fongol gbɔng gwɔ̀m à hemo, ha sé Gbɔng Duk Re Fongol wo gbɔng gwɔ̀m pyɛ mɛ.”

¹⁴Amɔs a toyo a yɛ, a ye, “Ma sé zarap, kɛ hwêy zarap wɛt. Ma sé lwêk tyīmit, na mwât bɛrɛng batîn regwi.

¹⁵Ko Dagwi Darwey a jut me yi e de fwom hom gwô lwêk tyīmit, ko a nɔng me nu na me vey zarap a bemat mɛ BeIsrayɛl.

¹⁶Yaga ano, wet betong na pyɛ de Dagwi Darwey a ha, remo de hwà yang me, me tik zarap yi na Dagwi e ra BeIsrayɛl, me to shara a yerê Yishak hâ Dagwi arɔng wɛt.

¹⁷Ko tik na hwo wok pyɛ de Dagwi Darwey a ha e ra hwo, ‘Hwâ lɔ mo ê sè devwes e gbɔng repomo, ko ê mɔbɔs nèy mo bewen na behwong e como. Bê mara vwel mo ko be gas a bemat behak hɛ, ko hwo pyɛ mo hwô ku e vwêl bemat de be sap cī. Bê hashe BeIsrayɛl mwin vɔk e de sesam, be kyè na yɛn yikyik yi e vwel mɛn.’ ”