Read berom Amɔs 8 Bible Online

Amɔs 8 - berom bible

Amɔs 8

¹Darwey Dagwi a to dura a me pyɛ cak. Ma di shap nèy regwi de na ga vel.

²Ko a rangal me, a ye, “À Amɔs, e sé de hwà di ɛ?” Ma toyo a yɛ, “E shap nèy regwi de na ga vel.” Dagwi Darwey a yang me, “Jeng ya ga vey na me tabak bemat hom BeIsrayɛl. Mê to sege yey hom e ra tabak mɛn wɛt.

³E jeng o, lɛlɛ yey pyɛng de be ragas e lɔ gwɔ̀m bê tɛ́ ɛn lɛlɛ sesin. Bavîn bemat bê sè kagwa. Bê wok pyɛ cak wɛt.” Darwey Dagwi Darwey a ye ano.

⁴Wok in, yin de yin e bɔrɔs vê mɛrɛk, ko yin e simo wey na bepɛ̂ng vwel o.

⁵Yin e tâng bato min, “E yɛ̌ jeng de Nzem Pwɛl Pwas nê tala hɛn, na wot a hwo rɛsɛl pyɛ̂ yeneng mot, na Tuk Shábat he kwey, na wot a to hwo rɛsɛl alkama mot ɛ? Wot ê mɔndɔng neshǐ masâ pyɛ́ mo, na wot a gwɛ nepyak dyām. Wot ê yong pyɛ̂ masâ nedirik na wot a mɔt mɛ bemat.

⁶Wot ê sey vê mɛrɛk na dyam pyɛng, ko bepɛng na kedyam sêy bekpatak zɔng. Wot ê bunus pyɛ̂ yeneng o na byɛmɛ mo na wot a rɛsɛl.”

⁷Dagwi Darwey a ga kana sira na to mɛ de Yakɔp e ra mɛ kaa. “Mwin mê sang ye bam a tom ves mɛn wɛt.

⁸Yaga ano, vwel o hê digis e ra pyɛ́ yemo, ko kawɛ mwat de a sé e ji hɛ ê ra sesin. Vwel o mwa hê tut sede Gwɔrɔt Nil, hê turus he gyiris sede Gwɔrɔt Nil gwo Misra.

⁹E jeng o, gwi gwô gaba e tê-gwi, jey yê tɛ́ ɛ mwangalang nagwi.” Darwey Dagwi Darwey a ha ano.

¹⁰“Mê tɛ̀ nezap nzem min ne tɛ́ ɛn jeng sesin, me tɛ̀ lɛlɛ yey pyɛng min be tɛ́ ɛn vè sesin. Mê tɛ̀ a yin mwa berugû sesin, ko me tɛ̀ yin wulsa bato min arɔng. Mê tɛ̀ a sè sede bé tosho hwey wen hining zɔng. Tuk o hê reneng a yin vɔk e yɛnɛ̂ hɛ.

¹¹Jeng ye kyè vey mwin de mê tomo na vyong e vwel o, vyông kpam-tuk, kɛ yêy hwɔshɔ̂ nshî sɔ wɛt, vyông wôk hâ Dagwi Darwey e negya. Darwey Dagwi Darwey a ha ano.

¹²Bemat bê kyě gǎ yi e gbɔng rep womo vɔk e woro, yi e rwa bato vɔk e rwa rak. Yɛn ê kyě tele kagwa be jama hâ Dagwi Darwey, ko yɛn ê sɛ hɛ wɛt.

¹³E jeng o, kavɛ bewen na bezɛrɛ behwong de be wok na netyang na gap, bê kushu jwàt-jwat na yêy hwɔshɔ.

¹⁴Vemo de ba sisa na Ashima, dagwî Samariya, kɛ ba tē, ‘Ma sira na dagwî Dan’, na ‘Ma sira na rezâ pyɛ sekwît Bɛɛr-Sheba’, bemat o bê gabsa, ko bê sang to sogso wɛt.”