Read berom Amɔs 9 Bible Online

Amɔs 9 - berom bible

Amɔs 9

¹Ma di Dagwi Darwey e tumal e hagât gàgbang nása nɔrɔ̂ yas ko a ye: “Tow rà rak sesêk Gbɔng Duk Re Fongol na gap, na retîs duk o re digis, zagat hin vɛ̀ e ra batô bemat o mwa. Ko bwang bemat o mê mɔbɔs e como, vit a mwat de ê tele a dal, vit a mwat de ê hywit ɛ arɔng.

²Ka yɛn a ka cing vɔk e kwɔ̂n bevuvwel, ko e hwomo mê jut ɛn na vwɔ hom. Ka yɛn a ka turus e rak o vɔk e lagwi, yi e hwomo mê hwɔlɔ hɛn vey e vwel.

³Ka yɛn a ka wɔ̀ lɛrɛ hɛn e ra rak Raku Karmɛl yi e hwomo mê wɔ̀ jama hɛn, na me vos ɛn. Ka yɛn a ka lɛrɛ hɛn yi na me e nɛ̂n gworep, yi e hwomo mê nɔ̂ng gwomazɛrɛ nu ko gwo roros hɛn.

⁴Ka yɛn a ka kyè vɔk e de sesam e vwêl vê repugu mɛn, mê tɛ̀ be mɔbɔs hɛn. Mê tɛ̀ bayis hom e ra yɛn yaga gawey, ko yaga nerat wɛt.”

⁵Darwey Dagwi Darwey, Dâ Jey Mwa, e rá vwel, ko he ye ywey, mwa bemât hɛ be tosho. Jey o mwa ye turus, ko ye to gyiris sede nshî Gwɔrɔt Nil gwo Misra.

⁶Dagwi Darwey a lɔk lɔ mɛ e lagwi, ko a ye gup à jey na lagwi o. E tɛ̀ nshî gworep ne vey, ko e shusha nɛ e ra jey o. Reza mɛ à Dagwi Darwey!

⁷Dagwi Darwey a ye, “À yin BeIsrayɛl, yin a sé sede BeEtiyopya na me wɛt a? Ma vey na BeFilisti yi e Kaftor, ko ma vey na BeSirya yi e Kir, sede remo de ma vey na yin yi e Misra arɔng.

⁸Me, Darwey Dagwi Darwey ma sé bɛrɛng segwɔm Israyɛl, sê banɛn ko mê wey na yɛn e jey. Ko mwa ano, mê wey na lɔ Israyɛl mwa wɛt.

⁹Mê nɔng nu na be wolom BeIsrayɛl sede pyɛ̂ yeneng. Mê wolom hɛn e ji yére bemat jey, ko vit à pyɛ vyes de yê nàra.

¹⁰Bemât banɛn mwa de ba sé e ji bemat hom bê mɔbɔs hɛn e como — yɛn vemo mwa de be tē, ‘Pyɛ vyes cak yê vey bagat na wot wɛt.’ ”

¹¹Dagwi Darwey a ye, “E jeng o mê to lɔk lɔ Davit de ha kana gaba. Mê to varas varâ duk o. Mê yong nekwɔn de na gabsa. Mê to lɔk hɛ, na he to sè sede remo de há sè yimo.

¹²Ano kwong, BeIsrayɛl bê re bwang vwêl Ɛdɔm mwa na yére bemât jey de bá kana sè benang me.” Dagwi Darwey a ha ano, yɛ de ê tɛ̀ pyɛ́ yemo ye té.

¹³Dagwi Darwey a ye, “Jeng ye kyè vey, de mwât hôw cap ê man na mwât bwal, ko mwât pirî nshî anap ê man na mwât zêp anap o arɔng. Nshî anap ne rɔkrɔk nê nunus yi e bě beraku mwa, ko nê tele e bě berahwol mwa arɔng.

¹⁴Mê toyo na bemat hom e vwel mɛn. Yɛn ê to lɔk barîn bapomo mɛn na yɛn a sangal ɛ. Yɛn ê tus bě anap, na yɛn a sɔ nshi mo. Yɛn ê tus cɔ́gɔt e bě mɛn, na yɛn a re nèy o arɔng.

¹⁵Mê tus bemat hom e ra vwel de ma nɔng ɛn, ko bê sang to luyu hɛn yi e hɛ wɛt.” Dagwi Darwey, Dagwi mō a ye ano.