Read berom Obadya 1 Bible Online

Obadya 1 - berom bible

Obadya 1

¹Pyɛ de Obadya a di e negwi-ywey. Pyɛ de Darwey Dagwi Darwey a ha e ra vwêl Ɛdɔm à yemo. Dagwi Darwey a ga tomo tom mɛ vɔk na yére bemat jey, ko wot a ga wok ha mo: “Sogo hin! Tik na wot a kyè wɔ̀ hwo e ra Ɛdɔm na como!”

²Dagwi Darwey a ha na vwêl Ɛdɔm o, a ye, “Mê tɛ̀ hwo sè kesɛl e ji yére bemat jey mwa, bê byɛs o tyɔng wɛt.

³Dâk kaa mo ha ga kwɛlɛng hwo. Lɔ mo ha sé e rak o e sǎs beraku, yaga ano hwà yâng tó mo, ‘E wa de ê kyɛm a hwɔtɔ me vey e vwel ɛ?’

⁴Mwa ano de hwà lɔk lɔ mo e rak o ding-ding sede rɛngɛ̂ kim, de ha sé a hwo sede ha wɔ̀ wul netangacɛn e lagwi, yi e hwomo mê hwɔtɔ hwo vey e vwel.

⁵Ka sede begbik be vey e lɔ mo naturuk, yɛn e hashe pyɛ́ de yɛn e simo zɔng. Jeng de bemat be wɔ̀ vos nèy anap, yɛn e tɛrɛs ɛ nemɔ mo wɛt a? Ko di, bemât repugu mo ba ga yishing hwo haalal!

⁶À yin yerê Esau, ba ga pɛgɛt hin ngyɛ̄k-ngyɛk ba hashe pyɛ̂ nedanerey mwa.

⁷Bemât gafiri min ba ga kwɛlɛng hin, ba ga ro in e yɛnɛ̂ vwel min. Bemat de bá kana sè sangal tyang na yin ba ga di wɛng e ra yin. Besa mo de yin á kana re pyɛ́ e shǐ hining na yɛn, ba ga tɛ̀ a yin segun; ko yin ê tɔk pyɛ de yɛn a ra wɛt.

⁸Dagwi Darwey a ye: E jeng o mê wey na bemât netsitsɛng mwa yi e Ɛdɔm, ko mê fugut vê tɔk mɛn mwa yi e Raku Esau.

⁹À Teman, besuga mo bê vo bengyip, ko bê wey na kawɛ mwat de a sé e Raku Esau.

¹⁰Yaga mɔbɔs na neves de ba ra a gwa mo Yakɔp, hwô vo rekyen sizɔng, bê wey na yin neshey gbak-gbak.

¹¹Yin a tumal e hagat, e jeng de yére dyuk ya sé kwɔrɔs ri ruhûp Yɛrusalɛm, ya hashe pyɛ̂ nedanerêy rɛ, ko ya gas yɛ e ji mɛn na masâ sesek. Yin á sè tyɛng na yére yane mo arɔng.

¹²Yin a yâng shɛgɛsh begwa min e jeng negbang mɛn wɛt. Yin a yâng feng e ra BeYuda e jeng de ba wey na yɛn wɛt. Yin a yâng dak kaa e jeng reyɔm mɛn wɛt.

¹³Yin a yâng yel e ri gbɔng repomô bemat hom e jeng rezot mɛn wɛt. Yin arɔng yin a yâng shɛgɛsh râ neves mɛn e jeng rezot mɛn wɛt. Yin a yâng hashe pyɛ̂ nedanerey mɛn e jeng rezot mɛn wɛt.

¹⁴Yin a yâng tumal e gasâng gwong na yin a vos vemo de be tele, yin a yâng to nása hɛn e vɔ bemât repugu mɛn, e jeng reyɔm mɛn wɛt.

¹⁵Jeng ya ga vey bagat de Dagwi Darwey ê ra a yére bemat jey mwa shɔt. À Ɛdɔm, pyɛ de hwà ra, bê tala hwo pyɔ̌n yɛ. Tomong mo bê raa hwo.

¹⁶Sede remo de bemat hom ba ga sɔ nshî tabak mɛn e rahwol hom wo jɛrɛ, ano de mwa yére bemat jey de ba gwɔrɔ hɛn bê sɔ nshî tabak hɛn arɔng. Yɛn ê sɔ, be ye fip à nɛ, ko bê vɔk be kyè, be wɔ̀ vusa hɛn vit.

¹⁷Ko behak bê wɔ̀ dal e Raku Siyɔn, kwɔn o hê sè hê jɛrɛ. BeYakɔp bê to sey ɛ vwêl vemo de bà kana sey ɛ vwel mɛn.

¹⁸BeYakɔp bê sè sede kya, ko BeYɔsɛf bê sè sede lêm kya, BeEsau bê sè sede cugul. Bê tɛ̀ kya e ra yɛn, ko hê wey na yɛn vit. Vit a WoEsau hwak de ê dal.” Yaga Dagwi Darwey a ha ano.

¹⁹“BeYuda rwa batin bê sey ɛ berakû Ɛdɔm be sangal ɛ. Vemo de ba sé e fwɔ̂ berahwôl rwa rak bê sey ɛ vwêl BeFilisti be sangal ɛ. BeIsrayɛl bê sey ɛ yɛnɛ̂ bavwêl Ɛfrayim na Samariya be sangal ɛ. BeBɛnyamin bê sey ɛ Gileyat be sangal ɛ.

²⁰BeIsrayɛl rwa bato bê toyo, bê sey ɛ vwêl Finikya vɔk e Zarɛfat. Bemât Yɛrusalɛm de ba sé e de sesam e Sardis, bê sey ɛ bapomô Yuda rwa batin.

²¹Besuga bê wɔ̀ tut e ra Raku Siyɔn ko bê re negwɔm e ra Raku Esau. Ko Dagwi Darwey pyɛ mɛ ê sè Gbɔng Gwɔ̀m.”