Read berom Yona 3 Bible Online

Yona 3 - berom bible

Yona 3

¹Dagwi Darwey a to ha na Yona hê neba a ye,

²“Sogo na hwo kyè vɔk e Nineve, gbɔng repomo rane, na hwo ra a yɛn nu sede remo de mê ha a hwo.”

³Ko Yona a sogo, a kyè vɔk e Nineve sede remo de Dagwi Darwey a ha a yɛ. Nineve wa sé gbɔng repomo tyɔng wɛt. A rɔda jut mwat pɔlɔ tat na a yɛnɛ repomo mo.

⁴Yona a hwo kyè e ji repomo mo. Sede a kyè kwɛngɛl pɔlɔ hining, ko a mok, a ye, “Bwang nepɔlɔ kuru banaas (40) de bê wey na Nineve.”

⁵Ko bemât Nineve ba sey tsak o na Dagwi. Yɛn a vo redu wɔgɔ, kawɛ mwat a tik rê pyɛ́. Ko bemat o mwa hɛn, gbɔng o na hwey ba tɛ̀ pyɛ̂ sesin.

⁶Jeng de ha mo ha wul na gbɔng gwɔ̀m Nineve, yɛ arɔng a sogo yi e gwofwa negwɔm mɛ, a pat gworugu mɛ, a tɛ̀ pyɛ̂ sesin, ko a wɔ̀ sangal e fongol.

⁷Ko a tomo a BeNineve na nu wɔgɔ, “Gbɔng gwɔ̀m na bemât badu mɛ ba nɔng redu remo — Hwak a kwon re pyɛ cak, kɛ a sé mwasi, kɛ yas, kɛ rɔndɔng, kɛ vyel, be re kɛ be sɔ pyɛ cak wɛt.

⁸Ko tik na bemasi na yas o mwa be tɛ̀ pyɛ̂ sesin. Kawɛ a ra won na Dagwi na gap, kawɛ a tik ragas pyɛ́ vyes tanga yol de e ragas.

⁹Gyeng Dagwi ê tik nà ra pyɛ de ya sé e yey mɛ, a wok nemwishish mot na wot a wey wɛt.”

¹⁰Jeng de Dagwi a di pyɛ́ de yɛn a ra, na gwong de yɛn a doyo yi e begwong beves mɛn, ko a wok nemwishish mɛn, a tik pyɛ de ya kana sé e yey mɛ, ko a ra yɛ wɛt.