Read berom Bara BeIsrayɛl 1 Bible Online

Bara BeIsrayɛl 1 - berom bible

Bara BeIsrayɛl 1

¹E tuk susu mo e ji pwɛ̂l gwo neba, e shey hê neba e bama de BeIsrayɛl ba ga kana nusu yi e Misra, Dagwi Darwey a ha na Mose e bûk sangâl Dagwi e hêy Sinai, a ye,

²“Hwo na Aharon yin bara mwa nepyak yére BeIsrayɛl nelɔ mo nelɔ mo na rùhup o rùhup o. Yin a rɔda jɛk bazâ kawɛ rwas, yi e mwat de a ga wul neshey kuru baba vɔk e rak o, vemo de ba ga vey tô como. Jɛk in vɛ zamang o zamang o.

⁴Jut in dalɔ̂ lɔ hining yi e ji kayɛ yere, na yɛn a sɛlɛ hin na fwom o.

⁵“Bazâ bemat de bê sɛlɛ hin a vemo ngan: yi e yerê Rubɛn: Ɛlizur, hwêy Shɛdɛyur yi e yerê Simɛyɔn: Shɛlumiyɛl, hwêy Zurishadai yi e yerê Yuda: Nashon, hwêy Aminadap yi e yerê Isakar: Nɛtanɛl, hwêy Zuwar yi e yerê Zɛbulun: Ɛliyap, hwêy Hɛlɔn yi e yére bya yê Yɔsɛf: yaga Ɛfrayim: Ɛlishama, hwêy Amihut yaga Manase: Gamalyel, hwêy Pɛdazur yi e yerê Bɛnyamin: Abidan, hwêy Gidɛyɔni yi e yerê Dan: Ahiyɛzɛr, hwêy Amishadai yi e yerê Ashɛr: Pagiyɛl, hwêy Ɔkran yi e yerê Gat: Ɛliyasaf, hwêy Dɛyuwɛl yi e yerê Naftali: Ahira, hwêy Ɛnan.”

¹⁶Vemo vɛ à bedalɔ nelɔ de regyɛng BeIsrayɛl ra kasa hɛn, na be sè bemât nuyêl yére mɛn.

¹⁷Ano kwong, Mose na Aharon ba yila mwa BeIsrayɛl e dem hining, ko yɛn tanga bemât nuyel o mwa ba jɛk bazâ beras vivining de ba ga wul neshey kuru baba vɔk e rak o nelɔ mo nelɔ mo na rùhup o rùhup o. Yɛn a ra ano tuk hê yel e ji pwɛl gwo neba,

¹⁹e hêy Sinai tyɛng na pyɛ de Dagwi Darwey a nɔ̂ng Mose redu.

²⁰Nepyak beras de ba ga wul neshey kuru baba vɔk e rak o, vemo de ba ga vey tô como, ba jɛk baza mɛn vivining nelɔ mo nelɔ mo na rùhup o rùhup o. Ba susu jɛ̂k baza mo na yerê Rubɛn, yɛ hwey kinât Yakɔp. Nepyak baza mo de ba tyɛngrɛ a nemo ngan: Yi e yerê Rubɛn ba sɛ̀ nepyak bemat de na wul gu kuru banaas na vɛ batyiimin na naga betungun (46,500). Yi e yerê Simɛyɔn ba sɛ̀ nepyak bemat de na wul gu kuru batungun na vɛ shabatat na naga betat (59,300). Yi e yerê Gat ba sɛ̀ nepyak bemat de na wul gu kuru banaas na vɛ batungun na naga betyiimin na kuru batungun (45,650). Yi e yerê Yuda ba sɛ̀ nepyak bemat de na wul gu kuru bataama na vɛ banaas na naga betyiimin (74,600). Yi e yerê Isakar ba sɛ̀ nepyak bemat de na wul gu kuru batungun na vɛ banaas na naga benaas (54,400). Yi e yerê Zɛbulun ba sɛ̀ nepyak bemat de na wul gu kuru batungun na vɛ bataama na naga benaas (57,400). Yi e yére bya yê Yɔsɛf: yaga Ɛfrayim, ba sɛ̀ nepyak bemat de na wul gu kuru banaas na naga betungun (40,50(...)

⁴⁶Nepyak bemat de ba bara na sé gu naga batyiimin na vɛ batat na naga betungun na kuru batungun (603,550).

⁴⁷Ko e ji bemat de ba bara mo, ba tɛ̀ yerê Levi e ji mo wɛt.

⁴⁸Yaga Dagwi Darwey a kana yâng Mose,

⁴⁹“Jeng de hwà rɔda bara BeIsrayɛl de ba ga vey tô como, hwo kwon tɛ̀ yerê Levi e ji mo wɛt, ko hwo tɛ̀ ɛn e ji barâ bwâng BeIsrayɛl arɔng wɛt.

⁵⁰Ko tik BeLevi, na yɛn a bɛrɛng bûk sangal hom tanga mwa nedôk pyɛ́ de ya sé e ji gwɛ, na yɛn a yong gwɛ, na yɛn a hashe gwɛ tanga mwa pyɛ́ de ya sé e ji mo e jeng kwɛngɛl; ko jeng de yɛn a sé sangal e kwɔ̂n ye ngyɔk mɛn, tik na yɛn a tɛsɛ buk mɛn, na be rɔnɔ mɛ gwɛ.

⁵¹Kayɛ jeng de regyɛng BeIsrayɛl rê sogo, ko BeLevi ba rɔda viri buk o, ko kayɛ jeng de ba rɔda to yong buk o, BeLevi yɛn vɛ de bê ra fwom o e kahɛ kwɔn de yin ê sangal ɛ̀. Ka sede mwat hwak de a sé WoLevi wɛt a vey bagat na buk o, ko bê mɔrɔ hɛ.

⁵²Bwâng BeIsrayɛl mwa yɛn ê tɛsɛ buk mɛn regyɛng o regyɛng o, kawɛ mwat ê sangal e gbɔng regyɛng mɛ e nɛ̂n tuta mɛ.

⁵³Ko BeLevi yɛn a rɔda tɛsɛ buk mɛn, na be rɔnɔ mɛ̀ bûk sangal hom, na be dul gwɛ, yaga na mwat hwak a kwon vey bagat na gwɛ wɛt, na a tɛ̀ shom hom ye vey e ra mwa BeIsrayɛl wɛt.”

⁵⁴Ko BeIsrayɛl ba ra pyɛ́ mwa tyɛng na redu de Dagwi Darwey a nɔ̂ng Mose.