Read berom Bara BeIsrayɛl 10 Bible Online

Bara BeIsrayɛl 10 - berom bible

Bara BeIsrayɛl 10

¹Dagwi Darwey a yâng Mose,

²“Tɛ̀ na be turu bedurum beba na dyam pyɛng, yaga na be bin yishi mɛ̀ regyɛng bemat, na be to ha a yɛn jeng de yɛn ê hwo kwɛngɛl mɛn arɔng.

³Ka sede yɛn a wok ba hwɔtɔ pɛ̂l bedurum vane beba, ko mwa regyɛng bemat o be vey tula hɛn e nuyel mō e rwi bûk sangâl hom.

⁴Ko ka sede ba wok pɛ̂l durum gwining zɔng, ko bemât nuyêl, yɛn bedanelɔ yére BeIsrayɛl, yɛn a rɔda vey tula hɛn e nuyel mō.

⁵Ko ka sede pɛ̂l durum o ha sé kparatat, ko bemât yére de ba sé sangal e rwa rak be sogo.

⁶Ko ka sede ba to wok pɛ̂l durum kparatat hê neba, ko bemât yére de ba sé sangal e rwa batin be sogo. Ano kwong, jeng de be pɛl bedurum o kparatat hê sè yaga sogo yi e kwɔ̂n ye ngyɔk,

⁷ko jeng de ba sé simo na be yila bemât mwa, be hwɔtɔ pɛ̂l bedurum o, ko be pɛl vɛ kparatat wɛt.

⁸Bemat de yɛn a rɔda pɛsɛl bedurum o yɛn vɛ, à nèy Aharon, bepiris. “Pɛsɛ̂l bedurum o ha rɔda sè pyɛ de yin ê ragas nesheneshey yin na yere min de ye kyè vey.

⁹“Ka sede yin a sé tó como na bemât repugu min de yɛn a yel e sevwel min, pɛl in durûm como na bedurum vemo mo. Ko me, Dagwi Darwey, ma rɔda bare na yin, ko ma rɔda sey in yi e vɔ bemât repugu min o.

¹⁰E jeng yey pyɛng arɔng, wɔgɔ jeng de yin a ga kana yong ɛ̀ yaga nzem, na negasî pwɛl pwas, yin a rɔda pɛsɛl bedurum e jeng nára nenɔrɔ̂ yas de be yɛt tanga nenɔrɔ̂ nesa vey na me. E jeng yane, ma rɔda bare na yin, na me sɛlɛ hin. E me wɛ à Dagwi min, Dagwi Darwey.”

¹¹E shey hê neba, e ji pwɛl gwô neba na pɔlɔ kuru baba, rele ra sek vɔk e rak o yi e bûk sangâl Dagwi,

¹²ko BeIsrayɛl ba hwo kwɛngɛl mɛn yi e hêy Sinai. Rele ra kyè na yɛn, sɛ̌ ra wɔ tumal e hêy Paran.

¹³Yɛn a hwo kwɛngɛl o tyɛng na redu de Dagwi à nɔ̂ng Mose:

¹⁴Gbɔng regyɛng rê yel ra kyè bagyɛng o bagyɛng o na tuta wò yerê Yuda. Gbɔng regyɛng o ra wuna yére Isakar na Zɛbulun arɔng, ko bemât nuyêl yére tyat yemo, vɛ a Nashon, hwêy Aminadap yaga Yuda, na Nɛtanɛl hwêy Zuwar, yaga Isakar, na Ɛliyap, hwêy Hɛlɔn, yaga Zɛbulun.

¹⁷E bama de ba ga vibis bûk sangâl Dagwi, BeLevi vê lɔ Gɛrshɔn tanga vê lɔ Mɛrari yɛn a raa na kwɛngɛl. Yɛn vɛ de ba hashe buk o.

¹⁸Gbɔng regyɛng de ra raa ra kyè bagyɛng o bagyɛng o na tuta wò yerê Rubɛn. Gbɔng regyɛng o ra wuna yére Simɛyɔn na Gat arɔng, ko bemât nuyêl yére tyat yemo, vɛ a Ɛlizur, hwêy Shɛdɛyur, yaga Rubɛn, na Shɛlumiyɛl, hwêy Zurishadai, yaga Simɛyɔn, na Ɛliyasaf, hwêy Dɛhuwɛl, yaga Gat.

²¹Ano arɔng, BeLevi vê lɔ Kohat yɛn a raa. Yɛn vɛ de ba hashe pyɛ̂ jɛrɛ yê bûk sangâl Dagwi. Gyam na yɛn a wɔ̀ wul kwɔn de bê tɛ̀ kwɔ̂n ye ngyɔk, ko ba ga kana yong buk o.

²²Gbɔng regyɛng de ra raa ra kyè bagyɛng o bagyɛng o na tuta wò yerê Ɛfrayim. Gbɔng regyɛng o ra wuna yére Manase na Bɛnyamin arɔng, ko bemât nuyêl yére tyat yemo, vɛ a Ɛlishama, hwêy Amihut, yaga Ɛfrayim, na Gamalyel, hwêy Pɛdazur, yaga Manase, na Abidan, hwêy Gidɛyɔni, yaga Bɛnyamin.

²⁵E yɛnɛ mo, gbɔng regyɛng de ra raa ra kyè bagyɛng o bagyɛng o na tuta wò yerê Dan. Gbɔng regyɛng o ra wuna yére Ashɛr na Naftali arɔng, ko bemât nuyêl yére tyat yemo, vɛ a Ahiyɛzɛr, hwêy Amishadai, yaga Dan, na Pagiyɛl, hwêy Ɔkran, yaga Ashɛr, na Ahira, hwêy Ɛnan, yaga Naftali.

²⁸A sé gwong a gwomo de BeIsrayɛl ba kyè kwɛngɛl mɛn bagyɛng o bagyɛng o kayɛ jeng de yɛn a hwo kwɛngɛl.

²⁹Mose a yâng mwali mɛ Hobap, hwêy Rɛyuwɛl, WoMidyan, “Wot a sé sogo vɔk e kwɔn de Dagwi Darwey a ha a wot, ê nɔng ot hɛ. Vey, na wot kyè tanga hwo, ko wot a rɔda ra a hwo pyɛ́ ryat, yaga Dagwi a ga sira a wot BeIsrayɛl, ê ra a wot pyɛ́ ryat.”

³⁰Ko a toyo a yɛ, “Wey, ma rɔda kyè vɔk e sevwel hom na bemat hom.”

³¹Ko Mose a to yang ɛ, “Gabɔk wɛt, hwo gas o na wot wɛt. Hwà tɔk nekwɔn de wot ê ye ɛ ngyɔk e hey, ko yi ano hwô sè bayis mot.

³²Ka sede hwô raa hot, ko wot a rɔda gas kayɛ pyɛ ryat de Dagwi Darwey ê nɔng ot.”

³³Ano kwong, yɛn a sogo yi e rakû Dagwi Darwey, yɛn a kyè nepɔlɔ netat. Ba kyè na Kundung Wuna-na-Sirâ Dagwi Darwey e nuyel mɛn, yaga na gwo jāma a yɛn kwɔn de yɛn ê pɔnglɔ ɛ̀.

³⁴Kayɛ jeng de yɛn a sogo yi e kwɔ̂n ye ngyɔk mɛn, relê Dagwi Darwey ra sé e ra yɛn nagwi.

³⁵Kayɛ jeng de ba jut kundung o yaga kwɛngɛl, ko Mose a ye, “Sogo, à Dagwi Darwey! Tik na bemât repugu mō be shara hɛn, vemo de be kyɛ́ ɛn hwo be tele yi e nuyel mō!”

³⁶Ko kayɛ jeng de ba vey na kundung o e kwɔ̂n ye ngyɔk, a yē, “Toyo hwo, à Dagwi Darwey, vēy na regyɛng BeIsrayɛl de ra sé sana bara.”