Read berom Bara BeIsrayɛl 11 Bible Online

Bara BeIsrayɛl 11 - berom bible

Bara BeIsrayɛl 11

¹Bemât Israyɛl ba hwo gwɔrɔng a Dagwi Darwey e ra reyɔm de yɛn a sé sɔ. Jeng de a wok gwɔrɔng mɛn o, a tɛ̀ shom sizɔng na yɛn, ko a tɛ̀ kya ha hwo lolo e tē mɛn, ko ha re hagat hining hê kwɔ̂n ye ngyɔk mɛn.

²Jeng de bemat ba di ano, yɛn a tosho a Mose. Mose a ra won na Dagwi Darwey, ko kya mo ha ku.

³Ano de ba nɔ̂ng kwɔn hane mo rezâ, Tabera wɔgɔ, kya he re, yaga kyâ Dagwi Darwey ha re e tē mɛn.

⁴Bemat beduk de ba sé tanga BeIsrayɛl ba hwo wok cwey rê banama sizɔng, ko BeIsrayɛl pyɛ mɛn ba hwo gwɔrɔng arɔng, ba tē, “Káa! Wot a yâng sɛ̀ banama zɔng.

⁵Wot á wok netâ sangal e Misra. E hwomo, wot á re betɔk e nɔrɔ. Wot á to re bekyukamba, na babe, na lîk, na albasa tanga negyusma.

⁶A remo wot a ga hworok, yaga vit a hwonong, sɛ̌ gwománà gwomo zɔng de wot e re!”

⁷Mana womo de yenêng wɛ ya sé sede yenêng dyara, ko ya sé e bɛrɛng sede negang cǒ de na ga hworok.

⁸Jeng de mwɛngɛ gwa dyɛng naturuk, ko mana mo wó vey e ji gwɛ e kwɔ̂n ye ngyɔk mɛn. Bemat bé nusu, be wɔ tula, na be hwongo kɛ be to e lùlum, na be kyé mɛ̀ pyɛ́ e rwey, na be to yong mɛ̀ bworô kpam-tuk. Ko neta mo na sé sede pyɛ́ de ba kyé na něy pwat.

¹⁰Mose a wok kavɛ bemat ba sé gwɔrɔng e bazik mɛn e rwi buk mɛn. Dagwi Darwey a tɛ̀ shom sizɔng, ko pyɛ mo ya bɔrɔk Mose.

¹¹A yâng Dagwi Darwey, “Yaga sɛ́ de hwà vey a me, sam mō, na yɔ́m arɛt? E sɛ́ de ma ra de ya jam a hwo wɛt, de hwà tik nedirîk bemat vemo e ra me arɛt?

¹²E me wɛ de ma sey jîm bemat vemo, kɛ e me wɛ de ma tɔ ɛn arɛt? Yaga sɛ́ de hwà ye, me jut ɛn e ragey hom, sede lwêk hwey e jut hwey cereng, na me kyè na yɛn vɔk e sevwel de hwà kana sira a bedabeda mɛn ɛ?

¹³Mê sɛ̀ banama e gwa, na me nɔ̂ng mwa bemat vemo arɛt? Yɛn a dopse gwɔrɔng a me wɔgɔ, me nɔng ɛn banama, na be re.

¹⁴Mê tɔk jut nedirîk bemat vemo nju hom wɛt, yaga na dal gap hom!

¹⁵Ka sede gwong a gwomo de hwô kwey ɛ̀ na me, me ra won na hwo, nduga hwo mɔrɔ me, de hwo tik me, na me sangal e ji lashê yey hemo!”

¹⁶Dagwi Darwey a toyo a Mose, a yang ɛ, “Vey a me na bemakûk BeIsrayɛl kuru bataama vemo de hwà tɔk, yɛn a sé bemât nuyel e ji bemat. Vey na yɛn wɔ e bûk sangâl hom, na yɛn a tumal tanga hwo.

¹⁷Ma rɔda gyirik, na me ha na hwo e hwomo, ko ma rɔda vɛ yi e gabik de ma kana nɔng o, na me nɔng ɛn. Yi ano, yɛn a rɔda sɛlɛ hwo na jût nedirîk bemat de na sé e ra hwo; ano kwong, hwà rɔda jut nɛ nju mō wɛt.

¹⁸Há a bemat, be tɛ̀ bato mɛn jɛrɛ, na yɛn a yong ɛn yaga nahwol, yɛn a rɔda re banama. Dagwi Darwey a ga wok ɛn jeng de yɛn á sè gwɔrɔng, wa a rɔda nɔng ɛn banama, na be re arɛt? Yɛn á wokos neta e Misra! A remo, me Dagwi Darwey, ma rɔda nɔng ɛn banama, na yɛn a re.

¹⁹Yɛn a rɔda re vɛ pɔlɔ hining zɔng wɛt, kɛ nepɔlɔ neba, kɛ netungun, kɛ kuru, kɛ kuru baba,

²⁰ko yaga pwɛl burang, sɛ̌ jeng de bê kyɛ́ ɛn a yɛn nu, na be to sè a yɛn byɛm-byɛm! Yaga yɛn a kyɛ́ ɛn me, Dagwi Darwey, de ma sé e tē mɛn, ko yɛn a gwɔrɔng e nuyel hom, wɔgɔ, yaga sɛ́ de yɛn a hàla Misra arɛt?”

²¹Ko Mose a ye, “E ji bemat de ba sé tanga me, bemât bol ba sé gu naga batyiimin (600,000), ko hwà ye, hwà rɔda nɔng ɛn banama de bê vey a yɛn pwɛl burang!

²²Bê tɔk sɛ̀ vyēl na berɔndɔng e gwa à, de bê yɛt, na be vey a yɛn arɛt? Ka sede ba vos mwa betɔk e gworep, ko bê vey a yɛn wɛt!”

²³Ko Dagwi Darwey a toyo a Mose, a ye, “Reto hom ra vɔk yɛnɛ arɛt? Hwà rɔda di e ji jeng tyɔng, kɛ pyɛ de má ha ya rɔda té kɛ wey.”

²⁴Ano kwong, Mose a wɔ̀ ha a bemat pyɛ de Dagwi Darwey a ha a yɛ. A wɔ̀ tula bemakuk kuru bataama, ko a tɛ̀ ɛn be tumal, na be gwɔrɔ bûk sangâl Dagwi.

²⁵E bama mo, Dagwi a gyirik e ji rele, ko a ha na yɛ. A vɛ gabik de à kana nɔng ɛ, ko a nɔ̂ng bemakuk vane kuru bataama. Jeng de gabik o ha sangal e ra yɛn, yɛn a hwo ra sede bezarap Dagwi, ko yɛn a to re mɛ̀ nuyel wɛt.

²⁶Bemat beba de baza mɛn a Ɛldat tanga Medat, yɛn á kana nusu wɔ e bûk sangâl Dagwi wɛt, ko yɛn á kana rɔngɔl e kwɔ̂n ye ngyɔk mɛn, mwa ano de bá kana tɛ̀ baza mɛn e ji bwâng bemakuk. E hwomo e kwɔ̂n ye ngyɔk, gabik ha sangal e ra yɛn, ko yɛn a hwo ra sede bezarap Dagwi arɔng.

²⁷Wen hwak a yi na setele wɔ̀ ha a Mose, a yang ɛ, “Di, Ɛldat tanga Medat yɛn a sé ra sede bezarap Dagwi e kwɔ̂n ye ngyɔk mɛn!”

²⁸Yɔshuwa Nun, de yimo yɛ wen á kana sɛlɛ Mose, a hanat na yɛ, a ye, “À dagwɔ, yang ɛn, yɛn a tik!”

²⁹Ko Mose a toyo, a ye, “Hwà ra pugu yaga me a? A yâng sè naka na Dagwi Darwey a tɛ̀ gabik mɛ e ra mwa bemat mɛ, na yɛn mwa ba yâng sè bezarap mɛ!”

³⁰E bama mo, Mose tanga bemakûk BeIsrayɛl vane mo yɛn a to ɛn vɔk e kwɔ̂n ye ngyɔk mɛn.

³¹E bamâ jeng tyɔng, gul gwa hwo pɛsɛl yi na Dagwi Darwey, gwa ro yerê rip cak[3] yi e gworep, ko ya tele sede bol tat yi e vwel. Ya dyɛng e kwɔn de ha sé sede kwɛngɛl tuk hining, ko ya rɔnɔ mɛ̀ kwɔ̂n ye ngyɔk mɛn.

³²Tuk hane mo, bemat ba nusu, ba hwo tula rip o mwa nagwi na naturuk tanga gasi hwol arɔng. Mwat de a tula tyɔng a tula sede sháp de ya radɛ kuru batat wɛt, ko yɛn a shara yɛ, na be tɛnsa banama mo, ba gwɔrɔ mɛ̀ kwɔ̂n ye ngyɔk o mwa.

³³Jeng de yɛn a sé rɔɔ re banama mo, ko Dagwi Darwey a tɛ̀ shom na yɛn sizɔng, ko a pat rɔ ves sedesi ha hwo e ra yɛn.

³⁴Ko ba vo a kwɔn hane mo rezâ Besak-Cwey,[4] yaga e hwomo de ba lɛsɛ ɛ̀ bemat de ba wok cwey rê banama.

³⁵Yɛn a sogo yi e Besak Cwey, ko yɛn a kyè vɔk e Hazɛrɔt, yɛn a sangal e hwomo.