Read berom Bara BeIsrayɛl 12 Bible Online

Bara BeIsrayɛl 12 - berom bible

Bara BeIsrayɛl 12

¹Miryam tanga gwa mɛ Aharon yɛn a ha ha ves e ra Mose, yaga a ra wenêng hwā yi e sevwêl Kush.

²Ko yɛn a ye, “Kɛ Dagwi Darwey a ha na Mose[5] nju mɛ zɔng a? Yɛ a ha na wot arɔng wɛt a?” Mose á sè mwât nehywɛ sizɔng a dal kawɛ mwat e ji jey. Ko Dagwi Darwey a wok ha mɛn o.

⁴E ji jeng, a ha na Mose na Aharon tanga Miryam, “Kyè in vey e bûk sangal hom, mwâ hin betat!” Ko mwa hɛn betat yɛn a kyè.

⁵Ko Dagwi Darwey a vey gyirik e ji rele, ko a tumal e rwi de be yeles ɛ̀ e buk o, ko a yila Aharon na Miryam. Yɛn beba ba sek bagat,

⁶ko a ye, “Wet in betong na ha hom: Jeng de bezarap hom ba sé e tē min, me Dagwi Darwey ma dura to hom na yɛn e ji negwi-ywey, ko me ha na yɛn e ji negwi.

⁷Ko a sé ano na sam hom Mose wɛt. E yɛ de ma tɛ̀ ɛ, a bɛrɛng mwa bemat hom BeIsrayɛl.

⁸Me ha na yɛ bayis na bayis, neha wɛshɛrɛk, vit a gwɔrɔ-há; ko yɛ e tɔk bɛrɛng yong hom! Yaga sɛ́ de yin a ka wok bengyip wɛt ɛ, na yin a ha ha ves e ra sam hom Mose arɛt?”

⁹Ko Dagwi Darwey a tɛ̀ shom na yɛn, ko a hàla kwɔn mɛn.

¹⁰E bama de rele ra hàla buk o, remo-remo rebêk Miryam ra vo rɔ ves hê rehwo de ha forok rebek mɛ. Sede Aharon a doyo, a di rɔ ves ha ga vo rebêk Miryam,

¹¹ko a yâng Mose, “Gabɔk wɛt, à dagwɔ, hwo vɔk banɛn de wot a ra e yey wɛt, wot a ra vɛ na netɔn.

¹²Hwo tik ɛ, na a sè sede revin de ra ga bɔsɔ e bak gwining e jeng tɔ wɛt.”

¹³Ko Mose a ra won na sesin e nuyêl Dagwi Darwey, a ye, “À Dagwi, gabɔk wɛt, tɛ̀ ɛ tyang!”

¹⁴Ko Dagwi Darwey a toyo a yɛ, a ye, “Ka sede da mɛ a kana pɛmrɛ hɛ na betey e bayis, yɛ ê sè pyɛ byɛs pɔlɔ taama wɛt arɛt? Be nusu na yɛ e jey e bamâ kwɔ̂n ye ngyɔk pɔlɔ taama; e bama mo, be to toyo na yɛ.”

¹⁵Ano kwong, ba nusu na Miryam e bamâ kwɔ̂n ye ngyɔk pɔlɔ taama, ko BeIsrayɛl o yɛn a tɔk sek wɛt, sɛ̌ jeng de ba toyo na Miryam e ngyen.

¹⁶Ano kwong, yɛn a sogo yi e Hazɛrɔt vɔk e hêy Paran, yɛn a tɛ̀ kwɔ̂n ye ngyɔk mɛn e hwomo.