Read berom Bara BeIsrayɛl 13 Bible Online

Bara BeIsrayɛl 13 - berom bible

Bara BeIsrayɛl 13

¹Dagwi Darwey a yâng Mose,

²“Tomo bemat, na yɛn a wɔ̀ bɛrɛng nezɛɛt vwêl Kanaan, hemo de ma rɔda nɔ̂ng BeIsrayɛl. Yi e ji kayɛ yere tomo mwat gwining yi e ji bemât nuyel mɛn.”

³Mose a ra pyɛ de Dagwi a ha a yɛ, a tomo hɛn yi e hêy Paran. Yɛn mwa hɛn yɛn á sè bemât nuyêl BeIsrayɛl.

⁴Baza mɛn a vemo ngan: Yi e yerê Rubɛn: Shamuwa Zakur; yi e yerê Simɛyɔn: Shafat Hori; yi e yerê Yuda: Kalɛp Yɛfunɛ; yi e yerê Isakar: Igal Yɔsɛf; yi e yerê Ɛfrayim Yɔsɛf: Hosheya Nun; yi e yerê Bɛnyamin: Palti Rafu; yi e yerê Zɛbulun: Gadiyɛl Sodi; yi e yerê Manase Yɔsɛf: Gadi Susi; yi e yerê Dan: Amiyɛl Gɛmali; yi e yerê Ashɛr: Setur Mikayɛl; yi e yerê Naftali: Nabi Vofsi; yi e yerê Gat: Gɛyuwɛl Maki.

¹⁶Vemo vɛ a bazâ bemat de Mose a tomo, na yɛn a wɔ̀ bɛrɛng sevwêl Kanaan. Ko a sege rezâ Hosheya Nun, vɔk e Yɔshuwa Nun.

¹⁷Jeng de Mose a tomo hɛn, a ye, “Kyè in vɔk e rwa bato, vɔk e bak vwêl Nɛgɛf wɔgɔ, bak batîn Kanaan, na yin kwey vɔk e vwêl berahwol.

¹⁸Di in yerê vwel o de ha sé, na yin di kɛ bemat de ba sé e vwel o ba vɔk gap kɛ vit a hɛn na gap, kɛ yɛn a sé pyak kɛ ba sé hyet arɛt?

¹⁹E yerê hihɛ vwel de yɛn a sangal ɛ̀ arɛt? Ha sé rat kɛ ves arɛt? E yerê vivɛ̌ bapomo de yɛn a sé sangal ɛ̀ arɛt? Ba dul vɛ na jwa-pomo kɛ vit arɛt?

²⁰Vwel o ha sé e rɛ̌ arɛt? Ha siri naka kɛ hé tɛ̀ pyɛ́ wɛt ɛ? Cɔ́gɔt ya sé ɛ̀ kɛ vit a cɔ́gɔt arɛt? Ye in ngyɛ́k, na yin vey a wot na pyɛ́ de be how e vwel o.” Jeng o ya sè jeng vel nèy cɔ́gɔt anap ne yel.

²¹Ano kwong, yɛn a kyè vɔk e vwel o, yɛn a bɛrɛng nezɛɛt hɛ yi e hêy Zin e rwa batin vɔk e Rehop bagat na Lebo-Hamat e rwa bato.

²²Yɛn a tānga kwey e bak batin vɔk e Hɛbrɔn, kwɔn de Ahiman, na Sheshai tanga Talmai ba sangal ɛ̀, yɛn vɛ à yerê begbɔng bemat de be tang ɛn a BeAnak. Ba kana lɔk Hɛbrɔn o neshey netaama gyam na be lɔk Zowan e Misra.

²³Sede yɛn a wul Revwâk Vilî Nèy Anap, yɛn a kwɔrɔ lâng cɔgɔ̂t anap de ra vɔk vili nèy anap rining de ra mara sizɔng. Bemat beba e ji mɛn yɛn a tɛ̀ rɛ e ra gwele yaga nedirik o, ko yɛn a tos e ra basanat mɛn. Yɛn a to kwɔrɔs nèy cɔgɔ̂t pomigiranet na ye regwi, yɛn a vey mɛ̀.

²⁴Ba nɔ̂ng revwak rane mo rezâ Revwâk Vilî Nèy Anap,[6] yaga vilî anap rane de BeIsrayɛl ba kwɔrɔ e hwomo.

²⁵E bamâ nepɔlɔ kuru banaas de bemat o ba ra e de bɛrɛ̂ng nezɛɛt sevwel o, yɛn a toyo.

²⁶Yɛn a vey na Mose tanga Aharon na mwa regyɛng BeIsrayɛl e Kadɛsh, e hêy Paran. E hwomo, yɛn a misang a yɛn rehâ kwɛngɛl mɛn de yɛn a kyè. Yɛn a to dura a yɛn yére pyɛ́ de be how e vwel o, de yɛn a vey mɛ̀.

²⁷Yɛn a yâng Mose, “Wot a ga wɔ e sevwel de hwà tomo hot. Vwel o ha siri naka, ha vɔk pyɛ́ shɛrɛk. Di, yére pyɛ́ ma yemo de wot a vey mɛ̀!

²⁸Ko pyɛ jining de wot a di, bemat de ba sé e sangal e sevwel o ba sé bemât gap sizɔng. Bapomo mɛn ba gwɔrɔ vɛ na bejwâ-pomo, ko ba sé barey o arɔng. Wot a to di yerê BeAnak e hwomo.

²⁹BeAmalɛk ba sé e sangal e bak batin, ko BeHiti, na BeYebus tanga BeAmɔr ba sé e sangal e bapomô berahwol; ko BeKanaan ba sé e sangal bagat na gworep, na e vwarâ Rɔt Yɔrdan.”

³⁰Ko Kalɛp a tɛ̀ bemat be dyɛng nehywɛ mɛn e nuyêl Mose, a ye, “Tik na wot wɔ̀ sey ɛ̀ sevwel o. Wot ê tɔk ra ano, vit a pyɛ de ya rɔda ro mɛ̀!”

³¹Ko bwâng bemat de yɛn á yi tanga Kalɛp ba ye, “Wot ê tɔk wɔ̀ hwo bemat vane mo wɛt, yaga yɛn a vɔk gap ba dal ot!”

³²Ko yɛn a hwo shara hâ bɔs e ji BeIsrayɛl, e ra vwel de yɛn a ga yi bɛrɛng nezɛɛt hɛ. Yɛn a ye, “Vwel o ha sé yerê vwel de he re bemat de be sangal e ji hɛ. Mwâ bemat de wot a di, yɛn a sé yerê bemat berey.

³³Ko wot a to di yerê bemat de ba sé hwɔ̀k e hwomo, yɛn à BeAnak vê yerê Nɛfilim. Wot a di ot pyɛ mot sede wot a sé yɔ́rɔ zɔng, ko ano de wot a sé e bayis mɛn arɔng.”