Read berom Bara BeIsrayɛl 14 Bible Online

Bara BeIsrayɛl 14 - berom bible

Bara BeIsrayɛl 14

¹E ji nabwalak nane, mwa regyɛng BeIsrayɛl yɛn a tosho na gbɔng fwɔ.

²Yɛn a hwo gwɔrɔng e ra Mose na Aharon, yɛn a yang ɛn, “A yâng dal a wot, ka wot a kushu e sevwêl Misra na e ngamo e hey!

³Yaga sɛ́ de Dagwi Darwey a vey na wot e ngamo e vwel hemo, yaga na be mɔbɔs hot e como ɛ? Beha mot na nèy mot ba rɔda hashe hɛn e sesam! A yâng dal a wot, na wot toyo vɔk e Misra wɛt a?”

⁴Ko yɛn a yâng bemɛn, “Tik na wot kasa mwât nuyel, na a toyo na wot vɔk e Misra!”

⁵Sede Mose na Aharon yɛn a wok ano, yɛn a gaba gup e nuyêl mwa regyɛng BeIsrayɛl.

⁶Ko Yɔshuwa Nun, tanga Kalɛp Yɛfunɛ, de ba kana sè e ji bemat de yɛn a wɔ̀ bɛrɛng vwel e lɛrɛ, yɛn a hama berugu mɛn.

⁷Ko yɛn a ha na regyɛng BeIsrayɛl o, ba ye, “Vwel de wot a kwey ɛ̀, ha sé rat sizɔng.

⁸Ha siri naka, ha vɔk pyɛ́ shɛrɛk. Ka sede Dagwi Darwey a wok neta mot, ko a rɔda kyè e nuyel mot vɔk e vwel o, na a nɔng ot hɛ.

⁹Pyɛ jining zɔng, yin kwon kyɛ́ in Dagwi Darwey wɛt! Yin tɛ̀ bengyip bemât vwel o arɔng wɛt, yaga yɛn ê sè tuk na leng e nuyel mot, yaga cī mɛn yê tɔk dul ɛn wɛt. Ko Dagwi Darwey a sé tanga wot; yin tɛ̀ bengyip mɛn wɛt!”

¹⁰Ko mwa regyɛng BeIsrayɛl ra hwo simo tó ɛn na beta. Ko e ji jeng, bemat o mwa ba di nedyɛt gbɔng nerêy Dagwi Darwey nà gyirik e ra bûk sangal mɛ.

¹¹Ko Dagwi Darwey a yâng Mose, “Vɔk e yɛ̌ jeng de bemat vemo bê tik byɛs hom arɛt? Vɔk e yɛ̌ jeng de yɛn ê kyɛ́ ɛn nà tɛ̀ gap mɛn e ra me, mwa ano de ma ga kana ragas pyɛ̂ bes pyak e tē mɛn arɛt?

¹²Ma rɔda wey na yɛn na rɔ ves, ko ma rɔda vɛ yere yi na hwo, yemo de yê tɛ́ ɛ yerê bemât jey ryey o, de yê to vɔk gap ye dal ɛn!”

¹³Ko Mose a toyo a yɛ, a yang ɛ, “Hwà pat bemat vemo yi e Misra na gap mō. Ka sede BeMisra ba wok pyɛ de hwà ra a bemat mō,

¹⁴ko yɛn a rɔda há a bemât vwel hemo. Yɛn a ga kana wok, hwo Dagwi Darwey hwà sé e tē mot, ko hwà dura to mō wɛshɛrɛk, jeng de rele mō ra sé tumal e ra wot, ko hwà sé kyè e nuyel mot e ji rele nagwi, ko nabwalak ra lolo kya.

¹⁵Ko di, ka sede hwô wey na yɛn mwa hwiri, ko yére bemât jey de ba kana wok ha mō, ko ba to di tomong mō ba rɔda ye,

¹⁶hwà kyɛm nà hwo vey na bemat vemo e sevwel de hwà kana sira a yɛn wɛt; yaga ano de hwà mɔbɔs hɛn e hey.

¹⁷A remo, à Darwey, gabɔk wɛt dura gap mō, na hwo ra pyɛ de hwà kana ha, jeng de hwà ye,

¹⁸‘Me Dagwi Darwey me ra shom ziri wɛt, me dura a bemat nerat hom ding-ding, ko me halsa a yɛn banɛn mɛn na pyɛ́ vyes de yɛn e ragas. Ko mwa ano, me tɔk tik a mwat banɛn sana hala vɛ wɛt; mê talsa a nèy banɛ̂n beda mɛn vɔk e zamang hê tat na hê naas!’

¹⁹A remo, a Darwey, sede remo de hwà tɛ̀ yey mō ding-ding na bemat, ko ma sé ra won, na hwo hala banɛ̂n bemat vemo, tyɛng sede remo de hwà ga kana halsa a yɛn yimo de yɛn á tik Misra vey e remo.”

²⁰Ko Dagwi Darwey a ye, “Ma ga hàla a yɛn tyɛng na won mō.

²¹Ko mwa ano, sede remo de ma sé kwen, ko nerey hom na sila jêy mwa,

²²vit a mwat e ji bemat vemo de ê sè na neken, na a yel e ji vwel hane. Yɛn a ga kana di nedyɛt nerey hom tanga pyɛ̂ bes de ma kana ra e Misra tanga e hey. Mwa ano, yɛn a ga kana mara me zang pyak,[7] ko ba to kyɛ́ ɛn nà wok me.

²³Yɛn a rɔda di sevwel de ma kana sira a bedabeda mɛn wɛt; vit a mwat de a ga kana byɛs me de a rɔda yel e vwel o.

²⁴Ko yɛ sam hom Kalɛp, de a vɔk gabik mɛ detu, na a to raa me na yey mɛ mwa, yɛ wɛ̀ de ma rɔda vey na yɛ e vwel hemo de a ga kana kyè ɛ̀, ko yere mɛ arɔng yɛn a rɔda re nedanelɔ hɛ.

²⁵Sede remo de BeAmalɛk na BeKanaan yɛn a sé e sangal e benɛk, ko nahwol hwô berem vɔk e hey e gwong de gwa kyè vɔk e Gworep Sere.”

²⁶Dagwi Darwey a to ha na Mose tanga Aharon, a ye,

²⁷“Vɔk e yɛ̌ jeng de regyɛng bemat beves vemo yɛn ê tik gwɔrɔng e ra me ɛ? Ma ga wok gwɔrɔng de be ra e ra me.

²⁸Yang ɛn, ‘Sede remo de me, Dagwi Darwey, ma sé kwen, ma rɔda ra a yin tyɛng pyɛ de ma wok, yin a ha.

²⁹E ngamo e hey, yin a rɔda kushu, ko bavin min ba rɔda dyɛng, yin mwa de yin a vɔk neshey kuru baba (20) vɔk e rak o, de ba kana bara hin e jeng bara. Hemo ha sé tabak, yaga yin a kana gwɔrɔng e ra me.

³⁰Vit a gwining e ji min de ê kyɛm a yel e vwel de ma kana sira a bedabeda min mê nɔng in hɛ, sɛ̌ Kalɛp Yɛfunɛ, na Yɔshuwa Nun zɔng.

³¹Ko nèy min de yin a ha, e nɛ de ba rɔda hashe vɔk e sesam, e yɛn vɛ de ma rɔda vey na yɛn e vwel de yin a kyɛ́ in hɛ, ko yɛn a rɔda re netâ vwel o.

³²Ko yin, yin a rɔda kushu e ngamo e hey.

³³Nèy min nà rɔda kyě kyè e hey neshey kuru banaas (40), ko nà rɔda sɔ yɔ́m, yaga yin a bana hin na me wɛt, sɛ̌ jeng de wo yɛnɛ min a ku.

³⁴Yin a rɔda sey pyɔlɔ̂ banɛn min neshey kuru banaas, shey hining yaga kahɛ tuk hining e ji negasi kuru banaas de yin a re e jeng de yin a wɔ̀ bɛrɛng nezɛɛt vwêl Kanaan. Ano kwong, yin a rɔda tɔk, a sé pyɛ vyes na Dagwi a sè wo repugu min!

³⁵Me, Dagwi Darwey, ma ga ha, ko gbing-gbing ma rɔda ra pyɛ́ yemo na mwa regyɛng bemat beves vemo de ba ga wuna bato mɛn e ra me. Yin a rɔda di yɛnɛ min e hey hemo; e ngamo de yin a rɔda kushu.’ ”

³⁶Bemat de Mose a kana tomo, na yɛn a wɔ̀ bɛrɛng nezɛɛt vwel o, ko yɛn a vɛ hɛn na ha ves hemo de ha tɛ̀ bemat ba gwɔrɔng e ra Dagwi Darwey, yɛn vɛ de Dagwi Darwey a rusu hɛn na rɔ ves, ko ba pe kushu e jeng o.

³⁸E ji bemat o, sɛ̌ Yɔshuwa Nun, na Kalɛp Yɛfunɛ zɔng de yɛn a kushu wɛt, yɛn a nàra beken.

³⁹E jeng de Mose a ha a BeIsrayɛl mwa ha hemo, yɛn a hwo tosho sizɔng.

⁴⁰Bop nagasi yɛn a nusu, yaga na yɛn a wɔ̀ tut vɔk e bahwol, ko yɛn a ye, “Di, a remo, wot a sé kyè wɔ e kwɔn de Dagwi Darwey a kana ha a wot. Wot a ga simo, wot a ga ra banɛn.”

⁴¹Ko Mose a yang ɛn, “Yaga sɛ́ de yin a tɔ̀k gyeng badu Dagwi Darwey wɛt ɛ? Yin ê tɔk di wɛng wɛt!

⁴²Yin wɔ́ wɛt, yaga Dagwi Darwey a sé tanga yin wɛt, ko bemât repugu min yɛn a rɔda di wɛng e ra yin.

⁴³Jeng de yin ê man na BeAmalɛk tanga BeKanaan, yɛn ê wey na yin, yaga Dagwi Darwey a sé tanga yin wɛt, yaga yin a ga gas in na yɛ.”

⁴⁴Ko yɛn a tɛ̀ e neyey mɛn, na yɛn a kyè wɔ̀ tut e vwêl bahwol, mwa ano de Mose kɛ Kundung Wuna-na-Sirâ Dagwi Darwey ba hàla kwɔ̂n ye ngyɔk mɛn wɛt.

⁴⁵Ko BeAmalɛk na BeKanaan de yɛn a sé e sangal e vwêl bahwol yɛn a gyirik, yɛn a hwo e ra yɛn, ko yɛn a ro ɛn vɔk e Hɔrma.