Read berom Bara BeIsrayɛl 15 Bible Online

Bara BeIsrayɛl 15 - berom bible

Bara BeIsrayɛl 15

¹Dagwi Darwey a yâng Mose, a ha a BeIsrayɛl neha nemo ngan: Jeng de yin ê se e sevwel de mê nɔng in, na yin a sangal ɛ,

³ko yin a rɔda vey a me na nenɔrɔ̂ yas burang kɛ nenɔrɔ̂ wunâ nesa de yin ê nára yaga sila mɛ sira, kɛ yaga yey pyɛng, kɛ yaga nɔrɔ̂ nzem nehak ayi. Vey in na yas yi e ji berɔndɔng kɛ vyēl pyɛng kɛ shi. Nesang nɔrɔ̂ pyɛ̂ re hemo ne pɛngɛ a me yey.

⁴Mwat de ê nára vyel pyɛng kɛ shi yaga nɔrɔ̂ yas burang, tik na a vey na shǐ masâ pyɛ́ hining hê nemuk nerat de ba suk na keshǐ masa kining ke něy pwat yaga nɔrɔ̂ nemuk, tanga shǐ masa hining hê nshî anap yaga nɔrɔ̂ pyɛ̂ sɔ.

⁶Ka sede bê nára turuk, ko tik na a vey na neshǐ neba ne nemuk nerat de ba suk nɛ na keshǐ masa kining na bit o ke něy pwat yaga nɔrɔ̂ nemuk,

⁷tanga keshǐ masa hining na bit o hê nshî anap. Nesang nɔrɔ̂ pyɛ̂ re hemo ne pɛngɛ a Dagwi Darwey yey.

⁸Ko ka sede bê nára rɔndɔng yaga nɔrɔ̂ yas burang kɛ yaga nɔrɔ de bê sila mɛ sira kɛ yaga nɔrɔ̂ wunâ nesa,

⁹bē vey na neshǐ netat ne nemuk nerat de ba suk nɛ na neshǐ masa neba ne něy pwat yaga nɔrɔ̂ nemuk,

¹⁰tanga neshǐ masa neba nê nshî anap yaga nɔrɔ̂ pyɛ̂ sɔ. Nesang nɔrɔ̂ pyɛ̂ re hemo ne pɛngɛ a Dagwi Darwey yey.

¹¹Pyɛ ma yemo de ba rɔda nára tanga kawɛ rɔndɔng o, na turuk o, na bwôt vyel pyɛng kɛ vyel shi mo,

¹²Ka sede bê nára nɔrɔ̂ yas de ya dal jining, ko be wuna nɔrɔ̂ kayɛ mo na nepyak pyɛ̂ nɔrɔ ye nemuk na ye pyɛ̂ sɔ de ya sé tyɛng yaga yerê yas o.

¹³Tik na kawɛ WoIsrayɛl de a sé tɔ̂ lɔ a ra pyɛ́ yemo e gwong gwining gwomo jeng de a sé vey na nɔrɔ̂ pyɛ̂ re de nesang hɛ ne pɛngɛ a Dagwi Darwey yey.

¹⁴Ko mwât yere dyuk — kɛ a sé sangal na yin yaga jeng tyɔng kɛ belɔ mɛ ba sé na yin yimo — tik na a raa gwong gwining o, jeng de e simo a nára nɔrɔ̂ pyɛ̂ re de nesang yɛ ne pɛngɛ a Dagwi Darwey yey.

¹⁵Ano kwong, yin BeIsrayɛl na bemât yére dyuk de ba sé sangal e tē min, yin a rɔda vɔk badu vining o nesheneshey. Yin mwa hin yin a sé tyɛng e bayis Dagwi.

¹⁶Badu na pyɛ́ mwa de yin ê ra ya rɔda sè jining o.

¹⁷Dagwi Darwey a to yâng Mose,

¹⁸a ha a BeIsrayɛl neha nemo ngan: Jeng de yin a hwo sangal e sevwel de ma sé kyè wɔ nɔng in,

¹⁹ko yin a ga hwo re pyɛ̂ vwel o, jut in bak yɛ, na yin nára a me yɛ.

²⁰Kpam-tuk wo mɛsɛng o de yin ê yong na pyɛ̂ yéneng yê bwal pwas wô se wo Dagwi Darwey, sede remo de bak wo mɛsɛng o wo pyɛ̂ gazu wa rɔda se mwɛ arɔng. Yin a rɔda nára a yɛ wɛ sede pyɛ nɔrɔ. Yin ê gyeng redu remo e nezamang min e ngamo nuyel.

²²Ka sede yin kɛ yére min, yin a tik nà gyeng, sana tɔk min, hak e ji badu de Dagwi Darwey a nɔng e nû Mose, a sé gbing-gbing, na be yong renɛn o na nɔrɔ de yin a rɔda vey mɛ

²⁴Ka sede a sé e regyɛng bemat mwa de ra buru sana tɔk, ko tik na yɛn a nára bwôt mus yaga nɔrɔ̂ yas burang de nesang yɛ ne pɛngɛ a Dagwi Darwey yey, mwa na nɔrɔ̂ nemuk na hê pyɛ̂ sɔ. Nára hin gam gwining arɔng yaga nɔrɔ̂ fûng banɛn.

²⁵Piris a rɔda ra mɛ pyɛ́ de ba ga tɔ́k ɛn mɛ na nása nɔrɔ̂ talâ-nɛn yaga regyɛng bemat o. Dagwi ê hala a yɛn, yaga yɛn a buru na negaren wɛt, ko yɛn a ga nára a yɛ nɔrɔ̂ yas burang sede nɔrɔ̂ pyɛ̂ re.

²⁶A rɔda hala a regyɛng BeIsrayɛl mwa na bemât yére dyuk de ba sé sangal e tē min, yaga mwa hin, vɔ min ba sé e ji buru sana tɔk o.

²⁷Ka sede a sé mwat gwining nju mɛ de a ra renɛn sana tɔk, tik na a nára shep vyel shi ye shey hining yaga nɔrɔ̂ fûng banɛn.

²⁸Piris a rɔda ra e nuyel Dagwi Darwey pyɛ́ de ba ga tɔ́k ɛn mɛ na nása nɔrɔ̂ talâ-nɛn yaga mwat de a buru mo, ko Dagwi a rɔda hala a yɛ.

²⁹Redu rining remo ra kaba kawɛ mwat de a ra banɛn sana tɔk, ka a sé tɔ̂ lɔ̂ BeIsrayɛl kɛ wo yere dyuk ayi.

³⁰Ko Kawɛ mwat de a ra banɛn na nengyas, kɛ a sé tɔ̂ lɔ kɛ yere dyuk, a ga lashe rezâ Dagwi Darwey, a ga row neken mɛ, ko bê ro ɛ yi e bemat mɛ.

³¹Yaga a ga byɛs hâ Dagwi Darwey, ko a ga gyili badu mɛ, ko buru mɛ ha rɔda sè e rato mɛ.

³²Jeng de BeIsrayɛl ba rɔngɔl e hêy gbingiring, behak e ji mɛn ba sɛ̀ WoIsrayɛl hwak de a sé jama cɔ́gɔt Tuk Shábat,

³³ko ba jut ɛ wɔ na Mose na Aharon tanga mwa regyɛng BeIsrayɛl.

³⁴Ba wɔ̀ bang ɛ, na be gyeng pyɛ de Dagwi ê dura, be ra na yɛ.

³⁵Ko Dagwi Darwey a yâng Mose, “Be mɔrɔ hɛ. Regyɛng BeIsrayɛl mwa yɛn a rɔda tó ɛ na beta e bamâ kwɔ̂n ye ngyɔk.”

³⁶BeIsrayɛl mwa ba nusu na yɛ e kwɔ̂n ye ngyɔk, ko yɛn a tó ɛ na beta sɛ̌ a ku, tyɛng sede remo de Dagwi Darwey a nɔ̂ng Mose nu.

³⁷Dagwi Darwey a nɔ̂ng Mose nu,

³⁸a ha a BeIsrayɛl redu remo ngan: “Yin na yére min vɔk e nuyel, yong in bwɛshɛ, na yin a tɛ̀ e bato-kwɔng banaas vê berugu min, ko yin a tɛ̀ kerik de ka sé wilwil e ra kawɛ bwɛshɛ mo.

³⁹Bwɛshɛ mo wa rɔda sè pyɛ bare kayɛ jeng de yin a di wɛ, ko yin a rɔda bare na mwa badu hom de ma nɔng in na yin gyeng vɛ. Yi ano, yin a rɔda doyo yi na me, na yin a raa simô bato min tanga marâ yis min wɛt.

⁴⁰Yin a rɔda dopse bare, na yin a gyeng badu hom. Ko yin a rɔda sè bemat jɛrɛ, vemo de ba sé benang nju hom.

⁴¹E me wɛ à Dagwi Darwey, Dagwi min; ma ga nusu na yin yi e sevwêl Misra, na me tɛ́ me Dagwi min. Me wɛ à Dagwi Darwey, Dagwi min.”