Read berom Bara BeIsrayɛl 16 Bible Online

Bara BeIsrayɛl 16 - berom bible

Bara BeIsrayɛl 16

¹Kora Izhar, wo ruhûp Kohat e yerê Levi, a sogo a Mose nehywɛ. Bemat de ba wuna hɛn na yɛ vɛ a Datan na Abiram nèy Ɛliyap, na Ɔn Pɛlɛt, vê yerê Rubɛn tanga bemât nuyêl BeIsrayɛl behak naga beba na kuru batungun (250) de regyɛng bemat o ba kasa hɛn, yaga yɛn a vɔk reza.

³Yɛn a tula hɛn e nuyêl Mose na Aharon, ko ba yang ɛn, “Yin a tɛ̀ bato min yin a dal bwang bemat! Mwa bemât regyɛng BeIsrayɛl ba sé vê Dagwi Darwey, ko yɛ a sé na wot mwa. Yaga sɛ́ de yin a jut bato min yin a dal bwang regyɛng bemât Israyɛl arɛt?”

⁴Jeng de Mose a wok ano, a vɔk a gaba gup e nuyel mɛn, ko a ra won.

⁵A sogo, a yâng Kora na bemat de ba raa hɛ, “Dagwi Darwey a rɔda dura a wot mwat de a sé mwɛ, mwat de yɛ a ga kasa, ko a tik ɛ jaram. Nagasi nahwol, a rɔda ba tik mwat o, na a man na yɛ e gàgbang rangâs yas.

⁶Nagasi, hwo na kawɛ mwat de e raa hwo a ba jut repey. Tɛ̀ in cilâ kya na pyɛ̂ nesang hyɔɔlɔl o e ra yɛ, na yin a kyè mɛ vɔk e bûk sangâl Dagwi. Ko wot a rɔda di kɛ e wa e ji mot de Dagwi Darwey a ga kasa, na a sè mwɛ. A sé e yin BeLevi de yin a tɛ̀ bato min yin a dal bwang bemat!”

⁷

⁸Mose a re nuyel na ha na Kora, a ye, “Wet in betong, a yin BeLevi!

⁹A ga vey a yin de Dagwi wo Israyɛl a tik in jaram yi e bwang regyɛng bemat mɛ, yaga na yin a tɔk vey bagat na yɛ, na yin a ra a yɛ fwom e buk mɛ, na yin a tumal e nuyêl regyɛng bemat mɛ, na yin a ra a yɛn fwom wɛt arɛt?

¹⁰Yɛ a ga tik o, na mwa BeLevi, na yin a sɛ̀ nerey tom yerê vemo, ko a remo yin e simo yin a bak ɛ fwôm bepiris mɛ mwa a!

¹¹Jeng de yin e gwɔrɔng e ra Aharon, ko e ji ha mwin, a sé e ra Dagwi Darwey de hwo tanga bemât raa mō yin a sé sogo a yɛ nehywɛ.”

¹²E bama mo, Mose a tɛ̀ be yila a yɛ Datan na Abiram, ko yɛn a ye, “Wot ê vey wɛt!

¹³A ga vey a hwo, de hwà ga pat ot yi e Misra, sevwel de sa siri, sa vɔk pyɛ́ shɛrɛk, na hwo ba mɔbɔs hot e ngamo e hey arɛt? Ko a remo, hwà sé simo na hwo re negwɔm e ra wot a?

¹⁴Ko di, hwà ga ka vey na wot e sevwel de sa siri, sa vɔk pyɛ́ shɛrɛk wɛt, kɛ hwà ga ka nɔng ot hiri na bê anap, na ye tɛ́ ɛ pyɛ̂ nedanelɔ mot wɛt, ko di a remo, hwà sé simo na hwo kwɛlɛng hot. Wot ê vey wɛt!”

¹⁵Mose a tɛ̀ shom sizɔng, ko a yâng Dagwi Darwey, “Hwo sey nɔrɔ̂ pyɛ́ de yɛn ê rangas a hwo wɛt. Ma ga buru a hwak mɛn pyɛ cak wɛt, kɛ ma ka sey ɛ hwak e ji bemadung mɛn wɛt.”

¹⁶Mose a hwo yâng Kora, “Nahwol, hwo na bemât raa mō naga beba na kuru batungun yin a ba vey e bûk sangâl Dagwi Darwey. Kawɛ e ji min a rɔda ba jut repêy rangas pyɛ̂ nesang hyɔɔlɔl mɛ, a tɛ̀ pyɛ̂ nesang o e ji mo, ko a nára a Dagwi Darwey rɛ e kwɔ̂n rê fongol. Aharon a rɔda ba sè ɛ arɔng.”

¹⁷

¹⁸Ano kwong, kawɛ e ji mɛn a jut repey mɛ, a tɛ̀ cilâ kya tanga pyɛ̂ nesang hyɔɔlɔl e ra yɛ, ko a tumal mɛ e rwi bûk sangâl Dagwi tanga Mose na Aharon.

¹⁹Kora a ga kana tula mwa regyɛng bemât Israyɛl, ko yɛn a tumal bé bɛrɛng Mose na Aharon de ba sé e tumal e rwi bûk sangâl Dagwi. Nedyɛt gbɔng nerât Dagwi Darwey na hwo e ra buk o, ko regyɛng bemat o mwa ba di nɛ.

²⁰Ko Dagwi Darwey a hwo ha na Mose na Aharon, a ye,

²¹“Sek in yi na bemat vemo, yaga na me wey na yɛn remo ngan.”

²²Ko Mose na Aharon ba gaba gup e nuyêl Dagwi, yɛn a tosho a yɛ, ba ye, “À Dagwi, hwo wɛ de hwà nɔ̂ng kawɛ mwat neken. Ka sede mwat gwining a ra banɛn, ko hwô tɛ̀ shom na mwa regyɛng bemat o arɛt?”

²³Dagwi Darwey a yâng Mose,

²⁴“Ha a bemat o be sek e jey yi e buk Kora, Datan na Abiram.”

²⁵Mose a sogo, a kyè vɔk na Datan tanga Abiram, ko bemât nuyêl BeIsrayɛl ba raa hɛ.

²⁶A hwo yâng regyɛng BeIsrayɛl, “Sek in e jey yi e buk bemat beves vemo, yin ra pyɛ mɛn cak wɛt. Ka ano wɛt, yin a rɔda wey mwa hywiri na yɛn yaga banɛn mɛn.”

²⁷Ano kwong, bemat o ba sek e jey yi e bǔk Kora, na Datan tanga Abiram. Datan na Abiram ba ga kana nusu, ba sé tumal e ri buk mɛn o, yɛn na beha mɛn, na nèy mɛn tanga nèy lɔ mɛn.

²⁸Mose a yâng BeIsrayɛl, “Gwong a gwomo de yin a rɔda tɔk, a sé e Dagwi Darwey de a tomo me, na me ba ra pyɛ yemo kɛ ma sé ra yɛ pyɛ hom zɔng:

²⁹Ka sede bemat vemo ba kushu tyɛng sede bwang bemat, ko yɛn a kushu yaga tabâk Dagwi wɛt, ko sɛ̌ e Dagwi Darwey de a tomo me wɛt.

³⁰Ko ka sede Dagwi Darwey a vey na gwong hwak pwas o, na a tɛ̀ vwel hē wunta nu, na hē wɔlɔk hɛn na kayɛ pyɛ de ya sé myɛn, na yɛn a kyè beken vɔk e kwɔ̂n bevuvwel, ko yin a rɔda tɔk, bemat vemo yɛn a byɛs Dagwi Darwey.”

³¹Ras de Mose a sè bang nu, ko vwel de Datan na Abiram ba sé tumal ɛ ha takla,

³²ba wunta nû hɛ, ko ha wɔlɔk hɛn tanga belɔ mɛn, mwa na bemat raà Kora tanga pyɛ́ mɛn arɔng.

³³Yi ano, yɛn a kyè beken vɔk e kwɔn bevuvwel, mwa na kayɛ pyɛ de yɛn a vɔk. Vwel o ha bang ɛn, yɛn a wey, ko yɛnɛ mɛn à hane yi e bwang regyɛng BeIsrayɛl.

³⁴Jeng de BeIsrayɛl de ba gwɔrɔ kwɔn o ba wok sekun de yɛn a tɛ̀, ko yɛn a vɛ̌ tele yi e hwomo, bé dâk sekun, de vwel o he kwon wɔlɔk hɛn arɔng wɛt.

³⁵Ko kya ha vey yi na Dagwi Darwey, ha re bemat naga beba na kuru batungun (250) vemo de yɛn a sè rangas pyɛ̂ nesang hyɔɔlɔl o.

³⁶Dagwi Darwey a yâng Mose,

³⁷“Ha a Ɛlɛyazar, hwêy Aharon de a sé piris, na a jut bapey o yi e bèlilî bemat de kya ha re. A shara bèlili mo e jey yikyik, yaga bapey o ba sé jɛrɛ,

³⁸ba ga kana nára vɛ vey na me Dagwi Darwey. A jut vɛ na a táng vɛ, na a bang mɛ gàgbang rangâs yas. Ano de ba rɔda sè pyɛ tusa na BeIsrayɛl yaga bemat o ba kushu yaga banɛn mɛn.”

³⁹Ɛlɛyazar, piris, a jut bapêy vane mo de ba yong na dyam pama, ko a tɛ̀ be tang mɛ pyɛ bâng gàgbang rangâs yas,

⁴⁰sede remo de Dagwi Darwey a ha a yɛ e nû Mose. Ba ra ano, na ye sè pyɛ tusa na mwa BeIsrayɛl wɔgɔ, vit a mwat de Dagwi Darwey a simo a yɛ, na a rangas pyɛ̂ nesang hyɔɔlɔl e nuyel mɛ sɛ̌ yerê Aharon zɔng. Ko kawɛ mwat de a ra ano, a rɔda sɛ̀ pyɛ de ya té na Kora tanga mwa vemo de ba raa hɛ.

⁴¹Nusû hwol, mwa regyɛng BeIsrayɛl ba hwo gwɔrɔng e ra Mose na Aharon, yɛn a ye, “Yin a ga mɔbɔs bemât Dagwi Darwey!”

⁴²E jeng de yɛn a tula hɛn, yɛn a wuna hɛn e ra Mose na Aharon, ko yɛn a doyo vɔk e bûk sangâl Dagwi, yɛn a di rele ra kyiri buk o, ko gbɔng nedyɛt Dagwi Darwey na sé ɛ.

⁴³Mose na Aharon yɛn a kyè wɔ e nuyêl buk o.

⁴⁴Ko Dagwi Darwey a yâng Mose,

⁴⁵“Sek in e jey yi na regyɛng bemat o, yaga na me wey na yɛn remo ngan!” Ko yɛn beba mo ba gaba gup e vwel e nuyêl Dagwi Darwey.

⁴⁶Ano, Mose a yâng Aharon, “Jut repey mō, na hwo jut kya yi e ra gàgbang rangâs yas, na hwo tɛ̀ pyɛ̂ nesang hyɔɔlɔl e ra hɛ, na hwo kyè mɛ ziri wɔ na bemat o, na hwo wɔ̀ ra mɛ pyɛ́ de ye dura talâ-nɛn yaga yɛn. Shôm Dagwi Darwey ya ga vey, ko tumbang wa ga hwo e ra yɛn.”

⁴⁷Ko Aharon a ra tyɛng na pyɛ de Mose a ha a yɛ, a jut repey o, a tele mɛ vɔk e tê bemat o. Jeng de Aharon a di, tumbang wa ga kana hwo e ji bemat o, ko a tɛ̀ pyɛ̂ nesang hyɔɔlɔl e ra kya, na a ra mɛ pyɛ́ de ye dura talâ-nɛn yaga yɛn.

⁴⁸Aharon a tumal e tê bemat beken na bavin o, ko tumbang o wa tumal ano.

⁴⁹Nepyak bemat de ba ga kana kushu na tumbang o na wul gu kuru na vɛ banaas na naga betaama (14,700) sana tɛ̀ mwa vemo de ba kana kushu e sogô nehywɛ Kora.

⁵⁰E bama de tumbang o wa ga tumal, ko Aharon a toyo vɔk na Mose e rwi bûk sangâl Dagwi.