Read berom Bara BeIsrayɛl 17 Bible Online

Bara BeIsrayɛl 17 - berom bible

Bara BeIsrayɛl 17

¹Dagwi Darwey a há na Mose a ye,

²“Yang BeIsrayɛl be vey a hwo na begele kuru na vɛ beba (12), gwining yi na kawɛ mwât nuyêl yere mɛn. Jɛk rezâ kawɛ mwat e ra gwele mɛ,

³ko e ra gwelê Levi, jɛk ɛ rezâ Aharon. A sé gbing-gbing na be sɛ̀ gwele yi na mwât nuyêl kayɛ yere.

⁴Jut vɛ, na hwo tik e ji bûk sangal hom e nuyêl Kundung Wuna-na-Sira, e kwɔn de me manas ɛ na yin.

⁵Ko gwelê mwat de ma rɔda kasa gwa rɔda túruk. Hane ha rɔda dul gwɔrɔng de BeIsrayɛl be ra a yin.”

⁶Ano kwong, Mose a ha na BeIsrayɛl, ko bemât nuyel mɛn yɛn a nɔng ɛ begele kuru na vɛ beba, gwining yaga mwât nuyêl kayɛ yere, ko gwelê Aharon gwa sé e ji vɛ.

⁷Ko Mose a tik vɛ e nuyêl Kundung Wuna-na-Sira e ji bûk sangâl Dagwi.

⁸Sede gasi ha ye gbey, Mose a yel e buk o, ko a di gwelê Aharon yi e yerê Levi gwa ga túruk, ko gwa ga tɛ̀ cúyu tanga nèy cɔgɔ̂t almɔn nevele mo.

⁹Mose a jut mwa begele mo, a wɔ dura a BeIsrayɛl vɛ. Yɛn a bɛrɛng vɛ, ko kawɛ mwât nuyel a jut gwele mɛ.

¹⁰Ko Dagwi Darwey a yâng Mose, “Toyo na gwelê Aharon, na hwo tɛ̀ gwɛ e nuyel Kundung Wuna-na-Sira. Be tik gwɛ, na gwo se pyɛ tusa na bemât sogô nehywɛ, yɛn a rɔda kushu sɛ̌ yɛn a tik gwɔrɔng e ra me.”

¹¹Mose a ra tyɛng na pyɛ de Dagwi Darwey a nɔng ɛ nu.

¹²BeIsrayɛl ba yâng Mose, “Wot mwa, wot ê kushu! Yɛnɛ mot à hemo!

¹³Kawɛ e ji mot de ê kyɛm a vey bagat na bûk sangâl Dagwi Darwey ê ku. Wot mwa wot a ga jam a reku zɔng!”