Read berom Bara BeIsrayɛl 18 Bible Online

Bara BeIsrayɛl 18 - berom bible

Bara BeIsrayɛl 18

¹Dagwi Darwey a yâng Aharon, “Hwo na nèy mō tanga mwa yerê da mō Levi yin a rɔda jut nedirîk buru de be ra e bûk sangâl Dagwi. Ko hwo na nèy mō zɔng de yin a rɔda jut nedirîk buru de yin e ra sede bepiris.

²Hwà rɔda vey na begwa mō BeLevi, na yɛn a sɛlɛ hin. Jeng de hwo na nèy mō yin a sé ra fwom e bûk sangâl Dagwi, yɛn a rɔda sɛlɛ hin na fwôm buk o. Ko yɛn a wɔ bagat na pyɛ́ de ya sé e Kwɔ̂n Jɛrɛ kɛ e gàgbang rangâs yas vɔk na Dagwi wɛt, yaga na yin mwa hin yin a kwon kushu wɛt.

⁴Yɛn a rɔda wuna to na yin, na yɛn a jut mwa nedirîk bɛrɛng bûk sangâl Dagwi. Ko vit a mwat de a sé WoLevi wɛt de a rɔda vey bagat na kwɔn de yin a sé ɛ.

⁵Ko e hwo na nèy mō zɔng de yin a rɔda jut nedirîk fwom e Kwɔ̂n Jɛrɛ tanga e gàgbang rangâs yas, yaga na shom hom ye kwon to hwo e ra BeIsrayɛl wɛt.

⁶E me pyɛ hom de ma kana kasa begwa min BeLevi yi e ji BeIsrayɛl, ko ma nɔng ɛn hin sede pyɛ nɔrɔ. Ma tik ɛn jaram yaga me, Dagwi Darwey, na be ra fwom e bûk sangal hom.

⁷Ko hwo tanga nèy mō zɔng de yin a rɔda ra fwôm bepiris gwô gàgbang rangâs yas tanga e ji Kwɔn Jɛrɛ Hê Jɛrɛ de ba gas na gworugu. Ma sé nɔng in fwôm bepiris o e nɔrɔ. Ko mwat de a sé WoLevi wɛt de a vey bagat na Kwɔ̂n Jɛrɛ, bē mɔrɔ hɛ.”

⁸Dagwi Darwey a to yâng Aharon, “Di, ma sé nɔng o reto e ra mwa pyɛ̂ nɔrɔ de be vɛ̀sɛ a me mɛ, ko ma sé nɔng in yɛ, hwo na nèy mō, sede numo min nesheneshey.

⁹Yin a rɔda vɔk bak pyɛ́ de ya tɛt ɛ yi e pyɛ̂ nɔrɔ de ba ga kana rangas a me. Pyɛ̂ nɔrɔ mo de ya dal mwa na nejɛrɛ yɛ a nenɔrɔ̂ nemuk, na nenɔrɔ̂ fung banɛn tanga nenɔrɔ̂ talâ banɛn. Bak o wane wa sé yaga yin na nèy min.

¹⁰Yin a rɔda re pyɛ́ mo e Kwɔ̂n Jɛrɛ, ko a sé e beras zɔng e ji min de ba rɔda re yɛ. Tik na yin bare, ya sé pyɛ́ de ba ga tik jaram yaga me.

¹¹“Ko kayɛ pyɛ de ba ga kana tik jaram yi e pyɛ̂ nɔrɔ de BeIsrayɛl ba vɛ̀sɛ mɛ, ma sé nɔng in, hwo na nèy mō bewen na behwong; ya rɔda sè numo min nesheneshey. Kawɛ mwat e ji lɔ min de a sé haalal ê tɔk re yɛ.

¹²“Ma sé nɔng in mwa pyɛ́ ye mɛsɛng de be yet bwal yɛ de ya dal mwa na nerat, yemo de BeIsrayɛl be nɔngɔs me kahɛ shey. Pyɛ́ mo yɛ a něy pwat, na nshî anap tanga pyɛ̂ yéneng.

¹³Pyɛ́ mo mwa ya rɔda sè myin, ko kawɛ mwat e ji lɔ min de a sé haalal ê tɔk re yɛ.

¹⁴“Ko kayɛ pyɛ e sevwêl Israyɛl de Dagwi Darwey a ye, be tik yɛ detu yaga yɛ, na be wey na yɛ, ya rɔda sè myin.

¹⁵“Kahɛ hwey mɛsɛng hê mwasi kɛ hê ngyama, de BeIsrayɛl ba nɔng me, ha rɔda sè min. Ko yin a rɔda viri kahɛ hwey negel kɛ hwêy mɛsɛng hê yas de ya sé haalal wɛt.

¹⁶Jeng de hwey negel o ha wul pwɛl gwining, ko ba rɔda viri hɛ na dyām shɛkɛl betungun, tyɛng na masâ dyām de be ra mɛ fwom e kwɔ̂n rê fongol.

¹⁷Ko be kwon viri hwêy mɛsɛng hê rɔndɔng kɛ vyel pyɛng kɛ shi wɛt, yaga ha sé nang. Bē nára hɛ e nɔrɔ. Yin waram nemi mo e ra gàgbang rangâs yas, ko yin rangas sebwep o e ra kwɔn o arɔng. Nesang nɔrɔ̂ pyɛ̂ re nemo ne pɛngɛ a me yey.

¹⁸Ko banama mo ba rɔda sè bemin, tyɛng sede remo de cɔ̌ tanga fwâ yege yê nɔrɔ̂ wunâ nesa ya sé myin arɔng.

¹⁹“Ano kwong, kayɛ pyɛ nɔrɔ de BeIsrayɛl ba vɛ̀sɛ mɛ, ma sé nɔng in, hwo na nèy mō bewen na behwong, ya rɔda sè numo min nesheneshey. Hemo hɛ a sira de ma wuna na yin, ko ba tɛ̀ nevwashe de na dura, ha rɔda nàra gbak-gbak.”

²⁰Ko Dagwi Darwey a to yâng Aharon, “Jeng de BeIsrayɛl ba rɔda wul sevwel de ma rɔda nɔng ɛn, yin a rɔda vɔk benap kɛ bak o hwak e sevwel o wɛt. Mɛ wɛ de ma rɔda sè numo min, ko ma rɔda nɔng in kayɛ pyɛ́ de yin e simo.”

²¹Dagwi Darwey a ye, “Ma sé nɔ̂ng BeLevi pyɔlɔ̂ kayɛ pyɛ de BeIsrayɛl ba vɛ̀sɛ mɛ sede talâ fwom de yɛn e ra e bûk sangâl Dagwi.

²²E ngamo nuyel, bwang BeIsrayɛl ba rɔda wɔ bagat na bûk sangal hom wɛt. Ka ano wɛt, ko yɛn ê jut nedirîk nɛn mɛn o, ko yɛn ê kushu.

²³A sé e BeLevi zɔng de yɛn ê ra fwom e buk o, yɛn vɛ de yɛn a rɔda jut nedirîk fwom o. Hemo ha sé redu yaga nezamang min vɔk e nuyel. BeLevi ba rɔda sɛ̀ benap e ji BeIsrayɛl wɛt.

²⁴Ko ma rɔda nɔng ɛn pyɔlɔ de BeIsrayɛl ba rɔda vɛ̀sɛ a me mɛ e to mó. A sé yaga ano de ma ha a yɛn, yɛn a rɔda sɛ̀ benap sede bwang BeIsrayɛl wɛt.”

²⁵Dagwi Darwey a yâng Mose,

²⁶a ha a BeLevi, a yang ɛn, “Jeng de yin a sey pyɔlɔ yi na BeIsrayɛl, de me ma sé nɔng in sede numo min, a sé gbing-gbing na yin a pat jining e ji pyɛ́ kuru yê pyɔlɔ mo, yaga na yin a nára yɛ vey na me.

²⁷Pyɔlɔ min o, ba rɔda jut yɛ ye sè tyɛng na pyɔlɔ de bwang BeIsrayɛl ba nɔng yi e pyɛ̂ yéneng de ba dak e gazu, tanga nshî anap yi e kwɔ̂n piri mo.

²⁸E gwong a gwomo de yin arɔng yin a rɔda nɔng numo de ha sé nang, ko yin ê pat yɛ yi e kayɛ pyɔlɔ de yin ê sɛ̀ yi na BeIsrayɛl. Yin a rɔda nɔ̂ng Aharon, piris, numo nang.

²⁹Yin a rɔda nɔng me pyɛ de ya dal mwa na nerat e ji pyɛ de ba ga nɔng in.

³⁰“Jeng de yin a nɔng bak o wane de wa dal mwa na nerat, ko bwang o gwa rɔda sè mwin, sede remo de bwang BeIsrayɛl ba vɔk bwang pyɛ̂ yéneng na nshi anap e bama de ba ga pat ɛ pyɔlɔ mo.

³¹Ko yin na belɔ min, yin ê tɔk re pyɛ́ mo e kahɛ kwɔn, yaga ya sé pyɛ́ de ba ga nɔng in e talâ fwom de yin e ra e bûk sangâl Dagwi.

³²Ka sede yin a nɔng bak o de wa dal na nerat vey na me, ko yin a rɔda tɔk re pyɛ́ mo sana râ renɛn. Ano kwong, yin a rɔda lashe pyɛ́ de BeIsrayɛl ba vɛ̀sɛ a me mɛ wɛt, ko yin ê kushu arɔng wɛt.”